Jueces 13 - New Testament with Old Testament portions

Sansón akinamu

¹ Turasha israelita aina ataksha tunaun takainakai Yuus umirchamu asa kajerak: Filisteo aina waitkainam cuarenta uwí matsamsarti tusa tsagkamkauwaiti.

² Nugka Sorá tutainam, Dan weantu ajakua nuiya shuar Manoa naartin pujujakuiti. Turasha nuwegka uchin jurechu ajakuiti.

³ Tuman Yuus akupkamu nayaimpinmaya shuar nuwan wantintuk chicharuk: Ameka uchi jurechu ayatmek ajaprukam uchi jurertatme, tusa tinaiti.

⁴ Turasha vino, tura umutai nampemain aina nuka umaraipa. Tura Hebreo shuar ainan yuchatairi aina nusha yuawaipa.

⁵ Nu uchi akinagka Yuus yayasam tsakar israelita ainan filisteo aina waitkam matsata nuna yaigtatui. Tumatin asamtai, uchi akinamtaigka wichi tsupirkaipa, tusa tinaiti.

⁶ Tutai waketki aishrin ujak: Nayaimpinmaya shuar wii pujamunam tsaaptin wantinturkayi. Yaitam tusankesha iniaschamjai, tura nigkisha inintsachmayi.

⁷ Turasha chichartak: Uchirmaktatme, yamai nagkamsam vino, umutai nampemain aina nuka umaraipa. Tura Hebreo shuar yuchatairi aina nusha yuawaipa. Nu uchika Yuus pegkermamtikamu atatui tusa tawai tinaiti.

⁸ Takai Manoa Yuusan aujeak: “Yuusru, uchi akinamtaisha uruk tsakatmartajak nuna pachis ujatkati, amina inatairam akupkamu wina nuwarun ni turunatnurin pachis ujaka nu, wait aneasam ataksha akupturkata, tusa tinaiti”.

⁹ Takai Yuus nina inatairin nayaimpinmaya shuaran ataksha akupkauwaiti. Turam nuwa ajanam pujaun wantintukuiti. Turasha nuigka aishrigka atsau,

¹⁰ tuma asamtai aishrin weri ujak: “Chikich tsawantin shuar wantinturkama nu ataksha taayi, tuma ai pujawai”, tusa tinaiti.

¹¹ Tama nijaig jeari nayaimpinmaya shuaran Manoa chicharuk: Chikich tsawantin amek wina nuwarjai chichasmam, tusa tinaiti. Tama nayaimpinmaya shuar Manoan chicharuk: Ee, wiyaitjai, tusa tinaiti.

¹² Tama Manoa chicharuk: “¿Uchi akinamtaisha uruk tsakatmartataj?” tusa tinaiti.

¹³ Tama Yuusa inatairi nayaimpinmaya shuar, nuwan ujakua turusag Manoancha ujak:

¹⁴ Vino, umutai nampemain aina nuka umaraipa. Tura Hebreo shuar yuchatairi aina nusha yuawaipa. Wii timaj nunak umiktatui.

^15-16 Turamsha nigka nayaimpinmaya shuarapita tusagsha enentaimtachu asa, ataksha chicharuk: Cabran maa inaraamtai yuami, wait aneasam nakarsata, tusa tinaiti. Tama Yuusa inatairi nayaimpinmaya shuar ayak: Wika atumin yutairinka yumaitsujai. Antsu cabra maam epeakum Yuus emematta, tusa tinaiti.

¹⁷ Tusa tama Manoa Yuusa inatairin chicharuk: ¿Ujakratkata amina naarmesha yaita? isha nu nekaar ame tukartam nu uminkaigka maaketi tusar titatji tinaiti.

¹⁸ Tutai nayaimpinmaya shuar chicharuk: “¿Urukamtai wina naar nekattsarmesha wakerarme? Wina naarka pegkesha nekamaitsurme”, tusa tinaiti.

¹⁹ Takai Manoa Yuusan eme anentas iiyak cabran maa epeawaiti. Turamtai Manoan nuwejai Yuus nina senchirin iwaintak:

²⁰ Tagku aina maa patasa epetainmaya ji mukuintamunam ajapeen pachitkau Yuusa inatairi nayaimpinam wuwaiti. Tuman wainak, Yuusan inatairimpapita tusa Manoa nina tikishmatrauwaiti.

²¹ Tuma nui Manoa nayaimpinmaya shuarapita tu enentaimrauwaiti. Tuma nuiyagka nitan wantintukcharuiti.

²² Tura Manoa nuwen chicharuk: Yuus wainkau asar jakattaji, tusa tinaiti.

²³ Takai nuwe ayak: Turasha ii jakatin arincha urukamtai Yuus eme anentsa iiyakum, cabra maam epeata. Tura ¿uchi akinamtaisha tu tsakatmarta tusasha turammajia,? tusa tinaiti.

²⁴ Uchin aishmagkun jurer Sansón anaikauwaiti. Yuus pegkernum yayámu asa tsakaruiti.

²⁵ Sansón Soránum, Danka nugken pujaun, israelita ainan yaigti tusa, chikichik tsawantin Yuus nina Wakanin susauwaiti.