Josué 6 - New Testament with Old Testament portions

Israelita aina yaakat Jericónmaya shuar ainan weriarmau

¹ Yaakat Jericónmaya shuar aina israelita ainan ashamaina asar, nita yaaktarin waiti irunun epentrar waimainchau, tura jiinmainchau amajsaruiti.

² Turasha Yuus Josuén chicharuk: “Yaakat Jericónam apu puja nunaka nina suntaari ainajaimak amina inaitusjame, turamu asam ame nitaka nepetkattame.

³ Yaakat tenta tentakuarum seis tsawan ejétarma. Turasha chikichik tsawantin chikichkia tentakrum inaitarma.

⁴ Tura siete sacerdote aina chiki chikichik trompetan oveja kachuri najanamun jukiar sacerdote chikich aina arcan jukiar ukunam wenai nita emak weartatui. Tumainai suntar ainaka nuna ukurin weartatui. Tura siete tsawantincha seis tsawantin uruk yujasaraik tumasarag yujasartatui. Antsu siete sacerdote aina nita trompeta takakmauri umpuarartatui.

⁵ Nuna trompetan umpuki wena pegkesha inagnatsuk umpuamu antukrumka senchi kakarum chichaktarma. Atum imatkurmin yaaktan tanishriya nu yumpuunkattawai. Tumamtai nui atum ainatiram yaakat Jericónam wayattarme”, tusa Yuus Josuén tinaiti.

⁶ Josué sacerdote ainan untsuk irumar chicharuk: “Yuus chicham umikmau egkeamu arca jukitarma, tura siete sacerdote ainatiram kachu najankamu aina jukirum atum emkarum wetaarma”, tusa tinaiti.

⁷ Nuna tusa nina suntaari ainan ashi chicharuk: “Atum ainatirmesha yaakat tentaktarma. Tura shuar maanitan yacha aina nu Yuusa arcarin juki wena nuna emtin weartatui”, tusa tinaiti.

⁸ Tusa timatai turusag uminak, siete sacerdote aina chiki chikichik trompetan jukiar umpui umpuinakua wena. Tumainai sacerdote chikich ainaka Yuus chicham umikmau egkeamu arcan juki nita ukurin wena.

⁹ Tura shuar maanitan yacha ainaka sacerdote ainan emtin wena. Tumainai suntar chikich ainaka sacerdote arcan juki wenan ukurin wena. Tura sacerdote trompetan takaku ainaka pegkesha inagnatsuk umpuina.

¹⁰ Josué ni shuar ainan chicharuk: “Atum chichamun anturtamkarai takamtak wetaarma. Antsu chichaktarma tusan wii takai senchi kakarum chichaktatrume”, tusa tinaiti.

Israelita aina yaakat Jericón jukimu

¹¹ Josué sacerdote aina Yuusa arcarin jukiarmatai yaakat Jericón chikichkia tentak ikukiar nita pujuinamunam waketkiar jeawar kanararuiti.

¹² Tumawar kashin tsawainak shir káshikmas Josué, tura sacerdote ainasha nantakiar Yuusa arcarin jukiaruiti.

¹³ Tumawar yama nagkamchakka shuar maanitan yacha aina emkar wena. Nuna ukurin siete sacerdote aina inagnatsuk kachun umpuki wena. Nuna ukurin sacerdote chikich aina Yuusa arcarin juki wena. Tura inagnamunam ashi wena.

¹⁴ Jimar tsawanta juisha yaakat Jericón chikichkia tentakaruiti. Turawar waketar nita pujuinamunam jeawaruiti. Nuna turu turuinakua seis tsawan ejéniaru ainawai.

¹⁵ Siete tsawanta juisha shir káshikmas sacerdote aina suntar ainasha nantararuiti. Tuma wear nu tsawantinka yaakat Jericón siete imajnia tentakaruiti.

¹⁶ Tura siete imajnia yaakat tentamunam, sacerdote aina trompetan senchi umpuinakai, israelita ainan Josué chicharuk: “Yuus ju nugkan suramsau asaakrin senchi chichaktarma”, tusa tinaiti.

¹⁷ Nu yaaktanmaya shuar ainaka Yuus turatarma tusa tina turusrumek, nita tagkuri ainajaimak ashi ijinatarma. Turakrum jea uun aina, chikich warí ainajaimak ashi tsaiktarma. Turasha nuwa akika takatai Rahab naartin puja nuka nugka nekatarma tusan wii akupkamu ainan ni uuk uwemtikrau asamtai, nina patai aina Rahabpa jeen pujuinaka chikichkiksha maawairpa.

¹⁸ Nu yaaktanmaya warí ainan Yuus tsaiktarma tusa turamin asamtai atumka jukirpa, tura achitkesha achikairpa. Antsu nu umiachkurminka Yuus ina aakri ainan tsairtammainaitji.

¹⁹ Antsu oro aina, jiru plata tutai aina, bronce aina tura hierro ainaka Yuusnau atii tusar warí akik aina egketainam egkenattawai, tusa tinaiti.

²⁰ Tusa Josué timatai sacerdote aina trompetan inagnatsuk umpuinakai nuna antukar israelita aina shir senchi chichakaru ainawai. Tumawarmatai yaakta tanishri yumpuuntrauwaiti. Tumamtai nita yaaktanam utsanawar nuiya shuar ainan nepetak ijinawar yaaktanka nita jukiaru ainawai.

²¹ Shuar aishmag ainan, nuwa ainan, natsa ainan, tura untach ainancha ashi ijinawaruiti. Nuna turuinak vaca ainan, oveja ainan, burro ainancha ashi ijinawaruiti.

²² Turasha Josué jimar shuaran yaakat Jericó nekatarma tusa akupkamuri ajakua nuna chicharuk: “Rahab, tura nina patai ainajaimak pujuinaka, atum tinaitrum turusrumek maatsuk ashi jiirtaarma”, tusa tinaiti.

²³ Josué tusa takai weriar Rahabpan, nina aparin, nukurin, umai ainan, kai ainan, tura nina patai ainajaimak pujuinan ashi jiiraruiti. Turawar yaruakar agkantunam apujsaru ainawai.

²⁴ Turawarmatai yaakat Jericón, tura nui irununka ashi ekemakaruiti. Antsu orojai, jiru plata tutaijai najankamu ainan, jiru bronce ainan, tura jiru hierro nu ainanka jukiar Yuus ememattasa iruuntai aaknum ikusaru ainawai.

²⁵ Turasha Josué nugka nekatarma tusa akupkamurin uuk uwemtikrau asamtai, Rahabnaka nina patai ainajaimak maachuiti. Nu turamu asa, Rahab weantu ainaka israelita ainajai pujuinawai.

²⁶ Nuna ashi umik Josué ni umiktintrin pachis chichaak: “Wii waitruashtataj nunaka Yuus nekawai. Chikichik shuarkesha yaakat Jericó tsaikmauwa juna ataksha jea ainan jeamkartajai tusa takugka nina uchiri yama nagkamchak akina mantamnattawai. Tumamtai takatan takau aina nuna iyashin aepsar nui ekeniar tanishmarartinaiti. Tura uchiri ekeusha tumasag mantamnattawai. Tumamtai nuna iyashincha nugkanam aepawartatui. Nuna turawar nui ekeniar yaakta waitirin najanawartin ainawai”, tusa Josué tinaiti.

²⁷ Josuénka Yuus yaigkuiti. Turamu asamtai ashi shuar nu nugkanam pujuinaka ni nepetmajakua nunaka ashi nekajaku ainawai.