Josué 5 - New Testament with Old Testament portions

Josué Gilgal nugkanam pujus nina patai ainan kati mushuken tsupiramu

¹ Tura amorreo ainan apuri entsa Jordánkan yantamen etsa akatainam puju aina, tura cananeo ainan apuri nayants Mediterráneo tutainam pujuinasha Yuus israelita aina katiararti tusa entsa Jordánkan ukuyua muku amajsayi, tusa tamaun nekawaru ainawai. Nuna nekawar senchi sapijmakar nitajaigka maanimain nekapsacharuiti.

² Yuus Josuén chicharuk: “Kaya aina jukim, kuchiya numamtin najankata, turam nujai israelita aina kati mushuke tsupirata”, tusa tinaiti.

³ Tusa timatai kaya ainan kuchiya numamtinan najankauwaiti. Nuna tura nujai Aralot nugkanam israelita ainan kati mushuken tsupirauwaiti.

^4-6 Israelita aishmag uun aina, tura uchi aishmag aina, Egipto nugkanam pujujakarua nuka nuig pujuinak nita kati mushukegka tsupiramu ajakarua nuka ashi jinawaru ainawai. Antsu Egipto nugkanam pujuina jinar aya nugkanmag cuarenta uwí yujasaru aina nui uchi aishmag akinkaru ainaka nita kati mushukegka tsupirachmau ajakaruiti. Tura aishmag kakaram maanimain aina Egipto nugkanam pujuina jintraru aina nunaka Yuus chichame umirkachmau asa, nekas umiktin asa nitan chicharuk: “Atumi uuntri ajakarua nuna atum weantu ainan nugka pegker ainan, árak aramsha shir tsapainiar neren ainan, tura tagku ainasha nukap pampain aina nuna susartinaitjai, tusan tinaitaj nuka atumka wainkashtin ainarme”, tusa Yuus tinaiti. Tusa timau asar nitaka jintag jinawaru ainawai. Turasha entsa Jordánnum katiararu aina nuka nita kati mushukegka tsupirachmau ajakaru ainawai.

⁷ Nu shuar ajakarua nuna uchiri jinta weamunam kati mushuken tsupikcharu asarmatai Josué tsupirauwaiti. Nita apari aina nugkan jutsuk jinamunam nita nugkan jukiartatui tusa tinu asamtai nunaka turawaiti.

⁸ Tura kati mushuke tsupiramu asar, nuna chimiawartasa nuig pujusaruiti.

⁹ Tuma nui pujuinai, Yuus Josuén chicharuk: “Israelita aina egiptonmaya aina aantra inajakmau asar natsaamamaina nunaka yamaika tumachartatui”, tusa tinaiti. Tuma asamtai nu nugka nunaka yamaiya juisha Gilgal tinu ainawai.

¹⁰ Israelita aina Gilgal nugka paka yaakat Jericónam jeastatuk amaunam nui pujusar, uwí nagkamna chikichik nantun achik catorce tsawan tsawarmaunam pan levadurajai pachimtsuk inaraa yutai jiisat Pascua tsawan asamtai, etsa kiarai iruuntrar jiistamawaru ainawai.

¹¹ Nu tsawanta nuik pan levadurajai pachimtsuk inaraamu ainan, tura trigo unuikmau ainajai yuawaru ainawai. Antsu kashin tsawainak nu nugkanmaya árak ainan juuk inarkar yuawaru ainawai.

¹² Nuna yuina asarmatai maná kakeamunka nu tsawanta nui megkakauwaiti. Tuma asamtai israelita ainaka atak awenawarka manánka yuacharu ainawai. Tura nu uwítin nita Canaán nugkanam jeawaru aina nunaka nuiya árak ainan jukar yusar pujusaru ainawai.

Josué Yuusa suntaari ainan apurijai igkuniaka chichasmau

¹³ Chikich tsawantin Josué yaakat Jericón iistasa weajkama, chikichik shuar kuchiin takus wajaun wainkauwaiti. Tuma jeari chicharuk: Ame ii shuarkaitam, tumachkumsha ina shuarigkaitam, tusa tinaiti.

¹⁴ Tama ni chicharuk: Wika Yuusa suntaari ainan apuriyaitjai, tusa tinaiti. Tusa tama tikishmatar chicharuk: Wisha Yuusa umirnaitjai, winasha urukati tusamea wakerutam nu turutta, tusa tinaiti.

¹⁵ Tusa tama Yuusa suntaari apuri chicharuk: Ame wajam nuka nugka pegker asamtai, zapatoram ukuintrata, tusa tinaiti. Tusa tama Josué zapatorin ukuintrauwaiti.