Josué 4 - New Testament with Old Testament portions

Israelita aina entsa Jordánnumian doce kayan jukiaru ainawai

¹ Entsa Jordánnum ashi katiararmatai, Yuus Josuén chicharuk:

² Israelan uchiri doce tribu aina nuiya doce shuar etegkata.

³ Turam sacerdote aina entsa nakarin wajaina nuiya, kaya chiki chikichik jukitarma, turarum atum kanartinnum ejétarma tusam tiarta, tusa Yuus Josuén tinaiti.

⁴ Tusa timau asa, Josué doce shuaran etegkamurin untsukuiti.

⁵ Tura nitan chicharuk: “Entsa Jordán muku jas a nuna nakarin wetaarma, tumarum ina Yuusri arcari puja nui jearum kaya chiki chikichik yanakrum ashi irumramka doce kaya jukitarma.

⁶ Turarum nu kaya irumratarma. Atumin uchiri aina, nu kaya irumramun atakea nui nuna wainkar, ¿ju kayasha urukamtai jutikamuit?” tusa ininmainakai,

⁷ atum chichakrum: “Yuus chicham umikmau egkeamun arcan sacerdote aina yanakiar jukiar entsa Jordánnum wajawarmatai entsa jimapetuk kanak muku jasuiti. Tumamtai ii ainati katiaruitaj nuna juka iwainawai tusarum titinaitrume”, tusa tinaiti.

⁸ Tusa tama Josué timaun metek umikaru ainawai: Tumainak Yuus Josuén turawarti tusa tina turusag Israel shuar aina doce tribu ajakarua nuiya chiki chikichik kayan jukiar nita kanartinnum ejéniaru ainawai.

⁹ Antsu Josué nisha turusag entsa kuyua muku jasmaunam nuna nakarin sacerdote aina chicham umiktin egkeamun arcan yanas wajainamunam doce kayan yaruak nui irumrauwaiti. Nu kaya irumramua nuka yamaikisha nuig awai.

¹⁰ Sacerdote aina arcan yanaki ju jakarua nuka entsa Jordán kuyua muku jasmatai nuna nakarin wajainai, israelita ainaka Yuus Josuén akatea juna umikarti tusa timaunka imatiksag umikaruiti. Moisés Josuén turattame tusa timaunka imatiksag umikuiti. Nuna turamtai shuar ainaka wárimasar katiararu ainawai.

¹¹ Israelita aina ashi katiararmatai, sacerdote Yuusa arcarin yanas wajainasha katiararu ainawai. Tumawar nita emkar wearu ainawai.

¹² Nuiyasha maanitan yacha aina, nita maanitairi ainan yaruakar, Rubén weantu aina, Gad weantu aina tura Manasés weantu ainaka jimapetuk kanaki katiararu ainawai. Tumawar Moisés timaun metek uminak chikich israelita aina wenamunam nita emak wearu ainawai.

¹³ Nitaka cuarenta mil shuar tumain nita maaniatnurinka shir uminas katiarar, Yuusa emtin nugka pakanam yaakat Jericónmani wearu ainawai.

¹⁴ Moisésan eme anentas ii ajakarua turusag Josuéncha eme anentas iisarti, tusa Yuus nu tsawantin apu amajsauwaiti.

¹⁵ Tura Yuus Josuén chicharuk:

¹⁶ “Sacerdote chicham umiktin egkeamun arcan yanas wajaina ausha katiartarma tusam titá”, tusa tinaiti.

¹⁷ Tusa tama Josué sacerdote ainan katiartarma, tusa tinaiti.

¹⁸ Tusa tama sacerdote aina Yuus chicham umikmau egkeamun arcan yanakiar wajaina nitasha katiarar kukar jinainaig entsa muku jas auka yaunchuk nujagkrua amaunka imanisag ashi pakarijai amur asauwaiti.

¹⁹ Israelita aina Jordán entsa amain katiarar we wenakua Gilgal nugkanam jeawaru aina nunaka, uwí nagkamna chikichik nantun achik diez tsawan tsawarmaunam tumawaru ainawai.

²⁰ Nui Josué entsa Jordánnumia kaya jukimun irumrauwaiti.

²¹ Tura irumar israelita ainan chicharuk: “Atakea nui atumin uchiri aina juna wainainak, jusha urukamtai jutikamuit, tusa ininmainakaisha,

²² juka Yuus nina senchirijai Jordán entsan muku amajas ina ikatiatmarua nuna iwainawai tusarum titinaitrume.

²³ Tura nuiyasha ina Yuusri, Nayants Kapantu tutain katitkarti tusa yaunchuk ukuyuawa turusag yamaisha Yuus entsa Jordánkan katigkarti tusa ukuyua muku amajsamtai katigkurum nu pachisrum ujaktin ataarma.

²⁴ Ina Yuusri juna turawa nunaka, ashi nugkanmaya shuar ainasha Yuus nekas senchirtinaitaj juna nekarawarti”, tusa turawaiti.