Josué 24 - New Testament with Old Testament portions

Josué akatmamku chichakmau

¹ Josué Israel shuar ainan apurin, apu chichaman iwarin ainan, tura suntara apuri ainajai Yuus ememattasa iruuntai jea iinias amaunam yaakat Siquemnum ashi irumrauwaiti.

² Nuna tura nitan ashi chicharuk: Atum ememattai Yuus chichaak: Yaunchuk atumi uuntri ajakaru aina Terá Abrahaman apari ajakua nu, tura Nacor, nu ainaka entsa Éufrates amain pujusar chikich yuus ainan eme anentas ii jakaru ainawai.

³ Tuma pujaun Abrahaman wii chicharkun: “Nuiyagka jinkita tusan tinaitjai. Tusa tama nuiya jiinkimtai nugka Canaánnum wii ewekasuitjai. Turan yama nagkamchaknaka nina uchiri atinan susauwaitjai, turam Isaac anaikauwaiti. Nuna turan nu uchinmaya nukap napamkauwaitjai.

⁴ Isaacnaka jimar uchin susauwaitjai, turam Jacob anaikauwaiti. Tura chikichnaka Esaú anaikauwaiti. Esaúnka nugka Seír tutai nain ikam irunun susauwaitjai. Antsu Jacobka nina uchiri ainajai, tura patai ainajaimak Egipto nugkanam pujustasa wuwaiti.

⁵ Tumawar nukap uwí pujuinai nitan yainkarti tusan Moisésan, Aarónjai wii akupkauwaitjai. Nuna turan Egipto nugkanmaya shuar ainanka shir senchi waittan susan atumi uuntri aina nui pujuinan jiiruitjai.

⁶ Atumi uuntri aina Egipto nugkanam pujuina jintramtai, egiptonmaya aina carreta maaniaku wekatai ainajai, nuiya caballo ainajaimak yaruakar patatukar we wenakua nayants Kapantu tutainam ejéniaru ainawai.

⁷ Nu turuinam Yuusa, ame yaigkratkata tusar wina turutiaru ainawai. Tusa turutainakai nita ukurin egiptonmaya aina wininamunam káshi amajsauwaitjai. Nayants ijinati timau asa, egiptonmaya ainanka nayants ijinawaiti. Wii nuna turawaitaj nuka atumsha wainkauwaitrume. Nuna wii turamtai shiakrum aya nugkanmag nukap uwí pujusuitrume.

⁸ Nui pujarmin yaruakan entsa Jordán amain etsa watainmani amorreo aina pujutairin ejénaitjarme. Turamu asarum nui pujarmin amorreo aina atumjai maanikaru ainawai. Turasha nitanka ijinawarti tusan wii timau asarum, atum nitaka ijinawaitrume. Nu turarum nita nugkegka atum jukin ainarme.

⁹ Tura chikich tsawantin Sipora uchiri moabita ainan apuri Balac, atumjai maaniattsa atum pujamunam taawaiti. Tuma Balac, shuar chichaman etserin ainan Baalam Beoran uchiri ujaktarma, turam ni israelita ainan pegkerchaunam chicharkati tusa atumin pachitmas tinaiti.

¹⁰ Turasha atumin pachitmas Baalam pegkerchau chicharkati tusan wii tichamu asa, pegkerchaunmagka chichartamtsuk pegkernum chichartamkauwaitrume. Wii atumnaka tu ayamrukuitjarme.

¹¹ Wii turamu asarum entsa Jordánnum amaini katiaruitrume. Tumarum yaakat Jericónam jeawaitrume. Tura Jericónam puju aina nu, amorreo aina, ferezeo aina, cananeo aina, hitita aina, gergeseo aina, heveo aina tura jebuseo aina nu, atumjai maaniawaru ainawai. Turasha wii atumnaka nitan nepetkarti tusan yaigkuitjarme

¹² Tura atum ainatiram amorreo ainan apuri jimar nita suntaari ainajaimak nepetkauwaitrum nuka, atum ima senchirtin asarum, tura maanit yacha asarmeksha turachu ainarme. Antsu nuka atumin ashamramkarti tusan wii timau asar, atumin ashamramaina asarmatai turawaitrume. Wii tumawarti tusa timau asar atumka eke jeatsruminig nitaka tsekeararu ainawai.

¹³ Wii atumnaka nugka atum takaschamunam pujusarti tusan tinaitjarme. Wii atumnaka chikich shuara yaaktari ainan tura atum takaschamu jea ainan jukiarti tusan tinaitjarme. Tura yamaika nui pujarme. Tura uva nere aina tura olivo atum arakchamu aina jukrum yuarme”, tusa Yuus turamrume tusa Josué tinaiti.

¹⁴ Tusa chichaak: “Nu aina ashi enentaimsarum Yuus eme anentsarum iiyakrum emematkurum umirkatarma. Atumi uuntri aina entsa Éufrates amain etsa watainmani pujusar, tura Egipto nugkanmasha pujusar chikich yuusrimtairi ainan eme anentas iiya ajaku aina nuka inaisatarma. Turakrum Yuusa nuke umirkatarma.

¹⁵ Atum Yuus umirat nakitakrumka ya umirkattsarum wakerarum nu yamai etegkatarma. Yaunchuk atumi uuntri aina entsa Éufratesnum pujusar nita yuusrimtairi ainan eme anentas iiya jaku aina nuka, tumachkurmesha atum yamai amorreo shuar aina nugken pujarum nuna yuusrimtairi aina nuka eme anentsa iistasrum wakerarum nu titarma. Turasha wika, wii weantu ainajai Yuusa nuna umirkattsan wakerajai”, tusa Josué tinaiti.

¹⁶ Josué takai nitasha chichainak: “¡Isha aantra yuusrimtai aina nuka eme anentsa iitsuk Yuusa nuke eme anentsa iiyakur emematmi tusar taji!

¹⁷ Ina Yuusriya nuka ii ainatin, tura ina uuntri ainajai Egipto nugkanam inaku waitkatai pujarin wainchatai ainan nina senchirijai ii wainmaunam iwainar jiirmaruitaj nuwaiti. Tura nuiyasha jiintrar jinta weamunam shuar aina irunmaunmasha nigki kuitamramkauwaitji.

¹⁸ Ii pujaj ju nugkanam chikich shuar aina pujuinan, tura amorreo ainancha Yuusa nu jiiruiti. Tura asamtai ii ainatisha ina Yuusriya nu umirkartatji”, tusar tiaru ainawai.

¹⁹ Turasha Josué nitan chicharuk: “Yuusa nuka, Yuus pegkesha tunaurinchauwaiti, tura nigka anenmau asa winak eme anentrus iirainak umirtukarti tusa turamji. Chikich yuus aina nu eme anentsa iiyakruminka pegkesha tsagkurtamrashtatrume. Yuus umirat nukapea inaiya asaakrumin, Yuusnaka umirmain ainatsuapi tu enentaimtajrume.

²⁰ Yuus pegker ainanam yamaiya juisha nukap yainmaku akusha, ni umirat inaiyakrum chikich yuusrimtai aina nu eme anentsa iiyakrum emematkurminka, waittan suramuk ashi ijitmatin ainarme”, tusa tinaiti.

²¹ Tusa tamasha nita chichainak: “Atsaa, nuka tumatsuk Yuusa nuke eme anentsa iiyakur umirkattaji”, tusar tiaruiti.

²² Tusa tuinakai Josué nitan chicharuk: “Atum Yuus eme anentsa iiyakur umirkattaji tusarum tarum nuka anturnaikaurme. Tuma asarum nu metek umiachkurmeka atumek tunaittarme”, tusa Josué tinaiti. Tusa takai “ii taji nuka metek umiktatji”, tusar tiaruiti.

²³ Tusa tuinakai Josué nitan chicharuk: “Nu tusa takurmeka yuuschau aina eme anentsa iiyakrum emematrum nu utsagtarma. Yuus Israel shuar ainatin etegtamrauwa nu atumsha nigki enentaimtusrum ememattarma”, tusa tinaiti.

²⁴ Tusa takai nita chichainak: “Ika, ina Yuusriya nuke eme anentsa iiyakur ni takai nuke umirkattaji, tura chicham umiktin aarmau aina nusha umiktatji”, tusa tiaruiti.

²⁵ Yaunchuk Yuusjai chicham umikuitaj nuka umiktatji, tusa tiaruiti. Tusa tuinakai, nu tsawantinig yaakat Siquemnum Josué nina patai ainan chicham umiktin ainan uminak pujusarti tusa anemtikrauwaiti.

²⁶ Yuusa chichame aatainam Josué aaruiti. Nuna tura umik kaya uuntan juki númi encina tutai Yuus emematku iruuntai jaanchjai jeamkamu amaunam iinias waja jakua nuna wakenmarin aepsauwaiti.

²⁷ Nuna tura nina patai ainan ashi Josué chicharuk: “Turattsa pachisar chichakrika antamunam tuke chichatia nuka nekarme. Yuus yamai turamaj nuka imatiksarik ashi umirkattaji, tusar taji nunaka ju kaya shuara numamtuk antawai. Tuma asamtai ju kaya wainkurum ika Yuus umirin armi tusarum tarum nu tuke aneasrumke atinaitrume”, tusa tinaiti.

²⁸ “Nuna tusa umik Josué nina patai ainan atumi nugken waketratarma”, tusa tinaiti. Tusa takai nita nugken wakettraruiti.

Josué Aarónkan uchiri Eleazarjai jakamtai kayanam ikusmau

²⁹ Nuna tura pujus chikich tsawantin Josué, Nun ajakua nuna uchiri Yuusa umirin ajakua nu, ciento diez uwí ejé jakauwaiti.

³⁰ Tuma jakamtai mura Gaas a nuna nujinmani nina nugke Timnat-seráh tutai Efraínkan nugken nain aina irunmaunam ikusaruiti.

³¹ Josué iwáku puju jakua nuigka israelita ainaka Yuusan umirujakaru ainawai. Tura nitan yayák wainchatai ainan nukap iwainarua nuna wainu jakaru apu aina pujujakarua nuisha, Yuusa nunak israelita ainaka umirujakaru ainawai.

³² Israelita aina Egipto nugkanam pujuina jiintrar wenak, José ukunchi ainan jukiar yaakat Siquemnum ikusaru ainawai. Nunaka Siqueman apari Hamor ajakua nuna nugken, Jacob cien kuitjai akikmak sumakua nui, ikusaru ainawai. Nu turamu asa nu nugka ajakua nuka José weantu ainan nugke jasuiti.

³³ Aarón ajakua nuna uchiri Eleazar jakauwaiti. Tumamtai Efraínkan nugken Fineesan susauwa nui nain aina irunmaunam ikusaru ainawai.