Josué 2 - New Testament with Old Testament portions

Yaakat Jericó nekaatarma tusa Josué jimar shuaran akupkamu

¹ Jordán entsanam katigkrum yaakat Jericó nekaatarma tusa, Josué jimar shuaran akupkauwaiti. Turamu asar Jericónam nuwa akika takatai Rahab naartinan jeen jeawar nui kanararuiti.

² Tuman Jericónmaya shuar aina nekaawar, israelita aina ina nugken nekaawartasa taawarai tusar nita apurin ujakaruiti.

³ Turam apu chichaak: Rahab iniasrum nu shuar aina achikrum utitarma, tusa nina suntaari ainan ishiakuiti. Turam jeawar chichainak: Israelita aina ina nugken nekaawartasa tawar amina jeemin pujuina nu, jukittsar taaji, tusa tuina. Tusar tuinakai,

⁴ Rahab uuk pujus ayak: Nuka nekasaiti. Jimar shuar wina irartuinak taawarmayi. Turasha tuiya shuartsuk arma nunaka nekachmajai.

⁵ Yaakta waitirin epenainatsaig wemii, tusar kiakai jiinkiar wearmayi. Turasha tuig wearma nunasha nekachmajai. Wári werum amaigkarum achiktarma, tusa tinaiti. Nunaka uuk pujus tsanumeak tinaiti. Takai weriar jiinki tusar yaakta waitirin epeniaruiti.

⁶ Nuwa Rahab naartin, trigo juuka irumra anatainam jea ukurin iwak uuk inaisauwati.

⁷ Apu akupkamu aina entsa Jordánnum jinta weakunam patatukaru ainawai. Nu patatuinai suntar aina wárimas jiintrar yaakta waitirin epeniaru ainawai.

⁸ Shuar nugkan nekattsa jeawaru aina nu kanuinatsaig Rahab jeanam yaki waka nitan chicharuk:

⁹ Ina nugken Yuus atumin amastatrum nuna nekajai. Tuma asar juiya shuar ainati atum ashamakur senchi sapijmainaji.

¹⁰ Egipto nugkanam pujarmin Yuus jiirmar nayants kapantu tutain ukuyua ikatiatmarua nu, amorreo ainan apuri jimar maawaitrum nusha antukmiaji. Tura ina nugkea juna atumin suramsatta nusha nekainaji.

¹¹ Nu antuku asar atumjai maanitka ashamainaji. Tumaina asar chikichkiksha atumjai maanikmi tusa tauka atsawai. Atumjai puja nuka, Yuus, nayaimpinam iruna nuna tura nugkanam iruna nunasha Yuusriyaiti.

¹² Wii atumin wait anentrajrum tumasrumek Yuusa naari pachisrum amina, tura amina pataim ainancha wait anentrartatjai takurum atumin waríri ikurtuktarma.

¹³ Tura wina apar, wina nukur, wina umaar aina, wina kair aina tura ashi nita patai ainajaimak tsagkurkarturum uwemtikarturtarma, tusa tinaiti.

¹⁴ Tusa takai nita aimainak: Ameka nu pachisam tukartatsminig, Yuus juna nugkan ina amasmataigka atumka shir anentam atatrume, tusa tiaruiti.

¹⁵ Rahab yaakta tanishrin ukurin jeamak pujau asa, naekan nenaa iimsatin chigkaimunam akaknaiti.

¹⁶ Tura chicharuk: “Kuamag werum tres tsawan uumkarum pujustarma. Tumarum atumin eatmainak wearma nu waketramtai atumsha waketratarma”, tusa tinaiti.

¹⁷ Tutai nita aimainak: “Ame ina seakratnum nuka imatiksarik umiktatji.

¹⁸ Turasha ii juiya shuar aina ijinattsar winakkrinka amina pataim aina, amina jeemin ashi irumram, ame naek nenaam akakratkittam nu amina jeemin nenata.

¹⁹ Nu tsawantin amina pataim jeemin pujutsuk aa wekaka mantamnattawai. Tumamtaisha ika makumashtatji.

²⁰ Ii amijai chichasaj ju pachisam chikich aina ujakaipa. Nu turawakminka ii amijai chichasaj nuka umikchattaji.

²¹ Tusa nina jeegka yaakta tanishrin ayaantsa jeamkamu asamtai, nina jeen iimsatin chigkaimu aunam naekan kapantun nenamtai akaikiar wearuiti. Tumawarmatai nina patai ainan, nina jeen ashi utsawaiti, tura israelita aina wininak wainkarti tusa naek kapantun ataksha nuig nenawaiti.

²² Nugka nekaatarma tusa akupkamu aina ikam umkar tres tsawan pujusaruiti. Tumaina asarmatai achikartasa weriaru ainasha wainkachar waketkiaruiti.

²³ Tumawarmatai nitasha waketkiar, Josué pujamunam tawar nita turunamun pachisar ashi ujakaruiti.

²⁴ Tura nu nugkan Yuus ina suramsatnun nekaina asar, nuiya shuar ainaka senchi ashamramarmaji”, tusar tiaru ainawai.