Jonás 4 - New Testament with Old Testament portions

Yuus Jonásan urukamtai kajekum tusa timau

¹ Yaakat Nínivenmaya shuar aina tunau takatan inaisaru ainawai. Tumawaru asarmatai, Yuus ijintsuk tsagkuurauwaiti. Tura asamtai Jonás senchi kajekuiti.

² Tuma Yuusan chicharuk: Yuusa, wina nugkarui pujai chichartakum: “Yaakat Nínivenmaya shuar aina tunaun shir pegkerchaun takainawai. Tumaina asarmatai cuarenta tsawan tsawaarmatai yaaktan emeseakun, shuar ainancha ashi ijinattajai, tusa Yuus tawai tusam ujakarta turutmame. Turasha wiki enentaimsan chichaakun: Yuuska senchi anegkratnapita, iman asampapi nitancha wait anentar ijintsuk inaisattawa tusan ame turutmaunka umitsuk, yaakat Tarsisnumani wea ai awagtukmame. Turuta asaakmin amina chichamrumin yaakat Nínivenmaya shuar ainan ujakarmajai. Turamu asar nuiya shuar aina tunau takatan inaisaru asarmatai,

³ Yuusa, ame timaun wii etserkamaj nu metek umikchau asaakmin, shuar aina wina pachittsar waittruayi tusar turutmain asarmatai, iwáku pujutan nakita asan, jakatjai tusan tajame”, tusa tinaiti.

⁴ Takai Yuus chicharuk: “Ame kajekum nuka pegkerchauwaiti”, tusa tinaiti.

⁵ Takai Jonás yaaktanmaya jiinkinaiti, tuma etsa watainmani numin tsupik aakmak nuna wakenmarin ekeemsauwaiti. Tuma ju yaaktan uruk emesratig tusa enentaima eketu.

⁶ Tuma eketun etsa senchi sukuak waitka asamtai, Yuus Jonásan wait anentrauwaiti. Tura asa mikintu amajsati tusa numin káshi tsapamtiknaiti. Turamun tsawaar Jonás wainak shir aneasuiti.

⁷ Turasha Yuus kashin tsawak numin maati tusa shunin akupkauwaiti. Turamu asa numin kagkapen yuruawaiti. Turamu asa numi nuke aina etsa sukuam kaakuiti.

⁸ Nuiyasha Yuus nasen tsueran akupkauwaiti. Turamu asa nase nasentuk senchi sukuam Jonás jamain nekapu. Tuma asa chichaak: “Wika iwáku pujutnaka nakitajai, antsu jakattsan wakerajai”, tusa tinaiti.

⁹ Takai Yuus Jonásan chicharuk: “Númi kaarmatai ame jakattsam wakeram nuka pegkerchauwaiti”, tusa tinaiti. Tama Jonás ayak: “Kajeku asan jakattsan wakerajai”, tusa tinaiti.

¹⁰ Takai Yuus chicharuk: “Ju númia juka ame arachmame. Antsu juka káshi nigki tsapaimayi, tuma ataksha káshi jakamayi. Tuma aisha ju númi aneakum senchi kajeku asam, jakattsam wakerame.

¹¹ Tura wisha nunisnak ju yaaktanam siento veinte mil shuar aina juwapita pegkerka, tura juwapita pegkerchauka tusa tutan nekainachu pujuina nuna senchi anena asan, tura tagku ainancha anena asan, yaaktan emeseakun ashi ijinattajai tusan timaj nunaka turashtatjai”, tusa Yuus Jonásan tinaiti.