Jonás 3 - New Testament with Old Testament portions

Nínivenmaya aina tunau takatan inaisaru asarmatai Yuus tsagkuramu

¹ Yuus Jonásan ataksha chicharuk:

² “Yaakat Nínivenam wetá. Tumam nuiya shuar aina, wina chichamur wii titatjam nu pachisam ujakarta”, tusa tinaiti.

³ Takai Yuus timaun umiak yaakat Nínivenam wuwaiti. Yaakat Níniveka shir uun ajakuiti, tumau asa weká wekakuar tres tsawan ejémain ajakuiti.

⁴ Jonás yaaktanam jeaa chikichik tsawan Yuusa chichamen wekas etseruk: “Ju yaaktan cuarenta tsawan jeamtai emesrattajai Yuus tawai”, tusa tinaiti.

⁵ Takai nuna antukar shuar eme anentsa iitai aina tura shuar eme anentsa iishtai ainasha nekas Yuus turattawapi tusar tuina. Tuina asar ii ainati tunau takat inaisamun Yuus nekartamatji, wake mesemar pujakur nugkutai jaanch nugkurar yurumak yutsuk pujusarmi, tusar tiaru ainawai.

⁶ Tura apusha chicham etsermaun antukuiti. Tuma jaanchin pegkeran nugkur eketmaurin awiik ikuak, wake mesemar pujaku nugkutain jaanchin nugkuruiti. Tuma aa jinki yuku amaunam pujusuiti. Nunaka ni tunau takatairin inaisamun iwainmamuk tumawaiti.

⁷ Tura apu nijai takau ainan chicharuk: “Yurumak yutsuk yamaika pujustatji. Tumatin asamtai shuar aina nita tagkuri ainancha ayuracharti tura entsankesha susacharti.

⁸ Antsu wake mesemar pujakur nugkutain jaanchin ashi shuar aina nugkurarti, tura nita tagkuri ainancha jaanch wake mesemar pujaku nugkutai ainajai nukukarti. Tumawar yurumkan yutsuk pujusar senchi untsumkar Yuusan aujsarti. Tumainak chiki chikichik shuar aina nita tunau takatairi ainan inaisarti.

⁹ Tumakrin Yuus ina kajertamak waittan amastaj tinu akusha ina tunaurin tsagkurtamar wait anentramar ijitmatsuk inaitamsachainjiash tawai tusarum ujakarta”, tusa tinaiti.

¹⁰ Tusa tiaram shuar aina tunau takatan inaisamun Yuus nekawaiti. Tura asa waittan susatjai tusa tinu akusha nita tunaurin tsagkurauwaiti.