Joel 3 - New Testament with Old Testament portions

Yuus shuar ainan waittan susatin pachisa timau

¹ Nu tsawan jeakai Judá weantu aina, Jerusalénnumia ainajai achira yaruakmau matsatainan ikankartinaitjai.

^2-3 Antsu shuar chikich nugkanmaya ainanka, nugka Josafat tutainam ashi iruumratnaitjai. Turan wii etegkamu israelita ainan achirar yaruakar chikich nugka ainanam napamkar yaruakaruiti. Tura nugke ainancha ninu amajsaru ainawai. Uchi ainancha antra inatai arti tusar kuitjai chikich nugkanam sururaru ainawai. Turawar kuitan jukiar vinon sumak umuinak nampenawai. Tura nuwa ainancha akikar takainawai, tumaina asarmatai waittan susartinaitjai.

⁴ Atum yaakat Tironam, yaakat Sidónnum, tura filisteo nugkanam matsamin ainatirminka wii etegkamu israelita aina nujai maaniawarti tusanka, pegkerchaunka atumnaka takarsachuitjarme. Ikmakmi tusarum nitajai eke maaniatsruminig, wiyaa atumnaka waittan susattajrume.

⁵ Atum ainatiram winau oro aina, plata aina, tura nuiyasha chikich warí akik aina tura pegker ainasha yaruakuitrume. Turarum atumi yuusri aina ememattasa iruuntai jeanam chumpiawaitrume.

⁶ Atum Judá weantu aina, tura Jerusalénnumia shuar ainasha achira yaruakrum, griego aina inatairi arti tusarum Grecia nugkanam suruku ainarme.

⁷ Atum surukmau asar yaja pujuinakaisha wii nitanka jiirtatjai. Turan nita waitka jakuitrum turusnak, atumnasha waittan wii amastatjarme.

⁸ Atumin uchiri ainan, atumi nawantri ainancha Judá weantu ainanam surukartatjai. Nuna turamtai nita jukiar Sabá shuar ainanam surukarti tusan turattajai. Nu taja nuka metek uminkattawai.

⁹ Juka chikich nugka ainanmasha etseratarma. “¡Suntar maanitan yacha aina nu untsukrum irumratarma! ¡Tumarum winitarma! ¡Yuus atumjai maaniattsa chichaman umikai!”

¹⁰ Atum takatai jiru aina nu, maaniaku jukitin, nagki aina najankatarma, tura shuar sapij aina nu, sapijmatsuk maanikta tusarum enentai ichichturtarma.

^11-12 Ashi shuar ainatiram Josafat nugkanam wári iruuntratarma. Shuar kakakchau, maanitan nakitin ainasha maanitan yacha jastatui. Tumawar ashi iruuntrarti, tumawakrumin Yuus atumin waittan suramsattarme.

¹³ Nu shuar ainaka shir pegkerchau ainawai. Árak aina juutka tsawan ashi jeawai, tuma asamtai trigo kakarmatai juumaina numamtuk amajkarta. Tura uva aina tsamakmatai juukar vino najanattsar najattaiya numamtuk amajkarta. Nita tunauri ainaka shir pegkerchau ainawai.

¹⁴ Yuus nugka Decisión tutainam taatin tsawan jeawai. Tuma asamtai shuar aina shir nukap nugka Decisión tutainam iruuntrarai.

¹⁵ Nantuka, etsajai kajinak káshi jastinaiti, tura ya ainasha etsantrachartin ainawai.

¹⁶ Nain Siónnum Yuus pujus kajek chichakai, nugka, tura nayaimpisha urkattawai. Turasha israelita ainanka Yuus ni etegkau asa ayamruk kuitamkattawai.

¹⁷ Nuna turamtai wii atumin Yuusriyaitaj nuna, nain Sión pegkera nui pujamu nekarattarme, Tura yaakat Jerusalénka wina anetairuiti. Tuma asamtai chikich shuar ainaka atakka wayawarka pegkesha waitkaschartin ainawai.

¹⁸ Yuus nina shuari ainan ijinamtai, nu tsawanta nui, uva aina shir nukap irunu asa, vino najankamu ainasha shir nukap irunu asa, tura vaca ainasha shir nukap irunu asamtai nuna muntsuri aina ijuraa juwamu asa, nainnum entsa pukuni jiinu iman atinaiti. Judá weantu nugkenka entsa shir nukap atinaiti. Tura wina jear jeamkamua nuiya entsa pukuni jiinki, Sitim nugkan ashi ukattinaiti.

¹⁹ Turasha egiptonmaya aina, tura Edonnumia shuar ainasha, Judá weantu ainan iturchattri atsaun ijinawaru ainawai. Turawaru asarmatai waittan susartatjai. Turamtai nita nugke ainaka shuar atsau aya nugkak jasartatui.

^20-21 Judá weantu jina aina nunaka, wii ikmatkattajai. Turasha israelita weantu aina nuka, Jerusalénnum tuke matsamtinaiti. Tura Judá weantu aina nuna nugkencha tuke matsamartinaiti. Tura wika yaakat Jerusalénnum nain Sión tutaiya nui pujuttajai, tusa Yuus tinaiti.