Habacuc 1 - New Testament with Old Testament portions

Yama nagkamchak Habacuc Yuusa urukamtai aminu ainatincha yaigkrattsum tusa timau

¹ Yuus chicham akattram etserin chikichik shuar Habacuc naartin puju jakua nu Yuusjai chichaak:

² “Yuusa, shuar magkartin aina nu, aminu ainatin mantamainak waitkarmainakai yaigkratkata tusan tuke untsu pujurjame, turasha ameka ii ainatinka yaigkrattsume.

³ Shuar aina pegkerchau amajainak waitkasarti tusam tsagkamram nuna nekamain nekapeatsjai. Magkartamu, yaakat aina tsayamu, jianiamu tura maaniamu aina nuka pegkesha agkatsui ashi nugkanam awai.

⁴ Chicham umiktina nunaka pegkesha uminatsui, tumaina asar shuar ainaka arantuniasarkesha inainatsui. Shuar tunaun takau aina nu, shuar tunaun takachu ainan waitkainawai, apu chichaman iwarin aina nusha chichamnaka metek iwarainatsui”, tusa Habacuc Yuusan tinaiti.

Habacuc timaun Yuus umiak shuar pegkerchau ainan waittan susamu

⁵ Tama Yuus chichaak: Chikich shuar aina urukainawak enentaimtusrum iistarma. Nitanka waittan wii suajai, nuna pachisar chikich aina ujatmainakaisha atumka nekaspapita tumain ainatsrume.

⁶ Babilonianmaya suntar pegkerchau asar, chikicha nugke ainan atankiar nitanu amajsartasa ashi nugkanam yujau aina nuna senchimtikawartatjai.

⁷ Nu shuar ainanka ashamainak kurain ainawai. Nitaka ememau asar pegkerchau ainan takainaksha, pegkerchauna takája tu enentaimchau ainawai.

⁸ Nita caballori ainaka uun yawa nagkasau senchi tseken ainawai. Uun yawa shuar atsamunam puju senchi kajen aina nuna nagkasau ainawai. Tura chuag jakau tepaun wainak yaki jeashat wekayat wárimas iyanna iman ainawai.

⁹ Babilonianmaya suntar ainaka nita weamunmagka shuari ainanka ashi ijinki wenawai. Tumaina asar pegkesha ashamkartuinatsui. Tura nita shuar achika yarumtai ainaka yaikim nukapea iman ainawai.

¹⁰ Iman asar apu ainanka tura chikich shuar eme anentsa iitai ainancha wishikainawai. Yaakat pegmarmau aina nunaka pegke imanchau iiyainawai. Yaikmin irumrar nui umak pujusar yaaktanam wayainawai.

¹¹ Nase senchi nasenteak númi ainan ijinna iman ainawai. Iman ainaksha nitak Yuusa iman anenmamaina asar pegkerchau wenawai.

Habacuc urukamtai yaintsum tusa Yuusan ataksha timau

¹² Apu, ameka Yuus pegkermaitme, ameka tuke pujuwaitme, ameka israelita ainati ememattaiyaitme. Ametme ii ainatin ayamkartinmeka, turasha yamaika ii pegkerchau takasu asaakrin waittan susarti tusam Babilonianmaya suntar aina senchirtin amajsaume.

¹³ Ameka shir pegkermaitme, iman asam pegkerchaun taká pujuarti tusamka wakerichuitme. Tura tunausha nakitnaitme. Tumau asam pachiskeka inaisaipa, nuiyasha shuar shir pegkerchau aina nu maawarti tusamka ii imanisa pegkerchau takachu ainatinka tsagkamkartukaipa.

¹⁴ Namak aina tura kuntin aina apuri atsurmau asa pachimnaik yujauwa numamtuk, ii israelita ainatinka amajkartusume.

¹⁵ Turukrata asaakmin namak neylonjai, turachkursha redjai achitia numamtuk, Babilonianmaya shuar ainaka ii ainatinka yupichu achirmainaji. Ina turutmaina asar nitaka shir anenawai.

¹⁶ Shuar namakramin aina, namakan nukap juuk irumraru asar nita redtri ainan, tura nita neylonri ainancha eme anentas iiyainawai. Turuinak tagku ainan maa epenak ajamnaiyainawai, nuiyasha inciensoncha epenawai.

¹⁷ Redjai namak achitia numamtuk, ¿Babilonianmaya shuar aina ina wait anentramtsuk mantamainaj nunaka tuke mantamak pujuartata? tusa Habacuc Yuusan tinaiti.