Génesis 8 - New Testament with Old Testament portions

Entsa nujagkrua kuyuamu

¹ Yuus Noénka ashi nijai arcanam chumpirainanka kajinmatkichuiti. Nutika asa nujagken ukuyuati tusa nasen akupkauwaiti. Turam nujag kuyutan nagkamawaiti.

² Tura yumi yutausha, tura nugkanmaya entsa jinainasha ashi nagkantrauwaiti.

³ Tumamtai nujag kuyutan nagkama ciento cincuenta tsawan ejé kuyuki wea asamtai,

⁴ siete nantu ejé nuiya diecisiete tsawan ejé, mura Ararat tutainam arca awamnaiti.

⁵ Tura diez nantua nuna yama nagkamchak tsawamunam mura ainan tsakari wantintrauwaiti.

⁶ Tura iimsatin chigkaimun cuarenta tsawan nagkamasmatai Noé urainaiti.

⁷ Nutika entsa urukawak tusa nekaattsa chuagkan jiiki akupkauwaiti. Turam entsa kuyua nugkan ukumati tusa weká asa, tatsuk tuke megkaakauwaiti.

⁸ Tumamtai entsa kuyuayash tusa nekaattsa, paumnasha akupkauwaiti.

⁹ Antsu paumka entsa kuyua nugkan ukumeachu asamtai, ni ekeemsa ayammaintrin wainkach arcanam ataksha waketki jeaamtai, Noé uwejen atsapti nui ekeemsamtai arcanam awayaawaiti.

¹⁰ Nutika siete tsawan nakas pauman ataksha akupkauwaiti.

¹¹ Turam kintamai olivon nuken apaku taawaiti. Turamtai kuyuawapi tusa Noé nekaawaiti.

¹² Tura siete tsawan nakas, pauman ataksha akupkauwaiti. Turam nuiyagka tachauwaiti.

¹³ Noé seiscientos uno uwí ején ai, entsa kuyua nugkan ukumawaiti. Tura yama nagkamchak nantua nuna achik yama nagkamchak tsawamunam, Noé arcan urainaiti. Tura iikma nugkaka entsa kuyuak ukumam aun wainkauwaiti.

¹⁴ Tura jimar nantua nui veintisiete tsawan jeaamtai, entsa kuyuak nugkan shir ukumawaiti.

Noé arcanmaya jinkimu

¹⁵ Tumamtai Yuus Noén chicharuk:

¹⁶ Yamaika ame, amina nuwem, uchiram aina, tura uchirmi nuwe ainajaimak jinkita.

¹⁷ Tumakum kuntin aina, nanamtin aina, tagku aina, japinas wekain ainasha jiirta. Nutikam ashi nugkanam shiakar pampagkarti, tusa tinaiti.

¹⁸ Tama Noé nina nuwe, nina uchiri, tura nina uchiri nuwe ainajaimak jinkinaiti.

¹⁹ Tura kuntin aina, tagku aina, tagkuchu aina, nanamtin aina, tura japinas wekain ainasha ashi jiintraruiti.

²⁰ Turam Noé Yuusan eme anentas iiyak tagku aina maa patasa epeatnun najanawaiti. Tura umik kuntin pegker ainan iis, tura nanamtin ainancha pegker ainan juki epeawaiti.

²¹ Noé turamun Yuus pegker enentaimtusuiti. Tura Yuus chichaak: Yamai nagkamsanka shuara tunaurin nugkanmaya ainan ashi ijinaj jutikashtinaitjai. Shuar ainaka uchichik nagkamsag tunau takatnaka enentaimtin ainawai. Tuma asamtai ashi kuntin ainan ijinaj jutikanka ijinashtinaitjai.

²² Nugka meseatsaigka arakmaka árak juutka nagkankashtinaiti. Tsetsek tepeamusha, seemamusha, asatcha, tsetsemamusha, yumi tepeamusha, tsawaisha, tura káshisha atinaiti, tusa tinaiti.