Génesis 6 - New Testament with Old Testament portions

Yuus shuar aina tunaun takaina asarmatai ashi ijinatjai tusa timau

¹ Shuar aina nugkanam pampagkar, nuwa ainan akigkaruiti.

² Turawarmatai nayaimpinmaya shuar aina, nuwa shiram ainan nita wakeramun iisar nuattraru ainawai.

³ Tumawarmatai Yuus chichaak: Shuar ainanka tunaun takau asarmatai tuke pujusarti tusanka tichattajai. Antsu ciento veinte uwí pujusarti, tusa tinaiti.

⁴ Nu shuar akiamu asar, nugkanmagka shuar nayau kakaram aina matsama jaku ainawai.

^5-7 Tura shuar tunaun senchi takaina asar, aya pegkerchaunak enentaimtuinan Yuus nekau asa, chichaak: Wii najankau ayatnak shuar wina umirtichu ainan, kuntin ainan, nanamtin ainan tura nugkanam japinas wekain ainancha ashi ijinattajai, tusa tinaiti.

⁸ Turasha Yuus Noénka shir enentaimtusa umirmau asa, wait anentrauwaiti.

Noé arcan takasmau

⁹ Noéka Yuus wakeramun takau asa, chikich shuar ainan nagkasau pegker ajakuiti.

¹⁰ Noéka tres uchin akiawaiti. Sem, Cam, Jafet, nu ajakaruiti.

^11-12 Shuar aina tunaun takaina asarmatai, nugkanmaya ainaka Yuus iismaka shir pegkerchau jasaruiti.

¹³ Tuma asamtai Noén Yuus chicharuk: Yamaika shuar matsata nunaka ashi ijinattajai, tura nita tunaurin shuar ainanka ashi ijinattajai.

¹⁴ Turatin asamtai númi gofer tutai aina nu ajakam, arca takasta. Tura tesakam entsa wayaawai tusam initkari, tura aanisha shir sakattrata.

¹⁵ Arca esanti: Ciento treinta y cinco metros, wagkanti veintidos metros y medio, tura yakintisha trece metros y medio,

¹⁶ tura tsaaptin atin jea awantamu nugkani medio metronam chigkarta. Nugkasha pujutai, ajapeencha pujutai, yakisha pujutai umikta. Tura arca yantamen chikichik waiti najanata.

¹⁷ Turawakmin ashi nugkanam matsataina nuna ijinattsan yumin yutumtikattajai.

¹⁸ Turasha aminka wii timajam turusnak uwemtikrattajme. Arcanmagka ame, amina uchiram, amina nuwem, tura uchirmin nuwe ainajaimak egkemattarme.

^19-20 Tumakum nugkanam ashi kuntin iruna nu, nanamtin aina, tagku aina tura japinas wekain aina nusha amijai metek iwáku juartin aishmag nuwajai jima jimarchik egkeawarta.

²¹ Tura ame yuatin, kuntin aina yuatnusha yutai ainaka ashi chumpiata, tusa tinaiti.

²² Yuus timaun turusag Noé umikuiti.