Génesis 50 - New Testament with Old Testament portions

¹ Tumamtai José úteak aparin pagkuk kugkuasuiti.

² Tuma nina inatairi tsuakratin ainan chicharuk: Iyash kaushtai tsuakjai, tura kugkuin aina nujai yakartarma, tusa tinaiti. Takai tsuakratin ainasha turusag umikaruiti.

³ Turamu asa cuarenta tsawan tepesuiti. Tura egiptonmaya aina setenta tsawan útiaru ainawai.

⁴ Tuma faraónkan jeen pujuinan José chicharuk: Atum winasha wait anentruru asaakrumin tajarme.

⁵ Wina apar iwáku pujus, wii jakamtaigka Canaán nugkanam ikursatin atá tusa turutin asamtai, nuna umiakun aparun Canaánnum ikusan taatjai turamui, tusarum faraón ujattruktarma, tusa tinaiti.

⁶ Tusa akattram shiakar faraónkan jeariar: José turammayi tusa ujam apari timaunka turusag ikustii, tusa tinaiti.

⁷ Timatai José aparin ikustasa weakai, apun inatairi aina,

⁸ Jacobon patai aina, tura José yachi ainajaimak ashi shiakaruiti. Tumainak uchi ainan, tura tagku ainan ikukiaruiti.

⁹ Tura carrete ainanam, caballo ainanmasha shuar aina nukap shiakaruiti.

¹⁰ Tumawar Jordánnum, etsa watainmani Goren-ha-atad tutainam jeawar, apari jakamun enentaimtusar siete tsawan útiaruiti.

¹¹ Tumainan Canaánnumia aina wainkaru asar, egiptonmaya ainaka patai jakamtaisha senchiapi earar iku ainawa, tusar nu nugkan Abel-misraim anaikaruiti.

^12-13 Jacobon uchiri ainaka Abraham Canaán nugkanam etsa watainmani Macpela a nui, wina ikumatair atii tusa nugkan, tura waancha sumakua nui ikursatarma tusa apari timaunka, turusag umikaruiti.

¹⁴ Turawar José nijai yujainajaimak Egipto nugkanam ataksha wakettraruiti.

José nina yachi ainan pegkernum chicharkamu

¹⁵ José yachi aina apari jakau asamtai, nitak enentaimsar chichainak: Yamaika ina aparigka jakayi, tuma asamtai ii kajerkar surukmau asa, incha kajertamkattaji, tusa tuina.

¹⁶ Tusar ina apari iwáku pujus chichartamuk:

¹⁷ Wait aneasam yatsum aina amina pegkerchau amajtamkaru ainakaisha, nita tunaurigka tsagkuurarta, tusa turammiayi. Turamin asamtai isha ina apari Yuusriya nu umirin asaakrin, wait aneasam tsagkurkarturta, tusar chichaman Josén akuptukaruiti. Turamun José antuk útnaiti.

¹⁸ Nuna tumai nina yachi ainasha jeariar tsuntsumruawar chicharainak: Yamaika ika ame inatairam artatji, tusar tiaruiti.

¹⁹ Tuinakai José nitan chicharuk: Ashamrukairpa, wika Yuuschauwaitjai tumau asan, atumnaka waittanka sumaitsujrume.

²⁰ Atumka winaka kajertakrum pegkerchau amajtuktasrum surutkau ainarme. Turasha shuar aina jinumainan yaigti turutu asa, Yuus pegkernum yainkauwaiti.

²¹ Turuta asamtai, ashamrukairpa. Atumnaka yutai ainan wiki ashi sutatjarme, tusa tinaiti. Nuna tusa takai shir aneasaru ainawai.

José jakamu

²² José nina yachi ainajai Egipto nugkanam pujusuiti.

²³ Joséka ciento diez uwí ején asa, Efraínkan tiragke uchirincha wainkauwaiti. Tura Manasésan uchiri Maquir akiamuncha wainkauwaiti.

²⁴ José nina yachi ainan chicharuk: Wika jakattajai. Turasha atumnaka Yuus yainmaktatrume. Turutmak juiya jiirmakiar, Abrahaman, Isaackan, tura ina aparin anajmatawa nuu nugkanam apujtamsattarme, tusa tinaiti.

²⁵ Tusa yachi ainan chicharuk: Yuus atumnaka nekas yainmaktinaitrume tajarme. Turutmakrumnasha wina ukunchrusha juig ikurtutsuk jukitin ataarma, tusa tinaiti.

²⁶ José Egipto nugkanam pujus, ciento diez uwí ejé jakauwaiti. Tumamtai iyash kaushtaijai yakararuiti. Turawar shuar jakau egketainam egkeawar ikusaruiti.