Génesis 49 - New Testament with Old Testament portions

Jacob nina uchiri ainan chicharkamu

¹ Jacob nina uchiri ainan untsuk ikaanmak chicharuk: Atak atina nuna pachisan ujaktajrume, wini tantatarma tusa takai aparin jeantaruiti.

² Tumawarmatai chichaak: Wii Jacobowaitiatan Israel naartinaitaj juna chichame antuktarma.

³ Rubénka ametme iwairimka: Tumau asam amina yatsum aina nagkasau pegker, tura senchirtinaitme.

⁴ Turasha ameka entsa tsukatna numamtuk shir enentaimchau asam, wina chikich nuwarjai pujusuitam nui, imanka achatnaitme.

⁵ Simeónkan Levíjai chicharuk: Mai metekmamtinak asarum, iturchat akaisha esetsuk tuke maani matsamtin ainarme.

⁶ Atumka shuar aina kajerakrum, tura tagku ainasha kagkaji tsupiru jaku asaakrumin, jakancha atumjaigka pegke iruuntrashtinaitjai.

⁷ Atumka pegkerchau asaakrumin pegkerchaunam chicharkattajrume. Turamu asarum Israel nugkanmag iruuntsarum matsamtsuk kanaarum yujatin ainarme.

⁸ Judán chicharuk: Amina yatsum aina emematramiartin ainawai. Shuarum ainaka ame nepettinaitme.

⁹ Wina uchir Judáya ameka uun yawa uchiri, namagken yua ejémar ayameak tepena numamtuk ayamratnaitme. Amina nepettammainka pegke atsawai.

¹⁰ Ushukrutai orojai najanamu ame takakam aunka atantramkichartin ainawai. Imanismek pujamin Yuus akupkamu taamtai shuar aina nuna ashi anturaina asamtai ikuktinaitme.

¹¹ Arak uva tutaiya nuna naekrijai burron uchirin jigkak nuna kampuinig jigkatnaiti. Nina nugkutairincha uvan yumirijai nijatnaiti.

¹² Nina jiigka uva yumiri ijuraamun nagkasau mukusa jas ekeemtinaiti. Naigka muntsu pujua iman jastinaiti.

¹³ Zabulónkan nugkegka nayantsa yantamen barco aina pemtainam juki Sidón nugkanam nagkankatnaiti.

¹⁴ Isacarka burro senchirtina numamtinaiti. Tagku nina wenuken pujuina numamtuk pujutnaiti.

¹⁵ Nigka ayamaintrin nugka pegkeran wainkau asa, nina apuri inamsha nakittsuk takartinaiti.

¹⁶ Israel shuar ainan inatna numamtuk, Danka ni shuar ainan apuri jastinaiti.

¹⁷ Danka nápi jinta nakamak tepes, caballo nagkamaun nawenam asai nui entsatkauncha ajumaina numamtuk, nina shuari ainan nepetin atinaiti.

¹⁸ Yuusa, wika uwemtikrurta tusan amina nakajme.

¹⁹ Suntar aina Gaadjai maaniawartinaiti, turamsha ni nepetmaktinaiti.

²⁰ Aseran pankrigka shir nukap atinaiti, iman asamtai apu ainancha antrag sutinaiti.

²¹ Neftalíka jápa agkan wekaina numamtinaiti, tura uchiri ainasha jápa uchiri pegkera numamtin ainawai.

²² Joséka númi entsa yantam wajas nukap nerek jigkai kakek tsapauwa numamtinaiti.

²³ Josénka kajerainak maawartasa tuke waitkasartinaiti.

²⁴ José weantu ainaka senchirtin artinaiti. Tura Yuus yayámu asar, nita chichamesha imanuk artinaiti.

²⁵ Amina Yuusrum ashi senchirtina nu pegkernum yainmaktinaiti. Turutmak atsumtsuk pujusti tusa nayaimpinmaya pegker ainan, nugkanmaya pegker ainan, entsanmaya pegker ainan, tura uchiram weantu ainancha turusag pegkeran suramsatnaiti.

²⁶ Wika aminka wina uuntur aina pegkernum chichartukaru aina nuna nagkasau tuke atinan, pegkernum chicharkaujme. Turamu asam amina yatsum aina ju nagkasau atinaitme.

²⁷ Benjamínka uun yawa yukartina imanaiti. Káshikmas namagken yutinaiti, ampintrau ainan agkuantai tinamtinaiti.

²⁸ Israel nina uchiri doce ajakarua nuna, nita matsamsatnun pachis pegkernum, tura pegkerchaunmasha chicharkauwaiti.

Jacob jakamu

^29-30 Tura nitan chicharuk: Wika jakattajai, tumamtaisha Abraham Canaán nugkanam etsa watainmani Macpela a nui wina ikumatair atii, tusa nugkan, tura waancha sumakua nui ikursatarma.

³¹ Abraham, Sara, Isaac, Rebeca, tura Leasha nu nugkanmag ikuntsaru ainawai.

³² Nu nugkanka, tura waancha Het shuarnaun Abraham sumakuiti, tusa tinaiti.

³³ Jacob uchiri ainan ashi chicharak umik jakauwaiti.