Génesis 48 - New Testament with Old Testament portions

Jacob José uchiri ainan pegkernum chicharkamu

¹ Chikich tsawantin shuar aina Josén taruawar ujainak: Amina apa yamaika jawai, tusar tiaruiti. Tama Josésha nina uchiri Manasésan, tura Efraínkan juki wuwaiti.

² Tuma jeaamtai shuar aina Jacobon chicharainak: Amina uchiram José iirmastasa taayi, tusa tuina. Tama jak tepayat nantaki ekeemsauwaiti.

³ Nunik Josén chicharuk: Yuus ashi senchirtina nu, Canaán nugkanam yaakat Tsaaptin tutainam wantinturak pegkernum chichartak:

⁴ Wii aminka nukap uchirtin amajsattajme, amee weantu ainaka nukap pampagkartinaiti. Tura nukap yaaktamkartin ainawai, tumawarmatai ju nugkanka nitanuk atii tusan susartinaitjai, tusa turutnaiti.

⁵ Turutin asamtai Egipto nugkanam wii taatsaig uchi jimar akiawaitam nunaka, wina uchir Rubén, tura Simeón aina numamtuk amajsarjai.

⁶ Antsu chikich akigtatam nu aminuka artatui. Nu aina nita yachi aina jumainnaka jukiartatui.

⁷ Padán-aramnumia waketkin Canaánnum taattsan winai amina nuku Raquel jakamtai, Efrata jintanam ikusuitjai. Tura nu yaaktanka yamaika Belén anaikaruiti.

⁸ Jacob José uchiri ainan wainak: ¿Jusha yana uchiri ainawa? tusa tinaiti.

⁹ Takai José aparin ayak: Juka wina uchir ainawai. Egipto nugkanam pujai, Yuus surusmau ainawai, tusa tinaiti. Tama apari chichaak: Wait aneasam uchi imajai itantarta pegkernum chicharkartajai, tusa tinaiti.

¹⁰ Jacobka shir untach jasu asa jiisha kusuru asamtai, José nina uchiri ainan juki aparin ejéntauwaiti. Turamtai tiragke ainan pagkuk kugkuasuiti.

¹¹ Tura chichaak: Josén wainkatnapitja tuka enentaimchamiajai. Turasha Yuus amina uchirmincha wainmamtikrukai, tusa tinaiti.

¹² Timatai José nina uchiri ainan emenan aparin tsuntsumruawaiti.

¹³ Tuma uchiri ainan mai achik, Efraínkan untsurnumani, tura Manasésan menanmani achik juki apari menarini apujeak, Manasésan apari untsuruini apujsauwaiti.

¹⁴ Turasha Jacob untsur uwejejai Efraínkan achiak iwairin Manasésan menarijai muuknum achikuiti.

¹⁵ Tura Josén pegkernum chicharuk: Wina apachur Abrahaman, tura wina apar Isaackan Yuusriya nu, wii akinawaitaj nui nagkamas yamaiya juisha kuitamra nu,

¹⁶ tura nayaimpinmaya shuar, pegkerchau ainanmasha ashi agkanmamtikartina nusha ju uchi ainanka pegkernum chicharkati. Turamu asar winasha, wina apachur Abrahamnasha, tura wina apar Isaacnasha pachis tuke chichau arti. Nukap uchirinawarti, tumainak nukap pampagkartin arti, tusa tinaiti.

¹⁷ Turasha Joséka Efraínkan untsur uwejejai muuknum achikun wainak, shir aneaschauwaiti. Tumak apari uwejen achirak juki uchiri iwairin Manasésan muukeen achimtikak

¹⁸ aparin chicharuk: Apaachi iwairigka juwaiti. Untsur uwejmijaigka ju achikta, tusa tinaiti.

¹⁹ Tama Josén chicharuk: Jusha nukap pampagtina nunaka uchiru nekajai. Turasha yachi ekeuwa ju nina nagkas shir nukap pampagtinaiti.

²⁰ Tusa Jacob Efraínkan Manasésjai pegkernum chicharuk: Israel shuar ainaka atum pegkernum chicharnakmaun pachisar chichainak: Yuusa, Ame Efraín, Manasésjai pegkernum yaigkuitam turusmek yaigkratkata tiartin ainawai. Jacob Efraínkan Manasésan nagkasau amajsauwaiti.

²¹ Tusa Josén chicharuk: Wika jakattajai, turasha atumjaigka Yuus pujuttawai. Tuma asa atumi uuntri matsama jakmaunmag awagtamkitnaittrume.

²² Amorreo ainan nepetkan, Siquem nugkan yatsum ainanun inagkasan amajai, tusa tinaiti.