Génesis 46 - New Testament with Old Testament portions

Jacob Egipto nugkanam wemau

¹ Jacob ninu ainan ashi yaruak, wea weakua Berseeba nugkanam jeawaiti. Tuma nina apari Isaackan Yuusrin eme anentas iiya asa tagku ainan maa epeawaiti.

^2-3 Nui kanittamaun Yuus káshi chicharuk: Israela wika amina apan Yuusriyaitjai. Amee weantu ainanka nukap napamkartatjai. Turatin asamtai ashamtsuk Egipto nugkanam wetá.

⁴ Ame Egiptonam weakmincha wii uyuntsattajme. Tura amee weantu ainanka ataksha wiki awaigkiartinaitjai. Tura ame jakaakmincha José ikurmastinaiti, tusa tinaiti.

^5-7 Timatai Jacob Egipto nugkanam weak: Uchiri ainan, nawantri ainan, tiragke aishmag ainan, tiragke nuwa ainan, carretenam chumpiawaiti. Tura vaca ainan, oveja ainan, tura Canaánnum pujusa warírinamu ainanka ashi yaruakuiti.

Jacob weantu Egipto nugkanam shiakaru pachisa timau

⁸ Israelan uchiri Egipto nugkanam shiakaru aina nuna naarigka ju ainawai: Jacob tura nina uchiri ainajai. Jacobon uchiri iwairigka Rubén ajakuiti.

⁹ Rubénka uchiri aina nuka: Hanoc, Falú, Hezrón tura Carmi nu ajakaruiti.

¹⁰ Simeónka uchiri aina nuka: Jemuel, Jamín Ohad, Jaquín, Zohar tura Saúl Canaánnumia nuwanam akinawa nu ajakaruiti.

¹¹ Leví uchiri aina nuka: Gersón, Quehat, Merarí nu ajakaruiti.

¹² Judá uchiri aina nuka: Er, Onán, Sélah, Fares tura Zérah nu ajakaruiti. Turasha Er, Onánjai Canaán nugkanam jakaru ainawai. Tura Faresa uchiri aina nuka: Hesrón, Hamul nu ajakaruiti.

¹³ Isacaran uchiri aina nuka; Tolá, Fúa, Job tura Simrón nu ajakaruiti.

¹⁴ Zabulónka uchiri aina nuka; Séred, Elón, Jaheel nu ajakaruiti.

^15-25 (-)

²⁶ Jacobjai Egipto nugkanam wearu aina nuka, nina uchiri nuwe aina nekapmatsuk, aya ni weantu ainak sesenta y seis shuar ajakaruiti.

²⁷ José Egiptonam pujus jimar uchin akiawaiti. Tura asamtai Jacob, tura Joséjaimak setenta jasaruiti.

²⁸ Jacob Gosén nugkanam jeattak wesa, Gosén nugkanam José igkunkati tusa Judán akupkauwaiti. Turam Judá Egiptonam jeaa Josén ujakuiti.

²⁹ Turam José nina inatairi ainan chicharuk: Carrete iwarturatarma aparun igkugtajai, tusa tinaiti. Takai inatairi ainasha carreten iwararuiti. Turawarmatai aparin igkugtasa Gosén nugkanam wuwaiti. Tuma igkug aparin pagkuk útnaiti.

³⁰ Tura Israel uchirin chicharuk: Yamaika wainkajme tuma asan jaknasha shir aneasan jakattajai, tusa tinaiti.

³¹ José nina yachi ainan, tura apari patai ainancha chicharuk: Faraónkan werin wina yatsur aina, tura wina aparu patai aina wijai pujusartasa Canaánnumia kaunkarai tusan ujaktajai.

³² Turakun nitaka tagkun kuitamin asar, oveja ainan, vaca ainan, tura nitanu ainanka ashi yaruakar ikaankarai, tusan ujaktajai tinaiti.

^33-34 Atumin faraón untsurmak: Atumsha wari takau ainarum tusa ininmakaigka: Ika ina uuntrisha ovejan kuitamajakaru asarmatai, isha turusrik oveja kuitamin ainaji tusarum titarma. Takurminka egiptonmaya ainaka ovejan kuitamin ainanka nakitin asarmatai, Gosén nugkanam pujustarma turamtatrume, tusa tinaiti.