Génesis 45 - New Testament with Old Testament portions

José wika atumi yachiyaitjai timau

¹ Tama José útmain nekapu asa nina inatairi ainan chicharuk: ¡Juiyagka ashi jiintratarma! tusa tinaiti. Takai inatai ainasha jiintraruiti. Tumawarmatai nui juak wika atumin yachiyaitjai, tusa tinaiti.

² Tusa senchi útnaiti. Tuman egiptonmaya aina antukaruiti. Tura faraónkan jeen pujuinancha ujakaruiti.

³ José yachi ainan chicharuk: Wika Joséyaitjai. ¿Aparsha pujumka? Tusa takai senchi ashamkar aikcharuiti.

⁴ Tumainakai José nina yachi ainan chicharuk: Wait aneasrum wini tantatarma tama jeariaruiti. Tumawarmatai chicharuk: Atumi yachi Joséyaitjai. Atum winaka Egipto nugkanam surutkauwaitrume.

⁵ Turuta akurmesha wait aneasrum wake mesemar enentaimirpa. Tura makumattajipi tu enentaimirpa. Atumka suruttsurminig, tsuka tepeatnun Yuus nekau asa, winaka juni akuptukuiti.

⁶ Tsuka tepeamu jimar uwí jeayi. Turasha tsuka tepea ju nagkamastinka cinco uwí juakai. Nu uwítin árak aramsha tsapaichartatui.

⁷ Tsuka tepeatin asamtai trigo irumnarti, tura tsuka tepeamtaisha shuar ainaka nuna yuina asar pampagkarti tusa, atumka suruttsurminig Yuus winaka nekarawaiti.

⁸ Turuta asa faraónkan apariya numamtuk amajtus, tura faraónka jeen irunun kuitamin atii tusa, egiptonmaya ainan apuri amajtusuiti.

⁹ Wári waketkirum ina apari ujakrum, amina uchiram José chichaak: Yuus winaka egiptonmaya ainan apuri amajtusuiti. Turuta asamtai megkaatsuk wári taati turammayi, tusarum ujattruktarma, tusa tinaiti.

¹⁰ Nina uchiri ainan, tiragke ainan, tagkuri ainan, tura ninu ainanka ashi yaruak Gosén nugkanam tiijuch pujusti.

¹¹ Tumamtai patai ainan, tura ninu ainanka tsukai waittsarai tusan yutai ainan susartatjai. Tsuka tepea ju nagkamastinka cinco uwí juakai, tusa José turammayi tusarum ujattruktarma, tusa tinaiti.

¹² Wii atumjai chichaamunka, wina yatsur Benjamínsha waitkayi.

¹³ Tuma asarum Egipto nugkanam apu jas pujumai, tura atum jui wainkaurum nu pachisrum ashi ujaktarma. Wári werum wina apar itaatarma, tusa tinaiti.

¹⁴ Tusa José nina yachi Benjamínjai pagkunaikar útiaruiti.

¹⁵ Tura yachi chikich ainajaisha pagkunaik útiaruiti. Tumawar Joséjai shir chichasaruiti.

¹⁶ José yachi aina kaunkarai tamaun faraón antuk, nijai takau ainajai shir aneasaruiti.

¹⁷ Tuma faraón Josén chicharuk: Amina yatsum aina, burrorin yutain aentskar Canaán nugkanam wakettrarti.

¹⁸ Tumawar apan, tura pataim ainancha jui ikaankarti. Turawarmatai Egipto nugkan pegkeran susartajai, tura yutaincha pegker ainan susartajai.

¹⁹ Nuwe ainan, uchi ainan, tura nita aparincha jukiar jui itaawarti tusam carrete aina susam akupkarta.

²⁰ Nitanu ainan ikuinaksha wake mesemar enentaimcharti. Nita ikukmaurin nagkasau Egipto nugkanam ariartatui, tusa tinaiti.

²¹ Tama carrete ainan, jinta wesa yuatnun,

²² yapajmamatnun nugkutai ainan chiki chikichik susaruiti. Antsu Benjamínnaka trescientos kuitan, tura nugkutaincha cinco susauwaiti.

²³ Tura warí ainan, trigo ainan, jinta winisa yuatnuncha pan ainan veinte burro ainan aentskar

²⁴ aparin akuptak, yachi ainan chicharuk: Jinta wesarum kajernaikairpa, tusa tinaiti.

²⁵ Egiptonmaya jiinkiar, Canaán nugkanam nita apari pujamunam jeawaruiti.

²⁶ Tumawar José wainkamji. Nigka egiptonmaya ainan apuri jas pujumai tusar aparin ujakaruiti. Tuinakaisha nekaspapi tuinawa tichauwaiti.

²⁷ Turasha José timaun imatiksag ujakaruiti. Turuinak amina juramkitnun carrete ainan José akupturmakmai tusa tamaun nisha nuna wainak, uchir pujau asampapi juna akupturaya tusa shir aneasuiti.

²⁸ Tuma chichaak: Wina uchir nekas iwáku pujawapi, tuma asamtai iwáku pujaj juik wena wainkatjai, tusa tinaiti.