Génesis 43 - New Testament with Old Testament portions

Benjamín Egiptonam jukimu

^1-2 Ashi nugkanam tsuka senchi tepea asamtai, Egipto nugkanmayan nita trigo sumakmau amuwakai, Jacob uchiri ainan chicharuk: Ataksha trigo sumakrum utitarma, tusa tinaiti.

³ Takai Judá ayak: Apu ina chichartamuk: Yatsum ekeu juki itachkurmeka juigka taawairpa, tusa turammaji.

⁴ Tinu asamtai ame Benjamín akupeakminka trigo sumaktasar wetatji.

⁵ Apu ina chichartamuk: Yatsum ekeu itaachkurmeka juigka taawairpa tusa turammaji. Ame yatsur akupat nakitakminka wechattaji, tusa tinaiti.

⁶ Takai Israel chicharuk: ¿Urukamtai nu apusha, ina yachi chikitcha aruttramji tusarmesha ujakmarme? Nu atum tiirum nui winaka pegkerchau enentaimtikrarme, tusa tinaiti.

⁷ Takai nita chichainak: Isha ujamainchau ayatar ina patai ainan pachis, apasha pujawak, atumi yachi chikitcha pujawak tusa ininmakrin, tura atumi yachi itaatarma tusa turamtinka nekachu asar, ujakmaji tusa tiaruiti.

⁸ Tusa Judá nina aparin Israelan chicharuk: Yatsurka wijai akupkata. Turachkuminka amijai, ashi ina uchiri ainajaimak tsukai jinaattaji.

⁹ Yatsurnaka wii kuitamattajai. Antsu wii ataksha jui itachmataigka ame pegkerchau chicharam atajai, tusa tinaiti.

¹⁰ Ame ju surima pujachkuminka ika yutai sumakar jimaraa tamain jainaji, tusa tinaiti.

¹¹ Takai Israel nitan chicharuk: Chikich turumainka atsawai, ina nugkenia árak pegker kugkuin bálsamo tutai, miel, perfume, mirra, nueces, tura almendra aina nu jukirum apu susatarma.

¹² Yutai sumaktin kuit jukitarma. Tura atum akikmakmaurmin kajinmatki awaigki egkeachmashi nusha ejétirum susatarma.

¹³ Yamaika Benjamín jukirum apu pujamunam wetaarma.

¹⁴ Yuus ashi senchirtina nu atumin wait anentrati tusa apun pegkernum enentaimtikrati. Turamtai atumi yachin emetamtai, ikuki tamarum nunasha awagturmakmatai, ju yatsum Benjamínnasha emettsuk akupkamtai iruuntsarum taatarma. Uchirtinchau juakti timau akunka uchirtinchau juaktajai, tusa tinaiti.

¹⁵ Takai Jacobon uchiri aina, apu aantra susatin ainan, kuitan, tura Benjamínnasha jukiar Egiptonam jeawaruiti.

José nina jeen yachi ainan jukimu

¹⁶ Tumawarmatai José iikma Benjamínkan wainak, nina jeen takaun chicharuk: Ju shuar aina juka wina jearui yaruakta. Turam vaca pegker iisam maam inarkam umikta, etsa tutupin jasmatai nitajai iruuntran yuatjai, tusa tinaiti.

¹⁷ Tama inataisha José timaunka imatrusag umiak shuar ainan yaruakuiti.

¹⁸ Turasha sapijmaina asar nitak chichainak: Inka kuitan kasamkaru, tusa ina tagkuri ainajai yarurmak nina inatairi amajtamkattsa jutikramaji, tusar tuina.

¹⁹ Tuina asar jeagka waitsuk José inatairin aujainak:

^20-22 Apu, ika nuik taar trigo sumakar, wakettsar jinta kanartinnum jear ina sacori atiar iiyajkamar, trigo sumakur akikmakmauka kuit imanisag egketu wainkamji. Nunasha yatsuk egkeaya nuka nekatsji, tuma asar awaigkimi tusar itaji. Tura trigo sumaktincha itaji, tusar tuina.

²³ Tuinakai inatai chichaak: Tusarum sapijmairpa. Atumin, tura atumin apari Yuusriya nu, atumi sacormin egkeayi. Atum yutai sumakrum akikmakmaunka wii jukimiajai tusa Simeónkan cárcelnum egketun jiiki nita matsatmaunam itawaiti.

²⁴ Tura José jeen utsaa naween nijakarti tusa entsan shikik susaruiti. Tura burrori ainancha ayurtukuiti.

²⁵ Etsa tutupin jasmatai José nitajai yurumkan yuatnun nekaawaru asar, nita itaamurin Josén susartasa nakaa iruuntuina.

²⁶ Tuma irunai José nina jeen jeawaiti. Tumamtai nita itaamuri ainan susar tsuntsumruawaruiti.

²⁷ Turasha José nitan iniak: ¿Atumi patai ainasha matsammaka? Atum wina ujatkurum ina aparigka unchiti turutmarum nusha yamaikisha pujawak, tusa tinaiti.

²⁸ Takai nita chichainak: Ee, ina aparigka pegker pujumayi tusar tsuntsumruawaruiti.

²⁹ Tumainakai José ashi iistajkama nina nukuri jurermaun Benjamínkan wainkauwaiti. Tura chichaak: ¿Atum wina ujatkurum ina yachi ekeu pujumai turutmarum nu jukait? tusa tinaiti. Tusa Benjamínkan chicharuk: Uchiru, Yuus pegkernum yainmakti, tusa tinaiti.

³⁰ Tusa útmain nekapeak kanutairin wári wayaa shir aneak útnaiti.

³¹ Tuma entsan juki yapin nijar jiinki inatairin chicharuk: “Yurumak mesanam ekentrata”, tusa tinaiti.

³² Tama inataisha José yuatnun, tura José yachi ainanka chikich mesanam eketainak, egiptonmaya ainancha turusag ekettraruiti. Nunaka hebreo ainaka, egiptonmaya ainajai iruunturar yuchau asarmatai turawaiti.

³³ José nina yachi ainan emkaunam nagkama eke ekenkauwa inagnamun Benjamínkan ekettsauwaiti. Turamu asar ¿urukamtaig jutikramaj? tusar inaina.

³⁴ Tura José nina mesarin yutai ekentramun nina yachi ainan susaruiti. Turak Benjamínkan ima nukap susauwaiti. José nina yachi ainajai yua, tura umar shir aneasuiti.