Génesis 41 - New Testament with Old Testament portions

Faraón karanam wainkamun José nekaamu

^1-4 Jimar uwí nagkamasa ai, faraón siete vaca pegker nuweram aina, entsanmaya jiintrar chirichirin yuinak irunun, chikichka siete vaca watsaku tsumain aina jinar vaca pegker nuweram ainan yuinan karanam Nilo entsan yantamen wajas wainu tepau shintaaruiti.

^5-7 Tuma ataksha kanar: Chikichik trigonmag siete trigo pegker aina nerekar irunmaunam, chikichka siete trigo tsererach kaaku aina tsapainiar trigo pegker ainan ijinun karanam wainu tepau shintaar, karanma tu wainaj, tusa tinaiti.

⁸ Tuma wake mesemar nekapu asa, tsawaar nina inatairi ainan: Werum yacha aina, tura nekamin aina, Egiptonam matsata nu yaruakrum ashi ikaatruktarma, tusa tinaiti. Takai weriar ikaankarmatai ni karanam wainkamun pachis nitan ujakuiti. Turasha chikichkiksha pegke nekacharuiti.

⁹ Turawarmatai faraónkan umutain ajamin chichaak: Wii kajinmatkimurun yamaika anearjai.

¹⁰ Apu ame kajerkartukam, cárcelnum jimar shuartin egkekratamiam,

¹¹ nui pujusar ii turunatin káshi karanam wainkamiaji.

¹² Tura shuar achikmau ainan kuitamin hebreo shuar pujau asa, ii karanam wainkamun nekartamamiaji, tusa tinaiti.

¹³ Ni timauka imanisag uminkauwaiti. Wika takatur ajakmaunmak wayaawaitjai. Antsu chikichnaka suwenam jigkaa numinam nenaawar maawaruiti, tusa tinaiti.

¹⁴ Tama faraón, José jukirum itatarma tusa nina suntaari ainan akuptukuiti. Turam achikam egketun jiikiaruiti. Turam susurin awar, jaanchin yapajmamamtai jukiar faraón pujamunam ejéniaruiti.

¹⁵ Turawarmatai faraón, Josén chicharuk: Wii karanam wainkaj nuna ujatmain atsawai. Turasha amina pachitmasar karanam wainkamun nekau, tusa turamainakai untsukjame, tusa tinaiti.

¹⁶ Tama José faraónkan ayak: Apuru wichauwaitjai, antsu ame karanam wainkamunka Yuus nekamtikramattawai, tusa tinaiti.

^17-21 Tama faraón Josén chicharuk: Siete vaca nuweram pegker aina entsanmaya jiintrar chirichirin yuinak irunun, chikichka siete vaca watsaku tsumain aina jiintrar vaca nuweram pegker ainan yuinan karanam Nilo entsa yantamen wajasan wainu tepaun shintaarmajai.

^22-24 Tuman ataksha karanam: Chikichik trigonmag siete trigo pegker aina irunmaunam, chikichka siete trigo tsererach kaaku aina tsapainiar trigo pegker ainan ijinun karanam wainkau asan, ujatkatarma tusan nekamin ainan ujakarmajai, turamsha nekacharmayi, tusa tinaiti.

²⁵ Tama José faraónkan ayak: Ame karanam wainkaum nuka mai nuketi. Yuus ni turatnurin iwainturmakai.

^26-31 Siete vaca nuweram pegker aina, tura chikichik trigonmag siete trigo pegker ainajai wainkaum nuka, Egipto nugkanam siete uwí yutai nukap atin wainkaume. Antsu siete vaca watsaku tsumain aina, tura siete trigo tsererach kaaku ainajai wainkaum nuka, siete uwí tsuka tepeatin wainkaume. Tsuka tepeamtai Egipto nugkanam tuke puju ainasha senchi waittsartinaiti. Nunaka Yuus ni turatnurin iwainturmakume.

³² Apuru, nunaka wári uminkatnun Yuus iwainturmakume.

³³ Turatin asamtai apuru, Egipto nugkan iistin shuar shir enentaimkau etegkam apujmainaitme.

^34-36 Tura tsuka tepeamtai shuar ainan susartinan irumrartin ainasha etegkawarta, turam nita Egipto nugkanam yujasar siete uwí trigon juukartata nuna cinco saconam jukarka chikichik sacon akanak jukiar jeanam irumrarti tusam apuru ame titá. Nu turunamtaigka Egipto nugkanam siete uwí tsuka tepeatta nuisha shuar ainaka waittsachartatui tusa, José faraónkan tinaiti.

José Egiptonmaya shuar ainan apuri jasmau

³⁷ Tama faraón nina inatairi ainajai Josén senchi wakerukaruiti.

³⁸ Faraón nitan chicharuk: Ju shuaran Yuusa Wakaní pujura imajuka shuar chikichka atsawai, tusa tinaiti.

³⁹ Tusa Josén chicharuk: Yuus junaka ashi nekamtikramayi, turutma asamtai ame nekam imauka chikichka atsawai.

⁴⁰ Tuma asamtai ame wina jearui pujuina nuka inarta. Tura wina yaktarui shuar pujuina nusha ashi umirtamkarti. Antsu wika faraón asan amina nagkasau atatjai, tusa tinaiti.

⁴¹ Tusa Josén chicharuk: Ashi Egipto nugka juna apuri atá tusan amina apujsajme.

⁴² Nuna tusa faraón nina uwejen anillo sellortinan patakemamun ukuinak Josén patakeawaiti. Tura jaanch pegkeran anugkar, suwenam nugkutaincha orojai najanamun anugkrauwaiti.

⁴³ Nutika umik nina chikich carretarin ekennaiti. Tura ni emak weakai José ukunam wuwaiti. Tumakai chikichik shuar emak wesa senchi chichaak: Faraón winawai jinta agtuatarma, tusa tinaiti. Josénka tu apu amajsaru ainawai.

⁴⁴ Tura faraón Josén chicharuk: Wii faraón asan tajame, egiptonmaya ainaka amina chichamrumin ashi umirtamkarti, tusa tinaiti.

⁴⁵ Tusa faraón Josén Safnat-panéah anaikauwaiti. Tura Potifaran nawantri Asenat naartinjai nuwemtikawaiti. Potifarka yaakat Ontan sacerdoteri ajakuiti. José Egiptonmaya shuar ainan apuri jasuiti.

⁴⁶ Josénka treinta uwí ejé pujaun, Egiptonmaya apu pujamunam ejéniaru ainawai. Turam faraónkan aujas ikuki, Egipto nugkanam yaakat irununka wekatus ashi iisuiti.

⁴⁷ Arak shir nukap nereamu siete uwí asauwaiti.

^48-49 Tuma asamtai shuar aina arakan juwainakai akanar yaruak, yaakat ainanam, trigon yaikim nekapmamainchauwa iman nukap irumrauwaiti.

⁵⁰ Tsuka tepeatsaig José jimar uchin akiawaiti.

⁵¹ Tura waittsamurun tura pataar ainancha Yuus kajinmamtikrukai, tusa iwairinka Manasés anaikauwaiti.

⁵² Tura ju nugkanam kuntuts pujai, uchin Yuus surusai, tusa chikichnaka Efraín anaikauwaiti.

⁵³ Siete uwí árak shir nukap nereamu nagkamasmatai.

⁵⁴ José tina tumasag ashi nugkanam siete uwí tsuka tepeawaiti. Tumamtaisha Egipto nugkanmaya ainaka tsukaika waittsacharu ainawai.

⁵⁵ Egipto nugkanam tsuka tepeamtai, nuiya shuar aina tsukamainak faraónkan jeariar yutain seaina. Turam faraón egiptonmaya ainan chicharuk: Werum José seataarma, tusa tinaiti.

⁵⁶ Tsuka tepea asamtai egiptonmaya aina senchi waitainakai yutai irumramu ainan kuitjai sujakuiti.

⁵⁷ Tura chikich nugkanmaya ainasha tsukai waitainak yutain sumakartasa, Egiptonam kaunkar Josén seajakaruiti.