Génesis 40 - New Testament with Old Testament portions

Jimar shuar karanam wainkamun José nekaamu

^1-3 José cárcelnum pujai, umutain apun ajamin, tura pankan apun ajamnujai faraónkan chichamen umirkacharuiti. Turam faraón kajek nitan achik, cárcelnum egkeatarma, tusa tinaiti. Timau asar jukiar egkeawaru ainawai.

⁴ Turamtai capitán Josén chicharuk: Ame kuitamkarta, tusa tinaiti. Turam nukap tsawan pujusaruiti.

⁵ Tura nui pujusar umutain apun ajamin, tura pankan apun ajamnusha nita turunatnurin káshi karanam wainkaruiti.

⁶ Tumawaru ai Josésha káshikmas jeari iikma wake mesekar matsatun wainkauwaiti.

⁷ Tura nitan iniak: ¿Urukamtai yamaika wake mesekrumsha matsatrume? tusa tinaiti.

⁸ Tama nita chichainak: Pegkerchau kanarji nuniku asar, yáki incha ujatmaktaj tusa enentaimkur juni matsatji, tusar tiaruiti. Tuinakai José chichaak: Atum kanarurum nuna nekamtikartumainka Yuusaiti. Uruk kanaruram nu ujatkatarma, tusa tinaiti.

^9-10 Takai umutain apun ajamin Josén ujak: Uva tres kanawentin wajau yagkuruk nerek tsaman wainjai.

¹¹ Tura faraónkan shikika umutairincha takaku asan, uva neren ijuraan faraónkan suajai, tusa tinaiti.

^12-13 Takai José chicharuk: Uva tres kanawentin wainkaum nuka, tres tsawantin faraón juiya jiirmaki ame takatairminig ataksha apujtamsattawai. Turutmamtai yaunchuk umirmiam imatiksamek umirtatme.

¹⁴ Wii tajam nu metek uminkaigka winasha kajinmatrukim inaitutsuk wina pachittsamsha faraónjai chichasta, turam winasha jiirkiti.

¹⁵ Wika hebreo shuar aig kasamrukaruiti. Wika pegkerchaunka takaschau asan, cárcelnumka egkemmaitsujai, tusa tinaiti.

¹⁶ Umutain apun ajamin ataksha waketki takastintrin José nekaamtai, pankan apun ajamnusha shir aneas Josén chicharuk: Wika tres chagkinnum pan puju aina chumpiamun muukaaruin ekenjai.

¹⁷ Tura chagkin yakini amaunam apu yuatin pan chumpirun muukaaruin ekentsan weamun, chigki yuinan wainjai, tusa tinaiti.

¹⁸ Takai José chicharuk: Ame tres chagkin wainkaum nuka tres tsawantin,

¹⁹ faraón juiya jiirmaki suwenam jigkatmaa numinam nenaa mantamattawai. Nutikramamtai iyashmin chuag yuawartatui, tusa tinaiti.

²⁰ Tura tres tsawan pujuinai, faraón ni akinamuri tsawan tsawaarmatai yutai pegker inartukam nijai takau ainajai yuak pujus chichaak: Umutain ajamrina nu, tura pankan ajamrina nujai jukirum itatarma, tusa tinaiti. Takai weriar mai jukiar itariaruiti.

²¹ Turawarmatai umutain ajamaun chicharuk: Ameka umutai yaunchuk ajamrin ayam nuig takasta tusa ataksha apujsauwaiti.

²² Antsu pankan ajamaunka José tina turusag, suwenam jigkaarum numinam nenarum maatarma, tusa tinaiti.

²³ Turasha umutain apun ajamnuka, José timaunka kajinmatkinaiti.