Génesis 39 - New Testament with Old Testament portions

José Potifaran nuwejai pachisa timau

¹ Ismaelita shuar aina Josén sumakar juki Egiptonam ejémun Potifar sumakuiti. Potifarka faraónkan jeen waitirin kuitamin ainan apuri ajakuiti.

² Turasha Yuus Josénka kuitamu asa, apu jeen pujakaisha pegkernum yaigkuiti.

³ Tura Yuus yayámu asa José pegkeran takámun nina apuri nekawaiti. Tura Josénka Yuusapi yayáwa, tusa tinaiti.

^4-5 Tura asa Josén wait anentak, wina jearui iruna ju kuitamin atá tusa apumtikawaiti. Josén Yuus anea asa, Potifaran pegkernum yayák jeen irunun, tura ajanmaya ainancha nukap amajtusuiti.

⁶ José ashi kuitamu asamtai, Potifarka ima yutanak enentaimtujakuiti. Joséka pegkeri ajakuiti.

⁷ Iman asamtai chikich tsawantin Potifaran nuwe Josén wakera asa chicharuk: Ijai kanarmi, tusa tinaiti.

⁸ Tamasha nigka nakita asa nuwan chicharuk: Wina apur ninu ainan ashi kuitamin atá tusa ikurkimayi. Tuma asa ninu ainanka pachiatsui, tusa tinaiti.

⁹ Ju jeanmagka wina nagkataku chikichka pegkesha atsawai, wina apurka ninu ainanka, ame iista tusa ashi inaitursauwaiti. Antsu aminka nina nuwe asaakmin turutachuiti. Tuma asamtai Yuusnaka tunaunka takarmaitsujai, tusa tinaiti.

¹⁰ Takaisha ijai kanarmi tusa Josénka kashi kashinig inijakuiti. Imatramsha umirujakchauwaiti.

¹¹ Chikich tsawantin shuarsha atsuinamunam José nina takatrin takastasa jea wayaawaiti.

¹² Tumattamaun Josén jaanchnum nuwa achik chicharuk: Ijai kanarmi, tusa tinaiti. Tama nina nakita asa tsekeakai, José jaanchrin nuwa awitak juruknaiti.

¹³ Nuna tura jaanchin juki,

¹⁴ inatai aina jeanam irunun untsuk ikaanak chicharuk: Wina aishur hebreo shuaran apujsama nu, wina taruti ijai kanarmi turutkai, nakitakun senchi untsumkajai.

¹⁵ Wii senchi untsumkai tsekeak jaanchrin awiik ikuki, tusa tinaiti.

¹⁶ Tura aishur tamatai inaktusmij tusa José jaanchrin ikusuiti.

¹⁷ Tura aishri taamtaisha ujak: Ame hebreo shuar inartajai tusam itaam apujkimam nu, wina tarutaa waitkarakai,

¹⁸ senchi untsumkamjai. Wii imatkai tsekeak jaanchrin awiik ikukmayi, tusa tinaiti.

¹⁹ Tusa ujakam Potifar senchi kajekuiti.

²⁰ Tuma Josén achik apun inatairi aina achiram egketainamunam egkeatarma tusa inamrauwaiti. Turamtai jukiar egkeawaru ainawai.

²¹ Turamtaisha Yuus Josén kuitamu asa, cárcelnum egkeamu ainan apurin wait anentrati, tusa tinaiti.

²² Turamu asa, cárcelnum shuar egketaina nu ame kuitamata, tusa tinaiti. Timau asa nui irununka ashi kuitamujakuiti.

²³ Joséka Yuus yayámu asa pegker taká asamtai, cárcelnum egkeamu ainan apurigka pachikchauwaiti.