Génesis 38 - New Testament with Old Testament portions

Judá Tamarjai pachisa timau

¹ Nu uwítin Judá nina yachi ainan ikuak yaakat Adulamnumia shuar Hira naartin pujamunam wuwaiti.

² Tuma nui pujus Canaánnumia shuaran Súa naartinan nawantrin nuatkauwaiti.

³ Tura uchin akia Er anaikauwaiti.

⁴ Tura ataksha uchin akia Onán anaikauwaiti.

⁵ Tura Quezib nugkanam pujus, ataksha uchin akia Sélah anaikauwaiti.

⁶ Tura Judá nui pujus nina uchiri Eran, nuwa Tamar naartinjai nuwemtikawaiti.

⁷ Turasha Erka Yuus iismaka pegkerchau ajakuiti. Tuma asamtai, jakati tusa Yuus timau asa jakauwaiti.

⁸ Tumamtai Judá, Onánkan chicharuk: Yatsumi nuwe ajakua ju ame jukim uchi akigta. Turam nina uchiri ainasha arti, tusa tinaiti.

⁹ Turasha nina uchiri amainchau asamtai, wika uchirinashtatjapi tau asa, yachi nuwe ajakun nuatak pujus, takaksha initka ishittsuk, nina yachi uchiriyaiti tamaun akitan nakita asa patatek ishitujakuiti.

¹⁰ Tuma pujakai Yuus pegkerchau iisuiti. Tura asa jakati tusa tima jakauwaiti.

¹¹ Tumamtai Judá Tamaran chicharuk: Wina uchir Sélah tsakar nuattramkati, amina apa jeen weme pujusta, tusa tinaiti. Tama apari jeen pujustasa wuwaiti. Nunaka jusha nina yachi jinaawarua nunisag jakai tu enentaimas tinaiti.

¹² Nukap tsawan pujus Súan nawantri Judá nuwe jakauwaiti. Tumamtai wake mesemar pujamun inagkas, Timnátnum nina ovejarin uren tsupirainak pujuinan iistasa, nina amikri Hira adulamita shuarjai wuwaiti.

¹³ Tuman Tamar nina weari ovejan uren tsupirattsa wemaun nekaa,

^14-15 wajema nugkutain nugkura pujamun awiik inaiyak, shuar nekarawarai tusa jaanchin nukumakuiti. Tuma yaakat Enaimnum jeaa, Timnát jintanam ayaamas ekeemsauwaiti. Nunaka Sélah tsakarmataisha nuwemtikachmau asa tumawaiti. Tumattamaun Judá wainak, akika takataimpapita tu enentaimta.

¹⁶ Tura uchiru nuwe ajakua nuwapita tusasha nekachu asa, jeari chicharuk: Ijai pujusmi, tusa tinaiti. Tama nuwa chichaak: ¿Wijai pujusmesha wari surustatam? tusa tinaiti.

¹⁷ Tama Judá ayak: Cabra uchirin akuptuktajme, tusa tinaiti. Takai nuwa chichaak: Wari aina takakam nu ikurtukta, ame cabra uchiri akupturkumin ame ikurtukmaunka awagtuktajme, tusa tinaiti.

¹⁸ Tama Judá chichaak: ¿Turasha warina ikurtukti tusamea wakerame? tusa tinaiti. Tama sello, cordón, tura ushukrutairmesha ikurtukta, tusa tinaiti. Tama ayu tusa ashi susa, nuwan takas ajaprumtikauwaiti.

¹⁹ Turam nuwasha waketki jeen jeaa, nugkutairinka awiik ikuak, wajema nugkutain nugkur pujusuiti.

²⁰ Tura Judásha nina amikrin adulamita shuaran, ame cabran uchiri chikichik jukim ejém nuwa suakum, winau ainan susan ikukmaj nu seam itartita tusa akupkauwaiti. Turam jeari susatajkama wainkachuiti.

²¹ Tuma shuar ainan iniak: ¿Nuwa akika takatai Enaimnum jinta ayaamas pujuma nusha tui pujawa? tusa tinaiti. Takai nita chichainak: Nuwa akika takataigka juigka atsuwayi, tusa tuina.

²² Tama waketki Judán ujak: Nuwanka wainkachjai, tura shuar nui pujuinasha nuwa akika takataigka juigka atsuwayi turutainawai, tusa tinaiti.

²³ Tama Judá chichaak: Wii susamaj nunaka juaksha jukiti, cabran uchirin akuptukjai, turasha wainkachu asam susachume, tusa tinaiti.

²⁴ Tura tres nantu nagkamasa ai Judán tariar ujainak: Tamar amina uchirmi nuwe ajakua nuka, yamaika chikich shuarnaun ajaprukai, tusar tuina. Tuinakai Judá kajek chichaak: ¡Aa jiikrum ekeemaktarma! tusa tinaiti.

²⁵ Takai ekeemakmi tusa aa jiyam, Tamar nina wearin chichaman akuptak: Sellon, cordónkan tura ushukrutain takurkaj ju winaka ajaprumtikrukmayi. Ju yanauk aina nekaati, tusa tinaiti.

²⁶ Tura Judá ni susamu ainan nekaa chichaak: Nigka pegkeraiti, antsu wiyaitjai pegkerchaunka. Wina uchirjai nuwemtikachmau asa aitkarayi, tusa tinaiti. Judá nuiya awenagka nu nuwanka takaschauwaiti.

²⁷ Tamar uchin jimaran jureruiti.

²⁸ Tamar jateemaa pujai uchi uwejen jinaiti. Tumamtai nuwan ujerin hilo kapantujai uwejnum jigkaa chicharuk: Iwairigka ju atatui, tusa tinaiti.

²⁹ Turasha nu uchi kunturin awaigkimtai, nina yachi eemak akinawaiti. Tumamtai nuwan ujerin ¡uruk jiinkinam! taku Fares anaikauwaiti.

³⁰ Tura uwejnum jigkaamusha akinawaiti. Tumamtai Zérah anaikauwaiti.