Génesis 37 - New Testament with Old Testament portions

José nina yachi ainajai pachisa timau

¹ Jacob Canaánnum nina apari pujujakmaunam jeaa pujusuiti.

² Jacobon uchiri aina pachisa timau: José diecisiete uwí ejé pujus, nina yachi ainajai ovejan kuitamajakuiti. Nigka Bilha, tura Zilpa nu jurermau ainajai, nina apari akigmau asamtai, nitajai iruunas wekajakuiti. Tuma asa nina yachi aina pegkerchaun takainakaisha, aparin jeari ujajakuiti.

³ Israel untach jas akia asa, chikich ainan nagkasau Josén ima senchi ane jakuiti. Tura asa nugkutain pegkeran apar anugkrauwaiti.

⁴ José yachi aina chichainak: Ina aparigka Josén ima senchi aneak inka imatikas anenmatsji, tuina asar Josénka kajerainak shir anentsar aujujakcharuiti.

^5-8 Turasha José karanam wainkauwaiti. Tura yachi ainan chicharuk: Wii karanam wainkaj nuna ujaktajrume anturtuktarma: Karanam ii ainati ajanam trigo tsupirar jigkakar matsasji. Tura wii jigkaamu nantaki tutupin jas wajasai. Tumamtai atumnau aina nantarar winaun tenteawar tsuntsumruinan wainiajai, tusa tinaiti. Takai yachi aina kajerkar chicharainak: ¿Nuigka amek apu jasam ina inatmau atatam? tusa tuina.

⁹ José ataksha karanam wainkauwaiti. Tura yachi ainan chicharuk: Karanam etsan, nantun, tura once ya ainajai wina tsuntsumrutainan wainkajai,

¹⁰ tusa nina aparin, tura yachi ainajai ujakuiti. Takai apari chicharuk: ¿Wari karamkartuta tusha karamkartame? ¿Nuigka wika, amina nukujai, tura yatsum ainajaig tikishmatran ememattinaitjam? tusa tinaiti.

¹¹ Takai nina yachi ainaka senchi kajerkaruiti. Turasha aparigka urukakug tusha karamra tusa nuna enentaimtu pujau.

Josén nina yachi aina surukmau

¹² Tuma chikich tsawantin José yachi aina, apari tagkuri ainan chirichirin eak ayurawartasa Siquemnum wearuiti.

¹³ Tumawarmatai Israel, Josén chicharuk: Amina yatsum aina ovejan chirichirin eatak ayurawartasa Siquemnum wearma nu werim iisarta, tusa tinaiti. Tama Josésha ayu, tusa tinaiti.

¹⁴ Takai Israel chicharuk: Yatsum pegkerash matsata, tura tagku ainasha pegkerash matsata nu nekaam tame ujatkata, tusa Hebrónkan pakariinia akupkam Siquemnum jeawaiti.

¹⁵ Tuma yachi matsatmaunam jeatajkama waak wekan, shuar wainak: ¿Wari eame? tusa inia.

¹⁶ Tama José ayak: Wina yatsur ainan eakun wekajai, wina yatsur ainasha ovejancha tui kuitamainak matsata nu ujatkata, tusa tinaiti.

¹⁷ Tama ayak: Amina yatsum ainaka juigka atsuinawai, nita chichainak: Dotánnum wearmi tuinan anturkarmajai, tusa tinaiti. Tama Josésha yachi ainan eaktasa we Dotánnum matsatun wainkauwaiti.

^18-20 Tura yachi ainasha José winittamaun ikag wainkar chichainak: Karamkartina nu winawai. Maar yumirmatai entsa atsa jui egkeami turar ina apari jearir ujakrisha yajasmau yuayi timi, tusar chichaman umirkaruiti.

²¹ Tuinakai Rubén ayamruktasa wakera asa, maachmi, tusa tinaiti.

²² Antsu wa a jui egkeatarma, turakrumsha maawairpa, tusa tinaiti. Nunaka ayamruk nina aparin awaigkittsa tinaiti.

^23-24 Tusa chichaa matsatmaunam José jeantuiti. Tumamtai achikar jaanchrin awitak jurukiaruiti. Turawar wa entsa atsamunam egkeawaruiti.

²⁵ Turawar yurumkan yuawartasa ekeemsaruiti. Tumawaru ai Galaad nugkanmaya ismaelita aina, perfume ainan, bálsamo ainan, tura mirra ainan Egiptonam surukmi, tusar camello ainan aentskar wininan wainkaruiti.

²⁶ Tura Judá nina yachi ainan chicharuk: ¿Ina yachi maar uukar inaiyakrisha, wari pegkera jukittaji?

²⁷ Antsu maatsuk ismaelita aina shimuina ai surukmi, tusa tinaiti. Takai nina yachi ainasha ayu tiaruiti.

²⁸ Tusar waanam egketun Josén jukiar, ismaelita shuar ainanam veinte kuitjai surukaruiti. Josénka Egiptonam tu jukiaru ainawai.

²⁹ Turasha Rubénka suramunka nekachu asa, waan jeari iikma yachi atsaun wainak, kuntuts enentaimar nugkutairin jaakuiti.

³⁰ Tuma waketki yachi aina matsatmaunam jeaa chichaak: ¡Uchika waanmagka atsawai! ¿Wina aparnasha wari titajak? tusa tinaiti.

³¹ Takai cabra uchirin maawar, nuna numpejai José nugkutairin yakararuiti.

³² Turawar aparin chichaman akuptuinak: Jaanch tepau wainkaji, José nugkutairimpashit nekaata, tusa tuina.

³³ Tuinakai Jacob wainak chichaak: Ju nugkutaiya juka wina uchirnauwaiti. Yajasmau yuak aitkachiash, tusa tinaiti.

³⁴ Tusa Jacob kuntuts enentaimar nina nugkutairin jaakuiti. Tura wake mesemar pujakur nugkutain nugkuruiti. Tuma uchiri megkaakau asamtai, nukap tsawan útu pujau.

³⁵ Imani pujakai nina uchiri aina, tura nawantri ainasha enentain ichichturtasa aujaina, turamsha nakita asa wika uu útkuan jakan nijai irunkun inaisattajai, tusa tinaiti.

³⁶ Ismaelita aina Josén Egiptonam ejéniar Potifarain surukaruiti. Potifarka faraónkan jen kuitamin ainan apuri ajakuiti.