Génesis 35 - New Testament with Old Testament portions

Yuus Jacobon Betelnum wantintukmau

¹ Yuus Jacobon chicharuk: Amina yatsum Esaú ashamakum weamin wii wantintukmiajam nui, Betelnum weme pujusta. Tumam wina emematrakum tagku maa patasa epeatin najanata, tusa tinaiti.

² Tama Jacob nina nuwe ainan, uchiri ainajai, tura nina patai ainajaimak chicharuk: Atum yuusrimattsa najanamu aina nuka ashi utsagtarma. Tumarum entsa maakrum jaanch yapajmamkatarma, tusa tinaiti.

³ Tumawakrumin Betelnum wearmi. Tura ai jeaan: Wii iturchatnum pujai, tura wekamunmasha wina uyuntusua nuna ememattinan tagku aina maa patasa epetain najanatjai, tusa tinaiti.

⁴ Takai yuusrimattsa najanamu ainan, tura arete ainajaimak ashi yaruakar Jacobon susaruiti. Turam ni juki númi encina tutai Siquemnum jeattak wajamunam tai chumpia yutuawaiti.

⁵ Tura Jacob nina patai ainajai Betelnum wenakaisha, ashamainak patatukcharti tusa Yuus timau asar, patatukcharu ainawai.

⁶ Jacob nina patai ainajai Canaán nugkanam yaakat “Tsaaptin” tutain Betel anaikauwa nui jeawaruiti.

⁷ Tuma tagku aina maa patasa epetain najana nu nugkan “El-betel” anaikauwaiti. Nina yachin ashamak tsekegki wesa kintamuk kanittamaun karanam Yuus wantintukmau asa, tu anaikauwaiti.

⁸ Nuiyasha Rebecan kuitamajaku Débora naartin jakamtai, númi encina tutai Betelnum jeattak wajamunam ikusaruiti. Tura nu numinka Kuntuts enentaimramu tu anaik ikuknaiti.

⁹ Jacob Padán-aramnum pujau Betelnum jeamtaisha Yuus ataksha wantintuk pegkernum chicharuk:

¹⁰ Amina naarmeka Jacobowaiti. Turasha yamai nagkamsamka amina naarmeka Israel atatui, tusa tinaiti. Yuus Jacobon naarin yapajtua

¹¹ chicharuk: Yuus ashi senchirtinnaka Wiyaitjai. Tumau asan amee weantu ainasha nukap pampaararti. Tura amee weantu ainaka apusha artinaiti.

¹² Nugkan Abrahaman, tura Isaackan susauwaitaj nunaka yamaika amina susatjame. Tura ame jakaakmin amina uchiram ainan susartinaitjai, tusa tinaiti.

¹³ Yuus Jacobjai chichas umik waketkinaiti.

¹⁴ Tumamtai Yuusjai chichasmau tutai atii tusa, kayan juki awajas aceitejai ukattrauwaiti.

¹⁵ Tura nu nugkan Betel anaikauwaiti.

Raquel jakamu

¹⁶ Betelnumia jiinki yaakat Efratanam jeattak wesa, Raquel uchin jureruiti. Turasha uchi jeen ajapatajkama tujinkauwaiti.

¹⁷ Tumamtai nuwan ujerin chicharuk: Ashamkaipa aishmag jurerume, tusa tinaiti.

¹⁸ Tura pegke jak uchin Benoni anaik jakauwaiti. Turasha apari anaiyak, Benjamín anaikauwaiti.

¹⁹ Raquelka tu jakauwaiti. Tumamtai Efrata jintanam ikusaruiti. Tura nu yaaktan naarinka yamaika Belén anaikaruiti.

²⁰ Tura Jacob Raquel ikusmaunam kayan ayaanas awajsauwaiti. Nu turamua nuka yamaiya juisha Raquel ikusmaun iwainawai.

²¹ Tura Israel Raquelan ikus ikuak, jiinki wea weakua Migdal-eder tutain nagkaiki jeashat pujusuiti.

²² Tura nui Rubén apari nuwen Bilhan takasuiti. Turamun Israel nekaa senchi kajekuiti. Jacobon uchiri ainaka doce ajakaruiti.

Jacobon uchiri aina

²³ Lea jurermau aina: Rubén, Simeón, Leví, Judá, Isacar, tura Sabulón nu ajakaruiti.

²⁴ Raquel jurermau ainaka: José, tura Benjamín nu ajakaruiti.

²⁵ Raquela inatairi Bilha jurermau ainaka: Dan tura Neftalí nu ajakaruiti.

²⁶ Lea inatairi Zilpa jurermau ainasha: Gad tura Aser nu ajakaruiti. Nu ainaka Padán-aramnum akiinkaru ainawai.

Isaac jakamu

²⁷ Yaakat Mamré Arbá tura Hebrón tutainam Abraham pujujakmaunam nina apari Isaac pujau asamtai, Jacob iistasa wuwaiti.

²⁸ Isaacka ciento ochenta uwí ejé pujus jakauwaiti.

²⁹ Tuma nina uuntri jina ainajai iruuntrauwaiti. Antsu nina iyashinka uchiri aina Esaú Jacobjai jukiar ikusaruiti.