Génesis 34 - New Testament with Old Testament portions

Siquem Dinan takasmau

¹ Lean nawantri Dina, nuwa ainan irarsattsa yaaktanam wuwaiti.

² Tumattamaun yaakta apuri heveo shuaran Hamoran uchiri Siquem wainak, nakitamaitiat achik takasuiti.

³ Tura Siquem Dinan senchi wakerukuiti. Tuma nuwan wakerumtikattsa pegkeran aujsauwaiti.

⁴ Tura aparin chicharuk: Ju nuwan nuatkattsan wakerajai, aparin weme sumartukta, tusa tinaiti.

⁵ Jacob nawantrin Siquem takasmaun nekaawaiti. Turasha nina uchiri ainaka tagkun kuitamainak matsataina asarmatai, nita kaunkarmatai chichasartajai tusa pachikchauwaiti.

⁶ Tuma ai Siqueman apari Jacobjai chichastasa wuwaiti.

⁷ Tura Israelan uchiri ainasha tagkun kuitamainak matsataina kaunkar, Siquem Dinan takasmaun nekaawar, nita iismaka pegkesha nutikachminun nutika asamtai, senchi kajekaruiti.

⁸ Turasha Hamor nitan chicharuk: Wina uchir Siquem atumi umain senchi wakerawai. Tuma asamtai wait aneasrum susatarma.

⁹ Tumarum atumsha ina patai jastarma. Tumawakrumin wii shuar ainasha atumin nawantri ainan nuatkarti, tura atum shuar ainasha ii shuar ainan nawantrin nuatkarti.

¹⁰ Tura atum pujumain nugka awai, tuma asamtai takasrum surakrum pujustarma, tusa tinaiti.

¹¹ Tura Siquemsha Dinan aparin, tura umai ainan chicharuk: Atum wait aneasrum ayu takurminka, atum wakeramu seatkurminka susatjarme, tusa tinaiti.

¹² Tura nuwa nuatku sutai aina nu nagkasarum seatkurmincha susatjarme. Turasha nuwanka nuatkatjai, tusa tinaiti.

¹³ Takai Jacobon uchiri aina, Siquem Dinan takasu asamtai, Siqueman aparijai tukeneasar

¹⁴ chicharainak: Shuar kati mushuken tsupikchauka sumaitsuji, nuka ii iismaka natsan amainaiti tusar tiaruiti.

¹⁵ Antsu atumsha ina kati mushuke tsupiku ainaj tumasrumek atumi kati mushuke tsupikakrumnaka ayu tumainaitji.

¹⁶ Tumawakrumnaka atumi uchiri ainasha ina nawantri ainajai nuwenmain ainawai. Tura ina uchiri ainasha atumi nawantri ainajai nuwenmain ainawai. Tumainakur nu shuarak matsatua numamtuk amain ainaji.

¹⁷ Turasha atum nu nakitakrumnaka ina umai jukir wetatji, tusar tiaruiti.

¹⁸ Tuinakai Hamor nina uchiri Siquemjai nuka metek umikmi tusar tiaruiti.

¹⁹ Siquemka Jacobon nawantrin senchi wakeruku asa, kati mushuken wári tsupikuiti. Tura Siquemka chichame umirtai asa,

²⁰ nina aparijai yaakta waitirin wearuiti. Tuma jeawar shuar aishmag ainan irur chicharainak:

²¹ Nitaka shuar pegker ainawai, yamaika ijai iruuntrar matsamsartatui. Tura nita matsamsar surumaincha nugkasha awai. Ii shuar aina nitan nawantrin nuatiartatui, tura nita uchiri ainasha ina nawantri ainan nuatiartatui.

²² Turasha shuar aishmag ainaka kati mushuken ashi tsupirarti, tumawarmatai chikichik shuarak iruuntrar matsatua numamtin armi tusar wakeruinawai.

²³ Tura nita waríri aina, tura nita tagkuri aina nuka ashi inu artatui. Tumatin asamtai nita tuina nu umirkarmi. Tura nitasha juig matsamsartatui tusar tiaruiti.

²⁴ Tuinakai yaaktanmaya shuar aina antukar, nuka metek uminkati tuina asar, kati mushuken tsupikaru ainawai.

²⁵ Turasha Jacobon uchiri aina, Simeón tura Leví Dina umai aina tres tsawara ai yaaktanam wear, shuar aina kati mushuken tsupikaru asar, najaimainak kakaamainchau nekapena asarmatai, kuchiijai ashi maawaruiti.

²⁶ Tura Hamornasha nina uchirijai maawaruiti. Turawar Dinan Siquema jeen pujuttamaun jukiaru ainawai.

²⁷ Turawarmatai Jacobon uchiri chikich aina kaunkar, umai takarsamu asar ikmainak:

²⁸ Oveja ainan, vaca ainan, burro ainan, yaaktanam irunun,

²⁹ tura warí irununcha yarumainak: Uchi ainan, nuwa ainajaimak achirar ashi yaruakaru ainawai.

³⁰ Turawarmatai Jacob, Simeónkan Levíjai chicharuk: Atum aniakrum wake mesemar enentaimtikrarme. Wina pataar ainaka ishichkiti, tumau asaakrin cananeo aina ferezeo ainajai iruuntrar ashi mantammainaitji, tusa tinaiti.

³¹ Takai nita aimainak: Ina umain wakerakur akikar takatia numamtuk pegkerchau takasaru asarmatai aitkaji, tusa tiaruiti.