Génesis 33 - New Testament with Old Testament portions

Jacob Esaújai igkunaikmau

^1-2 Jacob nina yachi Esaú cuatrocientos shuarjai winittamaun wainak: Leancha nina uchirijai, Raquelnasha nina uchirijai, tura inatairi ainancha uchiri ainajai akantrauwaiti. Tura nina inatairi ainan uchiri ainajai emtikrauwaiti. Nuna ukurin Lean nina uchiri ainajai awajsauwaiti. Tura Raquelan nina uchiri Joséjai awajsauwaiti.

³ Tura ni emak sieteya imania tsuntsumaa yachi wajamunam jeastatuk wajasuiti.

⁴ Turasha Esaúka tsekegki yachin pagkuk kugkuasuiti. Tura mai útiaruiti.

⁵ Tuma nuwa ainan uchirijai irunun wainak: ¿Jusha ya ainawa? tusa inimkai ni ayak: Juka Yuus surusmau ainawai, tusa tinaiti.

⁶ Timatai inatai nuwa aina nita uchiri ainajai jeariar tsuntsumruawaruiti.

⁷ Leasha nina uchiri ainajai jeari tsuntsumruawaiti. Tura Raquelsha nina uchiri Joséjai jeari tsuntsumruawaiti.

⁸ Tura Esaú nina yachin Jacobon iniak: Jinta winisan tagku ainan wainkaraj nusha ¿uruk enentaimsamea aitkame? Tama ni ayak: Juna wainak wait anentrurti tusan aitkamjai, tusa tinaiti.

⁹ Tama Esaú ayak: Winaka yatsuru, nukap tagku arutui, aminu aina nuka aminuk arti, tusa tinaiti.

¹⁰ Tamasha Jacob chicharuk: Atsaa, yatsuru, wii akupturmajam nuka wait aneasam jukita. Ame shir aneasam jurukin asaakmin Yuusan wainkan enentaimmainaitaj iman enentaimjai.

¹¹ Yuus yaintsamtai tagku ainanka nukap napampaaru asan winaka nukap arutui. Tuma asamtai wii tajam nuka jukita, tusa imatram Esaúsha ayu tusa jukinaiti.

¹² Tura Esaú yachin chicharuk: Wemi, wii emkatjai, tusa tinaiti.

¹³ Tama Jacob yachin chicharuk: Yatsuru, wina uchir shikapchich aina nuka nekame. Tura oveja aina, tura vaca ainasha yama petsaku asar, wári weamunmagka pimpikiar jinumain ainawai.

¹⁴ Yatsuru ameka emkata, wika tagkur ainan, tura wina uchir ainan yaruasan yaitasan wina winakuan ame pujamu Seír tutainam tatatjai, tusa tinaiti.

¹⁵ Tama Esaú yachin chicharuk: Antsu amina yainmaktinan shuaran akankan ikurkitjame, tusa tinaiti. Tamasha Jacob ayak: Wait aneasam nuka turawaipa, tusa tinaiti.

¹⁶ Tutai Esaú nu tsawantinig Seírnum waketkinaiti.

¹⁷ Tumamtai Jacob Sucotnum wuwaiti. Tuma ni pujustintrin jeamak, tura tagku aina matsamsatnuncha jeamkauwaiti. Tura asa nu nugkan Sucot anaikauwaiti.

¹⁸ Jacob Padán-aramnumia jinki pegkerak Canaánnum jeaa, yaakat Siquemnum jeastatuk pujusuiti.

¹⁹ Tuma Siqueman apari Hamoran nugken cien kuitjai sumak, nui pujusuiti.

²⁰ Tuma tagku aina maa patasa epetain najana, “El-Elohé-Israel” tu anaikauwaiti.