Génesis 32 - New Testament with Old Testament portions

Jacob Esaújai igkuuniaktasa umikmau

¹ Jacob jinta wean nayaimpinmaya shuar aina igkugkaru.

² Turam Jacob nayaimpinmaya shuar ainan wainak chichaak: Juka Yuusa nugkeyaiti tusa Mahanaim anaikauwaiti.

³ Jacob nina yachi Esaú, Seír nugkanam Edomnum pujuttamaun chichama etserin ainan, yatsum winimayi tusarum atum ujatruktarma tusa akupenak chicharuk:

⁴ Wina yatsur Esaú pujamunam jearum ujakrum: Amina yatsum Jacob nukap uwí Labánkan takaruk pujau jinki winak,

⁵ vaca ainan, burro ainan, oveja ainan, nina inatairi aishmag ainan, tura nuwa ainajaimak yaruak winau asa, wina yatsur shir enentaimas igkunkati tusa chichaman akupturmakai, tusarum ujaktarma tusa nina inatairi ainan ishiakuiti.

⁶ Turawaram Esaún jeariar ujakaruiti. Tura waketar kaunkar Jacobon chicharainak: Ame timam imatiksarik Esaúka ujakmaji. Turam nisha amina igkunmak juramkittsa cuatrocientos shuaran yaruak winau ikukmaji tusa ujakaruiti.

^7-8 Turam senchi ashama asa wake mesemar nekapeak: Wina yatsur nina patai ainajai winak, emkiar shimuinan jatenakaisha chikich ukunam shimuinaka tsekearar uwemrarti tusa, nina patai ainan, oveja ainan, vaca ainan, tura camello ainancha akantrauwaiti.

⁹ Tura Jacob chichaak: Wina apachur Abrahaman Yuusriya tura Isaackan Yuusriya, ame wina chichartakum: Amina nugkemin pataim matsata nui waketkita, wii pegkernum yaigtatjame tusam turutmiame.

¹⁰ Wika pegkerchau aig ame pegkernum yaintu asaakmin, wina ushukrutairun takusan Jordán entsanam katigmiajai. Tura yamaika ame surusmau aina jimar akankamu arutui.

¹¹ Wina yatsur Esaú wina mantak nuwar ainan, tura uchir ainancha ijittruawai tusan ashamajai. Tuma asamtai wait aneasam agkanmamtikruata.

¹² Ame wina chichartakum: Wii aminka pegkernum yayákun, amee weantu ainanka yaikim nekapmamainchauwa iman amajsatnaitjai turutmame, tusa tinaiti.

^13-15 Nui kanar tsawaar nina yachi susatnun: Doscientos cabra, veinte chivo, doscientos oveja, veinte carnero, treinta camello nuwa ainan uchirtuk, cuarenta vaca, diez toro, veinte burro nuwa ainan, tura diez burro aishmag ainan akantrauwaiti.

¹⁶ Tura nina inatairi ainan chicharuk: Akantraj jutiksarmek ikaakantak wetaarma, tusa tinaiti.

¹⁷ Tusa emtika akupeamurin chicharuk: Wina yatsur Esaú igkunmak chichartamuk, ¿amesha yana inatairiyaitam? ¿Tui weame? ¿Ju tagku yaruakam winam jusha yanauwa ainawa?

¹⁸ Tusa turamkaigka, juka ame inatairam Jacobnau ainawai. Nigka ukunam winak ju jukirum emtikarum wina yatsur susatarma, tusa turamkurin inimiaji tusarum titarma, tusa tinaiti.

¹⁹ Tura chikich ainancha chicharuk: Atumsha Esaú igkuakrumka, turusrumek

²⁰ titarma tinaiti. Tusa tagkun emtikan akupainaj juna wainak wina yatsur kajertuku akusha tsagkurtur shir enentaimas jurukchaintash tu enentaimas nunaka turawaiti.

²¹ Tura ishiak nuig kanartasa nigka juakuiti.

Jacob nayaimpinmaya shuarjai maanikmau

^22-23 Tura Jacob káshi nantaki nuwen mai juki, inatairi nuwa ainan, uchiri once ainan, tura ninu ainanka ashi yaruak entsa Jabocnum jeaa, pararim amaunam ikatiaruiti.

²⁴ Tura Jacob nigki juak nayaimpinmaya shuarjai maa maaniakua tsawa.

²⁵ Tumakai nayaimpinmaya shuar Jacobon nepetmainchau nekapeak, yantajnum iju munmamtikauwaiti.

²⁶ Tura chicharuk: Tsawawai inaitusta tama Jacob ayak: Ame wina pegkernum chichartachkumnaka inaisashtatjame, tusa tinaiti.

²⁷ Tama nayaimpinmaya shuar Jacobon iniak: ¿Amina naarmesha yaita? tusa tinaiti. Tama wika Jacobowaitjai, tusa tinaiti.

²⁸ Takai nayaimpinmaya shuar chicharuk: Wijai maaniakmesha, tura shuar ainajai maaniakmesha nepetmaku asam, yamai nagkamsamka Jacob tutai achattame. Antsu Israel tutai atatme, tusa tinaiti.

²⁹ Tama Jacob iniak: ¿Amesha yaitam? tusa tinaiti. Tama ni ayak: ¿Urukamtai wina naar nekattsamsha ininme? tusa pegkernum chicharkauwaiti.

³⁰ Turam Jacob: Yuusjai igkunaisan shir wainnaikajai, turasha iwaakjai, tusa nu nugkan Peniel anaikauwaiti.

³¹ Tura Jacob Penielan ikuki weai etsa jinnaiti. Turasha munmamtikamu asa, shutua shutua wuwaiti.

³² Nayaimpinmaya shuar Jacobon yantajnum iju asamtai, Israel weantu ainaka yamaiya juiksha tagku yantajenka yuchau ainawai.