Génesis 3 - New Testament with Old Testament portions

Adán Evajai Yuusa chichamen umikchamu

¹ Apu Yuus kuntinan ashi najankauwa nuiya nápi ima nekau ajakuiti. Tumau asa nuwan tari iniak: ¿Yuuscha wari turamma, ju ajanam numi nere iruna juka chikichkiksha yuawaipa turammaka? tusa tinaiti.

² Tama nuwa ayak: Ju númi iruna juna neregka yumainaitji.

³ Turasha númi ajanam ajapeen waja auna neregka yuawairpa, tura achitkesha achikairpa, nu turakrumka tunau jastatrume, tusa Yuus turammaji tinaiti.

⁴ Tama nápi nuwan chicharuk: Atsaa, tunauka jaschattarme.

⁵ Antsu nu yuakrumka Yuusa numamtuk jasrum pegker, tura pegkerchausha nekamainaitrum nuna Yuus nekau asa turamnaitrume, tusa tinaiti.

⁶ Tama nuwa numi neren pegker asamtai, juna yuanka wisha yachapi atatja, tusa yuattsa wakerukuiti. Tuma asa numi neren akak yuawaiti. Tura nina aishrincha susauwaiti, turam nisha yuawaiti.

⁷ Tumamuik mai misuk wajau wainmamkaru, tumawar árak higuera tutai nuken aparar itipruawaruiti.

⁸ Tura etsa agkuantai apu Yuus nasenam pachitkau ajanam wekan nekaawaru. Tumawar ajanam númi irunmaunam apu Yuusan uumrukaru.

⁹ Turasha apu Yuus shuaran untsuak: ¿Tui pujame? tusa tinaiti.

¹⁰ Tama shuar ayak: Ame ajanam wekamun nekaan, misu pujau asan amina ashamakun uumrukjame, tusa tinaiti.

¹¹ Tama Yuus iniak: ¿Ya ame misu pujamuncha ujatmakume? ¿Wii amina ju numi nere yuawaipa timajam nu yuachumek?

¹² Tama shuar ayak: “Ame wijai tsanig pujustin nuwa surusmam nu, juki itan surusmatai wisha yuajai”, tusa tinaiti.

¹³ Takai apu Yuus nuwan iniak: “¿Urukamtai nusha nutikam? Tama nuwa ayak: Nápi tsanuramtai yuajai”, tusa tinaiti.

¹⁴ Takai apu Yuus napin chicharuk: Ame ju nutika asam, chikich kuntin aina nu nagkasau pegkerchau atinaitme. Tura japintsam wekasam nugka tuke yu wekaitinaitme, tusa tinaiti.

¹⁵ Aminka yamai nagkamsan nuwajai kajernain amajsattajme. Amina uchiram weantu ainajaisha, tura nuwa uchiri weantu atina nuka tuke kajernaitin ainawai. Tura ame nina sagkanin asaitnaitme, turam ni amina muukmin nekentramkatnaiti, tusa tinaiti.

¹⁶ Tura nuwan chicharuk: “Ameka uchirmakmesha waittsam uchirmatnaitme. Turasha aishrumjai pujutka tuke waketinaitme, tura amina aishrum aminka inatmatnaitme”, tusa tinaiti.

¹⁷ Tura aishmagnasha chicharuk: “Ju numi nere yuawaipa tusa timaitiatam amina nuwemin chichame umirkum yua asaakmin, ame tunau takasmaunam nugkasha pegkerchau jastatui. Tura ame yuatnuram takákum tuke waittinaitme.

¹⁸ Nugkanmagka nupa jagkirtin ainasha nupaktin ainawai. Tura ikamia numi nere aina yutinaitme.

¹⁹ Tura ameka takákum waitakum yuatnaitme. Tuma pujau jakum ikuktinaitme. Ameka nugka jukir najanamu asam, ame jakmesha nunismek nugka jastinaitme”, tusa tinaiti.

²⁰ Adán nina nuwen Eva anaikauwaiti. Nunaka ashi shuar ainan nukuri atin asamtai, tu anaikauwaiti.

²¹ Apu Yuus shuaran nina nuwejai nugkurtintrin nuapen najana susauwaiti.

²² Nutika apu Yuus chichaak: “Ju shuar aina juka yamaika iya jumamtinak jasaru asar, nitasha pegkeran, tura pegkerchauncha nekainawai. Tumawaru asar númi pujutan sukartina nuna nerenka yuacharti”, tusa tinaiti.

²³ Tusa apu Yuus shuaran ajanam pujuinan, jiiki nugka ni takastinnum apujsauwaiti.

²⁴ Nutika shuar ajan utua númi pujutan sukartina nuna neren yuawarai, tusa ajan kuitamatnun nayaimpinmaya shuar ainan apujsauwaiti. Tura etsa watainmani ajanam kuchiya numamtinan kean pepertu atinan apujsauwaiti.