Génesis 29 - New Testament with Old Testament portions

Jacob Haránnum jeaamu

¹ Tura Jacob nuiya jinki etsa watainmani shuar matsatmaunam wuwaiti.

^2-3 Tuma Haránnum jeaa yumirmatai amaunam tres shuar ovejartin aina nita ovejari ainan matsas ayamainak, ina tagkuri entsa aakarmi tusar matsamtatmaun wainkauwaiti. Nu yumirmataigka kaya uunjai nukukmau asamtai, oveja entsan umarartasa iruuntrarmatai, kayan jurusar entsan aarar nukujakaruiti.

⁴ Jacob ovejan kuitamin ainan iniak: “¿Wina yatsur ainata atumsha tuiya ainarum?” tusa tinaiti. Tama nita aimainak: “Ika Haránnumia ainaji”, tusar tuina.

⁵ Tuinakai ¿Atumsha Nacoran uchiri Labán nekatsrumek? tusa tinaiti. Tusa inimkai nita aimainak ee nekaji, tusar tuina.

⁶ Tuinakai ¿pegkerak puja? tusa takai, pegker pujawai. Jui Raquel nina nawantri ovejan yaruak winawai, au iniasta tusar tuina.

⁷ Tuinakai Jacob chichaak: Etsa akatsaigka oveja yaruakrika epenchataiyaiti. ¿Urukamtai entsa aakrum chirichirin yuawarti tusarum juatsrume? tusa tinaiti.

⁸ Takai nita aimainak: Atsaa nuka turumaitsuji. Oveja ashi iruuntramtai, tura ovejan kuitamin aina ashi kaunkarmatai kaya nukukmau jusar, oveja entsa aartasar chikich aina kaunkarti tusar nakainaji, tusar tuina.

⁹ Jacob nitajai chichaa wajai, Raquelsha apari ovejarin kuitamrin asa, ovejan yaruas taawaiti.

¹⁰ Tumamtai Jacob nina nukuri umain Labánka nawantrin Raquelan wainak, jeari yumirmat kayajai nukukmau atatmaun jurus iichri tagkurin entsan aakuiti.

¹¹ Tura Jacob Raquelan pagkuk kugkuas útnaiti.

¹² Tumak wika Rebecan uchiriyaitjai. Tura Labánkan aweyaitjai, tusa tinaiti. Tama Raquel aparin ujaktasa tsekegnaiti.

¹³ Tuma amina umaimin uchiri Jacob taayi, tusa ujakuiti. Turam igkug utittsa tsekegnaiti. Tura jeari pagkuk kugkuas nina jeen jukinaiti. Turam Jacob ni tumamurinka pachis Labánkan ashi ujakuiti.

¹⁴ Turam Labán chichaak: Ameka nekas wina shir pataaruitme, tumau asam jui pujusta, tusa tinaiti. Tama chikichik nantu pujusuiti.

Jacob Labánkan takarsamu

¹⁵ Iman tsawan pujusmatai Labán, Jacobon chicharuk: Ameka wina pataar akumsha akiachmaitiatmeka takartumaitsume. Urutma akirkati tusamea wakeram nu turutta, tusa tinaiti.

¹⁶ Labánkan nawantri jimar ajakuiti. Iwairigka Lea naartin, tura ekeuka Raquel naartin ajakuiti.

¹⁷ Leaka imanis shirmachu ajakuiti. Antsu Raquelka shir shiram ajakuiti.

¹⁸ Jacob Raquelan wakera asa, Labánkan ayak: Wika amina nawantrum ekeuwa juna nuatkattsan siete uwí takarsatjame, tusa tinaiti.

¹⁹ Tama Labán ayak: Chikich shuarnaka sutsuk, amina amastajai. Juig wijai pujusta, tusa tinaiti.

²⁰ Timau asa Jacob siete uwí takarsauwaiti. Iman uwí takasu akusha Raquelan shir senchi wakera asa, ishichik uwí takasua numamtin nekapsauwaiti.

²¹ Jacob siete uwí ejé Labánkan chicharuk: Wii amina siete uwí takarsatjame tusan tinaitaj nuna tsawantan ejéjai. Tuma asamtai yamaika nawantrum surusta nuatkatjai, tusa tinaiti.

²² Tama ayu tusa Labán yutain umik ni irutkamuri ainan ashi ipaa, nawantri aishrinkai jiistamawaiti.

²³ Tuma káshi jasmatai Jacob tepamunam, Labán Lean juki ejénaiti, turamtai Jacob Leajai kanaruiti.

²⁴ Labán nina inatairin Zilpa naartinan ame inarta tusa nawantrin susauwaiti.

²⁵ Kashin tsawaar Leajai kanarmaun Jacob nekaawaiti. Tuma Labánkan chicharuk: ¿Urukamtai winasha jutikruam wii Raquelan jukimij tusan takaschamkaj? ¿Urukamtai winasha tsanurame?

²⁶ Tama Labán ayak: Ii ainatika ekeuka surutsuk iwairiya surin ainaji.

²⁷ Ataksha siete uwí takarsatjame takumka ame Leajai nuwenamuram siete tsawan ejéta. Turawakmin Raquelan amastajai, tusa tinaiti.

²⁸ Tama nuna tsawantan ejémtai, Labán Raquelan susauwaiti.

²⁹ Tura nina inatairin, Bilha naartinan ame inarta tusa nawantrin susauwaiti.

³⁰ Turam Lea aneamun nagkas, Raquelan ima senchi anea asa, nu nuwanam siete uwí Labánkan takarsauwaiti.

Jacobo uchiri aina

³¹ Jacob Lean imatikas aneachu asamtai, Yuus Lean uchin juren amajsauwaiti. Tura Raquelnaka uchin jurechu amajsauwaiti.

³² Lea ajapruk uchin jurer, wii wake mesemar pujamun Yuus nekau asa, uchin surusai tusa Rubén anaikauwaiti. Tura yamaika wina aishur anentatui, tusa tinaiti.

³³ Tura ataksha Lea uchin jurer, wina aishur imatikas anenchau asamtai, Yuus surusai tusa Simeón anaikauwaiti.

³⁴ Tura ataksha uchin jurer, yamaika uchin tres jureru asamtai, wina aishur senchi anentatui, tusa Leví anaikauwaiti.

³⁵ Tura Lea ataksha uchin jurer, yamaika Yuusan ememattajai tusa Judá anaikauwaiti. Tura nuiyagka uchi juretan nagkankauwaiti.