Génesis 28 - New Testament with Old Testament portions

¹ Tama Isaac Jacobon untsuk pegkernum chicharuk: “Canaánnumia nuwaka pegke nuatkaipa”.

² Antsu Padán-aram nugkanam apachrum Betuel pujamunam weme amina iichrumin nawantri nuatkata.

³ Tumawakmin Yuus ashi senchirtina nu pegkernum yainmakti, tura yaaktamkarti tusa nukap napamtamkati.

⁴ Abrahaman anajmatawa turusag amina, tura amina uchiram ainancha irara numamtuk pujuinaj nuna ju nugkanka atumnau atii, tusa suramsattaji tusa tinaiti.

⁵ Tu chicharak Isaac Jacobon akupkauwaiti. Turam arameo shuaran Betuela uchiri Labán pujamunam jeawaiti.

Esaú nuwenamu

⁶ Isaac Jacobon pegkernum chicharkau asa, Canaán nugkanmaya nuwa nuattsuk Padán-aramnumia nuwa nuatkata tusa akupkamun Esaú nekaawaiti.

⁷ Apari, tura nukuri timaun turusag umiak Jacob, Padán-aramnum wuwaiti.

⁸ Tuma asamtai Esaúsha Canaánnumia nuwanka wina aparka nakitawapi tu enentaimsauwaiti.

⁹ Tuma asa Abrahaman uchiri Ismael pujamunam, Esaú wuwaiti. Tuma Ismaelan nawantrin Nebaiottan umain Malahattan nuatkauwaiti. Canaánnumian nuwan jimaran nuatkauwaitak nunaka tumawaiti.

Jacobon Betelnum Yuus karanam wantintukmau

¹⁰ Jacob Beersebanmaya jinki yaakat Haránnum wuwaiti.

¹¹ Tuma jeatsuk jinta kintamar kanartasa kayan juki atamruk tepesuiti.

¹² Tuma kanar watai amaunam nayaimpinmaya shuar ainan akaarar waketainai, chikich aka jainan karanam wainkauwaiti.

¹³ Tumainai niini ayaamas wajaun Yuusan wainkauwaiti. Turam chicharuk: “Abrahaman, tura amina apan Isaackan wika Yuusriyaitjai. Ju nugkanam ame tepam junaka amina, tura amee weantu ainancha susartinaitjai.

¹⁴ Tura amee weantu ainaka yaikim nekapmamainchauwa iman pampagkartinaiti. Tumawaru asar etsa watainmani, etsa akatainmani, nujinmani tura nugkanisha shiakar matsamsartinaiti. Amina, tura amee weantuncha pegkernum yaigku asan, chikich nugkanmaya ainancha pegkernum ashi yaigkartinaitjai.

¹⁵ Wii amijaigka pujajai, ame tuig wetaam nuisha pujuttajai, tuma asan ataksha juig itaattajme. Amina taja nunaka umitskeka inaimaitsujai”, tusa tinaiti.

¹⁶ Jacob kanú tepau shintaar chichaak: “Nekas Yuuska jui pujawai, wika junaka nekachmajai”, tusa tinaiti.

¹⁷ Tusa senchi ashamak chichaak: “Ju nugkaka shir pegkeraiti. Yuusa jeegka jui awai, tura nayaimpin waitirisha juig awai”, tusa tinaiti.

¹⁸ Tuma tsawaar káshikmas nantaki kaya atamrukmaurin juki awajas, aceitejai ukatak juka jui tuke atii, tura shuar aina wainainaksha Jacob jui nayaimpinmaya shuar ainan wainkauwaiti tutai atii, tusa tinaiti.

¹⁹ Tura nu nugkanam yaunchukka yaakat Tsaaptin tutain Jacob, Betel anaikauwaiti. “Betel ta nunaka Yuusa jee taku tawai”.

²⁰ Tura nuna umik Jacob chichaak: “Yuus wijai wekakka, tura ju weamunmasha kuitamruk, wii yuatnuncha, nugkurtinnasha surusmataigka,

²¹ tura wina aparu jeen waketkun chicham atsamunam pegker jeanka, Yuuska wina Yuusur atatui tusan titatjai”, tusa tinaiti.

²² “Wii ju kayan awajsan ikuaj juka amina jeem atatui. Yuusa ame surusmau aina cien akaigka diez akankan tuke sutinaitjame”, tusa tinaiti.