Génesis 27 - New Testament with Old Testament portions

Isaac Esaún kuntin maam inarkam itartita tusa timau

^1-2 Isaac shir untach jasu asamtai ji kusurauwaiti. Chikich tsawantin nina uchirin iwairin Esaún untsuk chicharuk: Wika yamaika shir untach jasjai, turasha urutaik jakataj nunaka nekatsjai.

³ Tuma asamtai ame kuntin maatairam jukim weme kuntin maam itaata.

⁴ Turam wii wakeraj turusmek inarkam itartita. Turawakmin nuna yuan, eke jatsuj juig pegkernum chicharkatjame, tusa tinaiti.

⁵ Isaac Esaún aujeamun Rebeca antukuiti. Tuma asa, Esaú kuntinan maattsa wematai,

⁶ Rebecasha Jacobon chicharuk: Amina apa, yatsumin Esaún

⁷ kuntin maam itaam wii wakeraj turusmek inarkam itartita yuatjai, turan eke jatsuj juig Yuusa naarin pachisan pegkernum chicharkatjame tu aujun anturkajai.

⁸ Tuma asamtai uchiru wii amina titatjam nu metek umirtukta.

⁹ Tagku matsatmaunam weme, cabra uchiri pegker iisam jimar itaata. Turawakmin apa wakera turusnak inarkatjai.

¹⁰ Turamtai ame jukim apa ejétim susata. Turam nuna yua eke jatsu nuig amina pegkernum chichartamkati, tusa tinaiti.

¹¹ Tama Jacob nukurin chicharuk: Wina yatsurka urennaiti. Antsu wika urenchauwaitjai.

¹² Tumau asamtai wina apar takas iiras nekara, wishikrakum aitkararme tusa pegkernum chichartutsuk, pegkerchaunam chichartumainaiti, tusa tinaiti.

¹³ Takai nukuri ayak: Uchiru, amina pegkerchaunam chichartamkamtaisha nuka wini juakti, tumatin asamtai wii tajam nutiksamek jimar cabra itartita, tusa tinaiti.

¹⁴ Tama Jacob we cabra uchirin jimaran maa nukurin itarnaiti. Turamtai Isaac wakeramun turusag inartukuiti.

¹⁵ Tura Esaú nugkutairi pegker atatmaun juki Jacobon anugkrauwaiti.

¹⁶ Tura Jacobo urennuchu asamtai kuntunam, tura kuntujnumsha cabra uren apujtusuiti.

¹⁷ Tura yutai inarkamun panjai juki susauwaiti.

¹⁸ Turam nuna juki aparin jeari chicharuk: ¡Apaachia! tusa tama Isaac ayak: Uchiru amesha yaitam jui pujajai, tusa tinaiti.

¹⁹ Tama Jacob aparin ayak: Wika Esaúwaitjai. Amina uchiram iwairiyaitjai. Ame turutmam nunaka umikjai, wait aneasam nantakim ekeemsam kuntinan maan inarkan itaj ju yuata. Turam pegkernum chichartukta, tusa tinaiti.

²⁰ Tama Isaac uchirin chicharuk: ¿Iturkamea ima wárisha kuntincha wainkaume? tusa tama Jacob ayak: Amina Yuusrum, kuntinan yupichun surusai, tusa tinaiti.

²¹ Takai Isaac chicharuk: Nekas wina uchir Esaúwashitam, taata takasan iistajme, tusa tinaiti.

²² Tusa tama Jacob aparin jearnaiti. Turam Isaac takas iis chicharuk: Chichamurmeka Jacobon chichamejai meteketi, antsu kunturmeka Esaú kunturijai meteketi, tusa tinaiti.

²³ Esaú kunturijai metek urentin asamtai nekaachuiti. Tura asa pegkernum chicharkattsa,

²⁴ ataksha iniak: ¿Ame nekas wina uchir Esaúkaitam? tusa tamasha Jacob ayak: Ee wika Esaúwaitjai, tusa tinaiti.

²⁵ Takai apari chicharuk: Uchiru ame kuntin maam inaraam itam nu surusta yuatjai, turan pegkernum chicharkatjame, tusa tinaiti. Tama yutain, tura vinoncha susauwaiti, turam yua, tura umar,

²⁶ uchirin chicharuk: Uchiru, tantam kugkuntsata, tusa tinaiti.

²⁷ Tama jeari kugkuasuiti, turam Isaac nina uchiri jaanchrin kugkuntin nekapruruiti. Tura pegkernum chicharuk: “Wina uchirun kugkuntiyaiti, Yuus pegkernum yainmaku asamtai, ikam kugkua numamtuk kugkuame.

²⁸ Yuus yumin yutumtikattawai. Turamtai trigo, tura vinosha nukap arutramtinaiti.

²⁹ Shuar aina nukap takartamiartinaiti. Tura shuar ainaka amina anturtamiartinaiti. Amina pegkerchau amajtamainaka nitasha pegkerchau amajeam artinaiti. Antsu amina pegkernum yainmainaka nitasha pegkernum yayám artinaiti”, tusa tinaiti.

³⁰ Tusa pegkernum chicharkam Jacob jinki yama weai, Esaúsha kuntinan maa taawaiti.

³¹ Tura inarak juki aparin ejéti chicharuk: ¡Apaachia! kuntinan maan inarkan itaj ju nantakim yuata, turam pegkernum chichartukta, tusa tinaiti.

³² Tama Isaac iniak: ¿Amesha yaitam? tusa tinaiti. Tama ni ayak: Amina uchiram Esaú iwairiyaitjai, tusa tinaiti.

³³ Tama Isaac enentai jearchauwaiti. Tuma Esaún chicharuk: Turasha ¿kuntinan maa ju yuata tusasha ya itartiya? Wika ame tatsminig nuna yuan nu shuaran pegkernum chicharkamjai. Turamu asa yamaika ni pegkernum chicharkamu juakai, tusa tinaiti.

³⁴ Tama Esaú senchi wake mesemar nekapu asa útuk: Apaachia winasha pegkernum chichartukta, tusa tinaiti.

³⁵ Turasha Isaac ayak: Amina yatsum taa, tsanura ame pegkernum chicharnamainnaka ni pegkernum chicharnakai, tusa tinaiti.

³⁶ Tama Esaú chichaak: ¡Ima nekasketsuk Jacob anaikaru ainatai! ¡Yamaika jujai jimaraa tsanurayi! Wii iwairi asan jumainaitaj nuna yama nagkamchak jurutkinaiti. Tura yamaisha wii pegkernum chicharnamainan ni pegkernum chicharnakai. ¿Wina pegkernum chichartumainka chikichkiksha ikurtuschaumek? tusa tinaiti.

³⁷ Tama Isaac Esaún ayak: Wii yatsumnaka amina apuram amajsajai, amina yatsumka inattame. Tura pataim ainasha amina chichamrumin anturtamin arti, trigo tura umutai vino ainasha nukap arutramtinaiti tusan timajai. ¿Uchiru amincha wari titajmek? tusa tinaiti.

³⁸ Tama Esaú aparin chicharuk: ¿Apaachia wina pegkernum chichartumainka chikichkiksha arutramtsuak? Winasha pegkernum chichartukta tusa senchi útnaiti.

³⁹ Tama Isaac chicharuk: Ameka ju nugkanam árak shir tsapauwa nu ikukim yumi yutushtainam yaja pujustinaitme.

⁴⁰ Ame nagkirmijai nepetmasam pujakum yatsum inatai atinaitme. Turasha ame kakaakmeka agkanmatnaitme, tusa tinaiti.

Jacob Haránnum wemau

⁴¹ Jacob pegkernum chicharnaku asamtai, Esaú yachin kajerak chichaak: Wina apar jakamtai yatsurun maatjai, tusa tinaiti.

⁴² Tamaun Rebeca antuk, Jacobon untsuk chicharuk: Amina yatsum Esaú mantamattsa wakerawai.

⁴³ Tuma asamtai, uchiru wina umaar Labán Haránnum puja nui wetá.

⁴⁴ Tumam nui pujamin yatsum kajertamka nuna tsagkurmatai,

⁴⁵ wii chichaman akuptuktatjame. Chikichik tsawanta nuik jimar uchi megkaaturkati tusanka wakeratsjai.

⁴⁶ Tusa Rebeca Isaackan chicharuk: Heteo ainan nawantrin Esaú nuatkamu aina nuna nakita asan, shir enentaimsan pujuschamnau nekapeajai. Tuma asan Jacobsha heteo shuaran nawantrin nuatkaigka wika jamainaitjai, tusa tinaiti.