Génesis 25 - New Testament with Old Testament portions

Abraham Seturain uchin akigmau

¹ Abraham nuwan chikichnasha Setura naartinan nuatkauwaiti.

² Nuna uchiri ainaka: Zimram, Jocsán, Medán, Madián, Isbac tura Súa, nu ajakaruiti.

³ Jocsánka, Sebán Dedánjai akiawaiti. Dedánkan uchiri ainaka: Asureo, Letusim tura Leumim, nu ajakaruiti.

⁴ Madiánkan uchiri ainaka: Efa, Efer, Hanoc, Abida tura Elda, nu ainaka Setur weantu ajakaruiti.

⁵ Abraham nina warírinka Isaackan ashi susauwaiti.

⁶ Tura chikich nuwanam uchi akigmau ainanka warí ainan susa, Isaac pujamun ikumtiki etsa watainmani nugka amaunam ishiakuiti.

Abraham jakamtai ikusmau

⁷ Abrahamka ciento setenta y cinco uwí pujusuiti.

⁸ Tuma uuntach jas jakauwaiti. Tuma nina uuntri jina ainajai iruuntrauwaiti.

⁹ Abraham jakamtai, Isaac, Ismaeljai jukiar, Efrón Sóaran uchiri heteo shuaran nugke Mamrénam etsa watainmani amaunam, Macpelanam ikusaruiti.

¹⁰ Nu nugkanka Hettan uchirinun Abraham sumakuiti. Nuig nina nuwe Sarajai ikuntsauwaiti.

¹¹ Abraham jaka ai Isaackan Yuus pegkernum yaigkuiti. Isaacka yumirmatai “Tuke puju, tura wina kuitamrin” tutainam ayaamas pujusuiti.

Ismaelan uchiri aina

^12-16 Sara inatain Egiptonmaya nuwan, Agar naartinnum Abraham Ismaelan akiawaiti. Tura Ismaelan uchiri aina: iwairigka Nebaiot naartin ajakuiti. Nuiya Cedar, Adbeel, Mibsam, Misma, Duma, Massa, Hadar, Temá, Jetur, Nafis tura Cedema. Ismaelan uchiri doce ajakarua nuka nugken, tura yaaktarincha nita naarinak anairaru ainawai. Tura doce apu ajakaruiti.

¹⁷ Ismael ciento treinta y siete uwí pujus jakauwaiti. Tuma nina uuntri jina ainajai iruuntrauwaiti.

¹⁸ Tumamtai nugka Havilanam nagkamas Shurnum matsamsaruiti.

Isaackan nuwe Rebeca uchin jimamramu

¹⁹ Abrahaman uchiri Isaac pachisa timau.

²⁰ Betuelan nawantrin Labánkan umain arameo shuar aina Padán-aramnum matsama jakarua nuiyan Isaac cuarenta uwí pujus Rebecan nuatkauwaiti.

²¹ Rebeca uchin jurechu ajakuiti, tumau asamtai nuna pachis Isaac Yuusan aujsauwaiti. Turam Yuus, Isaackan umirkauwaiti. Nunikmatai Rebeca ajaprukuiti.

²² Uchi jimar asar ampujnum egkemsar senchi muchitaina, imaniakai: Ju imajnaisha wisha uruk pujustajak tu enentaimu. Tuma asa Yuusan iniastasa wuwaiti.

²³ Tusa nuna pachis Yuusan iniasuiti. Turam ni ayak: Mai uunnak yaaktamkartin aina ampujmin uchi jimar egketaina asar, kajernainak imatikramainawai. Jimar uchia nuiya chikichik ima senchirtin atinaiti. Uchiram emkauka ekeun anturtinaiti, tusa tinaiti.

²⁴ Tsawantri jeaamtai Rebeca uchin jimaran jureruiti.

²⁵ Iwairigka kapantu, tura ure jasu akinawaiti. Nunaka Esaú anaikaruiti.

²⁶ Tura chikishcha patatkau nina yachi Esaún sagkanin achitkau jinkinaiti. Tuma asamtai Jacob anaikaruiti. Isaac sesenta uwí ejé pujai Rebeca uchin jureruiti.

²⁷ Uchi mai tsakararuiti. Esaúka kuntinan main ajakuiti. Antsu Jacobka jea pujutnak wakerujakuiti.

²⁸ Isaacka Esaú kuntin maamun yu asa, nina ima senchi ane jakuiti. Antsu Rebeca Jacobon ima senchi ane jakuiti.

²⁹ Chikich tsawantin Jacob yutain inareak pujai, Esaú kuntinan maattsa wu senchi tsukar taawaiti.

³⁰ Tuma chicharuk: Winasha inarkaum nu wait aneasam ajamrusta yuatjai, senchi pimpikin, tura tsukamakun tajame, tusa tinaiti. Yutai inarkamu yuamunam Esaú Edom anaikaruiti.

³¹ Tama Jacob ayak: “Ame iwairi asam jumainaitam nu wina surusta”, tusa tinaiti.

³² Tama Esaú chicharuk: ¿Warinma winasha wii iwairi asan jumain ainasha yainkattawa? Wii nuna surimaknaka tsukarui jakattajai. Nuka ame jukitin atá, tusa tinaiti.

³³ Timatai Jacob chicharuk: “Ame nekas umiktatkumka, ame jukitin atá tusam yamai tsawanta juik Yuusa naari pachisam turutta”, tusa tinaiti. Tama nisha ayu tusa ni iwairi asa jumainnaka, Jacobon susauwaiti.

³⁴ Turam Jacobo pankan, tura lentejancha Esaún susauwaiti. Turam yua, tura umutaincha umar weak: Ni iwairi asa jumaintri ainanka pachikchauwaiti.