Génesis 24 - New Testament with Old Testament portions

Abraham Isaackan nuwe atinan eakmau

¹ Abrahamka shir untach jasun, Yuus pegkernum yaigkuiti.

^2-4 Turamu asa Abraham nina inatairi uuntan, nina waríri ainan kuitamnun chicharuk: “Wina uchir Isaacka Canaánnum wii pujaj juiya nuwan nuatkati tusamka tsagkamkaipa. Antsu wina nugkarui weme wina pataar ainanmaya nina nuwe atinka eatkata. Tura ame tame nunaka metek umiktatjai takum, apu Yuus nayaimpin, tura nugkancha najanawa nuna naari pachisam amina uwejem wina makuru wakenmarin weakta”, tusa tinaiti.

⁵ Tama inatai ayak: “¿Turasha nuwa wijai jui winitan nakitakaisha iturkattaja? ¿Amina uchirminak ame pujau jiinkinaitam nui jukittaj?” tusa tinaiti.

⁶ Tama Abraham chicharuk: ¡Atsaa wina uchirka nuigka jukipa!

⁷ Apu Yuus, nayaimpinam pujuwa nu wina aparun jeenia, wina pataar ainajai pujai jiiruk, chicham yapajiachminun wina chichartak: “Ju nugkanka amee weantu ainan nekas susatnaitjai tusa turutnaiti. Tinu asa wina uchiru nuwe atinan jui itati tusa, nayaimpinmaya shuaran emtika akupkattawai.

⁸ Tura nuwa amijai winitan nakitakai ikukmesha, chicham umikta tinaitjam nuka agkan juaktatme. Turasha wina uchirka nuigka pegkesha jukipa”, tusa tinaiti.

⁹ Tama inatairisha nina apurin makui wakenmarin uwejen wearak chicharuk: “Ame turutam nunaka metek umiktatjai”, tusa tinaiti.

¹⁰ Tusa Abrahaman waríri pegker ainan etegkar, tura camello ainan diez yaruak, Mesopotamia nugkanam Nacoran yaaktarin wuwaiti.

^11-12 Tura yaakta aarin jeaa camello aina ayamrarti, tusa yumirmatainam ayaanas matsasuiti. Nunaka etsa akakai nuwa aina entsan shikinak, nu yumirmatainam tuke kaunin asarmatai nakak tumawaiti. Tura nui pujus chichaak: Wina apur Abrahaman Yuusriya wait aneasam yainkata, tura wina apur Abrahamsha wait anentrata.

¹³ Wika juiya nuwa aina entsan shikinak kaunkartin asamtai, yumirmatainmag pujuttajai.

¹⁴ Tura nuwan, kitamajai entsa shikikam ajamrusta umartajai titatjai. Tama ni airuk: Ju umarta, tura amina camelloram ainancha aakartajai, tusa turuttata nu Isaackan nuwe atin Ame etegkamuka atatui. Nu metek uminkamtai Ame wina apur wait anentramunka wisha shir nekaattajai tusa tinaiti.

¹⁵ Tusa Yuusan aujeak pujus, nuwa agkantu Betuelan nawantri Rebeca naartin entsa shikitairin juki winaun wainkauwaiti. Betuelka Nacoran uchiri ajakuiti, tura Nacorka Abrahaman yachi ajakuiti.

¹⁶ Rebecaka shir shiram ajakuiti, tura shuarsha takashtai ajakuiti. Iman pujau yumirmatain akaatuki entsan shikik wakettatmaun wainak,

¹⁷ inataisha tsekegki jeari chicharuk: Entsa shikikam juam nu winasha wait aneasam ajamrusta umartajai, tusa tinaiti.

¹⁸ Tama ni ayak: Ayu apu, tusa entsa shikika juki weamurin aaruiti.

¹⁹ Tura umarmatai Rebeca chicharuk: Camelloram ainancha entsan shikirkatjai, nutikam nita wakeramun umararti, tusa tinaiti.

²⁰ Tusa entsa aimka takakmaurin tagku aatainam wári yara ikuak, entsan nukapea shikikuiti turamtai camello aina umuinak irunu.

²¹ Tumakai inataigka ju nuwan Yuusash akupka tusa shir nekaattsa chichatsuk ii wajatu.

²² Tura camello aina entsan umarar umikarmatai, Abrahaman inatairi anillon orojai najanamun kijintri seis gramo aramun, tura patakemtaincha orojai najanamun kijintri cien gramon nagkaiki aramun susauwaiti.

²³ Tura chicharuk: ¿Amesha yana nawantriyaitam? Amina apa jeen ii kanumain agkantu akaigka wait aneasam ujatkata tusa tinaiti.

²⁴ Tama ni ayak: Wika Nacoran uchiri Betuelan nawantriyaitjai.

²⁵ Ina jeenka atum kanumainka awai, tura camello aina yumaincha awai tusa tinaiti.

²⁶ Tama Abrahaman inatairi tikishmar Yuusan emematuk:

²⁷ “Wina apur Abrahaman, Yuusriya ameka pegkeraitme, wina apur Abraham wait anenta asam, metek umiakum apuru yachi jeen itarnume”, tusa tinaiti.

²⁸ Nuwaka tsekegki nina nukuri pujamunam jeaa, nijai chichasmaunka nukurin ashi ujakuiti.

^29-30 Tura anillon, tura patakemtaincha kuntunam mai patakeman wainak, nina umai Labánsha shuaran wainkattsa yumirmatainmani tsekegnaiti.

³¹ Tuma jeari chicharuk: Ame pujustinan, tura camello aina matsamsatnun iwaraj aisha ¿urukamtaig aasha pujustam? Yuus pegkernum yainmaku asamtai, wina jearuin taata, tusa tinaiti.

³² Tama ayu tusa jea wearuiti. Tura jea jeaawarmatai, Labán camello ainan atik ayurkama, tura Abrahaman inatairin nijai yujainajaimak nawen nijakarti tusa entsan shikik itarnaiti.

³³ Tura yuatnuncha inarak umik ju yuatarma tusa tama, Abrahaman inatairi chicharuk: Wika chicham tumain aruta juna amina ujatskeka yuashtatjai, tusa tinaiti. Takai Labán chichaak: Ujatkata, tusa tinaiti.

³⁴ Tama ni chicharuk: Wika Abrahaman inatairiyaitjai, tusa tinaiti.

³⁵ Yuus wina apurnaka pegkernum yaig wiakchamtikawaiti. Tura asa oveja ainan, vaca ainan, oron, kuitan, inatai aishmag ainan, inatai nuwa ainan, camello ainan, tura burro ainancha susauwaiti.

³⁶ Tura nina nuwe Sarasha uunmatnum uchi aishmagkun jureruiti. Tura ninu ainanka uchirin ashi susauwaiti.

³⁷ Wina apur, Yuusa naarin umiktajai tusa tama chichartak: Wina uchirka Canaánnum wii pujaj juiya nuwan nuatkati tusamka tsagkamkaipa.

³⁸ Antsu wina aparu jeen weme, wina pataar ainanmaya, nina nuwe atinka eatkata tusa turutmayi.

³⁹ Tusa turutkai wii chichaakun: Apuru, nuwa wijai winitan nakitakaisha iturkattaja tusan timajai.

⁴⁰ Tama ni chichartak: Yuusan wii umiraj nu, nayaimpinmaya shuaran amijai akupkattawai. Turamtai ameka shir jeattame, tura wina uchiru nuwe atincha wina pataar ainanmaya jukim jui itaattame tusa turutmayi.

⁴¹ Tura ame wina pataarui jeaam nuwa sumamin suramsacharmataisha chicham umikta tinaitjam nuka agkan juaktatme tusa turutmayi.

⁴² Turutin asamtai yumirmatainam tana apu Yuusa nuna aujkun: Wina apur Abrahaman Yuusriya, ame wii wekataj nu yainkattsam nekas wakerakmeka,

⁴³ wii yamai pujaj jui nuwa taa entsan shikik waketkai chicharkun: Entsa shikikam juam nu winasha wait aneasam ajamrusta umartajai tusa tama

⁴⁴ ni airuk: Umarta, tura camelloram aina umartinnasha entsan shikirkartajai, tusa turuttata nu wina apurun uchiri nuwe atin ame etegkamuka atii tusan

⁴⁵ nijai chichakun pujai, Rebeca entsa shikitairin juki yumirmatainam tanta entsan shikik waketkai chicharkun: Entsa shikikam juam nu winasha wait aneasam ajamrusta umartajai tusan tajai.

⁴⁶ Tama ni chichartak: Umarta, tura amina camelloram ainancha entsan shikirkan aaktajai, tusa wina aatar, tura wina camellor ainancha aakai.

⁴⁷ Turamtai chicharkun: ¿Amesha yana nawantriyaitam? tama ni airuk: Wika Nacoran uchiri Betuelan nawantriyaitjai tusa turutui. Takai anillon, tura patakemtaincha jimaran susajai.

⁴⁸ Turan wina apuru patai ainanmayan Isaacka nuwe atinan eakti tusa itara asamtai, wina apuru Abrahaman Yuusriya nuna emematjai, tusa tinaiti.

⁴⁹ Tusa atumsha wina apur Abraham pegker amajsattsarum wakerakrumka turuttarma. Antsu nutikmaitsuji turutkurminka, iturmainkitaj nunaka wii nekaatjai, tusa tinaiti.

⁵⁰ Takai Labán Betueljai chichainak: Yuus turamuka pegkeraiti, tuma asamtai pegkerchauwaiti tumaitsuji.

⁵¹ Yuus timauwa nu umiakum, amina apurmin uchiri nuwe atin Rebeca jukim wetá tusar tiaruiti.

⁵² Tuinakai Abrahaman inatairi Yuusan ememattasa tsuntsumawaiti.

⁵³ Tuma Yuusan ememati inaiyak: Oron, kuitan, tura nugkutai jaanch ainancha Rebecan susauwaiti. Tura nina umaincha nukurijai warí ainan susauwaiti.

⁵⁴ Nuna umik iruuntsa wekamurijai yurumkan yuawar, tura umutaincha umarar kanararuiti. Tuma tsawakai inatai chichaak: Yamaika apurmin jeen waketkita tusarum turuttarma.

⁵⁵ Tutai umaintin nukurijai chichainak: Diez tsawan pujusmatai jukitarma, tusa tiaruiti.

⁵⁶ Tuinakai inatai chichaak: Winaka juigka nukap tsawanka emettuawairpa, Yuus winaka pegkernum yainkau asamtai, apurmin jeen waketkita tusarum turuttarma, tusa tinaiti.

⁵⁷ Takai nita chichainak: Nuwa untsuka iniasmi, nisha warittig tusa tuina.

⁵⁸ Tusar Rebecan untsukar itan amesha ¿ju shuar aina jujai wetasam wakeramek? tusar inina. Tama ni aimuk: Ee wakerajai, tusa tinaiti.

⁵⁹ Timatai Abrahaman inatairi nijai iruuntsa wekamurijai waketkai, Rebecan nina kuitama tsakatmarujai akupenak:

⁶⁰ Pegkernum chicharainak: Ameka shir nukap uchirmaktinaitme, tura amee weantu ainaka nita shuarincha nepetin artinaiti tu chicharkaruiti.

⁶¹ Tiarmatai Rebecan nina kuitama tsakatmarujai camellonam ekeemak Abrahaman inatairijai wearuiti. Abrahaman inatairi Rebecan tu jukinaiti.

⁶² Isaac Négueb nugkanam puju asa, yumirmatai “Tuke puju, tura wina kuitamrin” tutainmaya waketkinaiti.

⁶³ Tuma Isaac kiarai wekajkama camello wininan wainkauwaiti.

⁶⁴ Tura Rebecasha iimsatajkama Isaackan wainak camellonmaya akaiki,

⁶⁵ Abrahaman inatairin iniak: ¿Au shuar ina igkunmaktasa wina ausha yaita? tusa tinaiti. Tama auka wina apuruiti, tusa tinaiti. Tama jaanchin juki yapin ajakuiti.

⁶⁶ Inatai Isaackan igkug ni wekaasa nunikmaurin ashi ujakuiti.

⁶⁷ Nutikam Isaac, Rebecan juki nina nukuri jeen ejé nuatkauwaiti. Tura Isaac Rebecan ima senchi aneak, nukuri jakamtai útmaunka inaisauwaiti.