Génesis 23 - New Testament with Old Testament portions

Sara jakamtai ikusmau

¹ Saraka ciento veintisiete uwí pujusuiti.

² Tuma Canaán nugkanam yaakat Hebrónnum jakauwaiti. Tumamtai Abraham Saran aneak útnaiti.

³ Abraham nina nuwe jakamtai Hettan uchiri ainan chicharuk:

⁴ Wika chikich nugkanmaya shuaraitjai. Turasha wait aneasrum nugka surustarma, nuwarun ikurmastajai, tusa tinaiti.

⁵ Tama Hettan uchiri aina Abrahaman chicharainak:

⁶ Apu, wait aneasam anturkartukta. Ii ainaj juiya, Yuus etegkamumka ametme. Tuma asam nuwem jaka nuka ina ikumatairi pegker aina nui ikusta. Chikichik shuarkesha ii ainaj juiyagka ni ikumatairin suritrammainka pegkesha atsawai, tusa tiaruiti.

⁷ Tutai Abraham wajaki Hettan uchiri ainan yaaktarini tsuntsumaa

⁸ nitan chicharuk: Atumsha wina nuwar jaka juna ikusat tusarum wakerakrumka, wait aneasrum wina pachittsarum Zohar uchiri Efrón aujtursatarma.

⁹ Nina nugken yantamen ikumastin Macpelanam nugka taimu a nuna kuitjai surusti, urutam akik turuttig takaisha imatiksanak akikan, nu ikumatain nerennuri jastatjai, tusa tinaiti.

¹⁰ Takai Efrónsha nui pujau asa nina patai ainan, tura chikich shuar ainasha anturtukarti tusa Abrahaman ayak:

¹¹ Atsaa, apuru wait aneasam anturtukta, wina pataar ainasha antuinamunam tajame, nugkanka tura waancha antranak amastajme. Turamtai amina nuwem jaka nusha ai ikusta, tusa tinaiti.

¹² Tama shuar ainan emtin Abraham tsuntsumaa

¹³ Efrónkan ayak: Wait aneasam winasha anturtukta. Nugka urutam akikkit imanun akikmakan wina nuwar jaka nuna ikustasan wakerajai, tusa tinaiti.

¹⁴ Tama Efrón ayak:

¹⁵ Apuru anturtukta, nugka akikkrigka cuatrocientosaiti. Nu pachisrika chichaa pujuchmi. Amina nuwem jaka nuka ikusta, tusa tinaiti.

¹⁶ Tama Abraham Hettan uchirisha wainainamunam Efrón timaunka imatiksag akikuiti.

¹⁷ Tura Efrónkan nugke Mamrénam etsa watainmani Macpela a nuka, nina uuntri wa umikmauwa nujai, ashi númi nina uuntrinu aina jukimujai, nuiyasha ashi nina yaaktarin nagkatkamunmaya ainajai,

¹⁸ Abrahamnau jasuiti. Hettan uchiri ainasha wainainamunam, tura shuar yaaktan waitirin matsatainasha wainmaunam nugkan sumakuiti.

¹⁹ Tura Abraham nina nuwe Sara jakaun juki Macpela Mamrénam Hebrón tutai Canaán nugkanam a nui ikusuiti.

²⁰ Nui nagkama nu nugkaka, tura nui wa auka Abraham ikumatai jasuiti.