Génesis 22 - New Testament with Old Testament portions

Yuus Abrahaman nekapsattsa untsukmau

^1-2 Ashi nuna inagkar pujaun, Yuus Abrahaman nekapsattsa chicharuk: Amina uchiram Isaac chikichik asamtai, senchi anenaitam nu jukim, Moria nugkanam wetá. Tumam wii nugkan inaktustatjam nui jeaam, uchiram maam epeakum wina emematrita, tusa tinaiti.

³ Tama tsawaar káshikmas nantaknaiti, tuma ekemaktinan chigkimin nukap tsupir burrorin aentsak, nina inatairi jimaran juki, tura nina uchirincha juki Yuus timaunam wuwaiti.

⁴ Tuma tres tsawanta jui, Abraham ni jeatnuri jeashat atatmaun wainkauwaiti.

⁵ Tura nina inatairi jimar ayakmaurin chicharuk: Atumka jui burrojai juaktarma. Tumarmin Yuus emematir waketkir taattaji, tusa tinaiti.

⁶ Tusa nitanka nuig ikuinak: Ekemaktinan chigkimin uchirin aentsak, jina akaa kuchiijai apatak juki wearuiti.

⁷ Tuma Isaac nina aparin chicharuk: Apaachi chigkimka, tura jisha juaji. ¿Turasha maa epeakur Yuus ememattincha ovejasha tui pujawa? tusa tinaiti.

⁸ Tama apari ayak: Uchiru, maa epeatnunka ovejan Yuus amastatji, nutikramamtai nu maa epeakur Nigka ememattatji tusa tinaiti. Nuna tusa inaiyak uchirijai wuwaiti.

⁹ Tumawar Yuus timaunam jeawar Abraham uchirin maa epeatnun najana chigkimin pataruiti, tura uchirin jigkar patasuiti.

¹⁰ Tura Abraham uchirin maattsa kuchiirin juki ijutaj taun,

^11-12 Yuusa inatairi nayaimpinmaya shuar, nayaimpinam pujusag chicharuk: ¡Abrahama uchirmeka maatsuk inaisata! Ame Yuus ima senchi anea asam, amina uchiram chikichkia nu suritkachum nunaka nekayi, tusa tinaiti.

¹³ Tama Abraham iimsatajkama oveja aishmag numi kanawen kachurin tujig wajaun wainak, uchiri maattsa pujurmaunka inaiyak, nuna juki maa epeawaiti.

¹⁴ Turamu asa Abraham nu nugkan naarin “Atsumamunka Yuus sukartawai” tu anaikauwaiti.

¹⁵ Yuusa inatairi nayaimpinmaya shuar, nayaimpinam pujusag Abrahaman ataksha chicharuk:

¹⁶ Yuus chichaak, wika metek umin asan wiki pachisan tajame: Amina uchiram chikichkia nu suritrukchaume.

¹⁷ Tura asaakmin shir nukap yaigtinaitjame. Tura amee weantu ainancha ya tura yaikim nekapmamainchauwa iman amajkartinaitjai. Tura nitaka shuarincha tuke nepetin artinaiti.

¹⁸ Ame wina umirtuku asaakmin amee weantu ainan pegkernum yaigku asan, chikich shuar ainancha pegkernum yaigkartinaitjai, tusa Yuus turamui tinaiti.

¹⁹ Tama Abraham nina inatairi matsatmaunam waketki jeaa nitajai iruunar nina pujutairin Beersebanam waketkinaiti.

Nacoran uchiri aina

^20-22 Abraham nui pujus, nina yachi Nacoran nuwe Milca ocho uchin jurerai tamaun antukuiti. Nuka ju ainawai: Us, Buz, tura Kemuel, Kemuelka Araman apari ajakuiti. Tura nuiya akinawaiti Quesed, Hazo, Pildas, Idlaf tura Betuel,

²³ Betuelka Rebecan apari ajakuiti.

²⁴ Tura nuiyasha Nacor chikich nuwen Reúma naartinnum cuatro uchin akiawaiti. Nuka ju ainawai: Teba, Gaham, Tahas tura Maaca.