Génesis 21 - New Testament with Old Testament portions

Isaac akinamu

¹ Yuus Saran anajmatamurin imatiksag umikuiti.

² Sara Abraham untach jasa aig Yuus tina tumasag uchi aishmagkun Abrahamnaun jureruiti.

³ Tumamtai Abraham uchirin Isaac anaikauwaiti.

⁴ Tura ocho tsawan ejémtai, Yuus timaun turusag umiak Isaackan kati mushuken tsupirkauwaiti.

⁵ Abraham cien uwín ejé pujai Isaac akinawaiti.

^6-7 Sara chichaak: “Yuus winaka wishimtikrurai Abrahaman nuwegka uchinka juremaitsuapi tu enentaimtamaitkun, Abrahamsha untach aig uchin juretrajai. Wii uchin jureru asamtai, nitasha shir anenak wijai wishirartatui”, tusa tinaiti.

Abraham Agaran Ismaeljai jiiki awemamu

⁸ Uchi uunmarmatai muntsun utsurkar, Abraham yutain nukap umik jiistamruawaiti.

⁹ Turakai egiptonmaya nuwanam Abrahaman uchiri akinawa nu, Isaackan wishikun Sara wainkauwaiti.

¹⁰ Tura Abrahaman chicharuk: Nuwa inatainam uchi akinawa nuka wina uchirjai metek amina waríram aina nunaka jumaitsui. Tuma asamtai ju nuwa wii inatai puja juka uchirijai jiikim awemata, tusa tinaiti.

¹¹ Tama Abraham nina uchirin enentaimtus senchi wake mesemar nekaprauwaiti.

¹² Turasha Yuus chicharuk: Amina uchiram tura nuwa amina inatairmesha iturchatka enentaimtutsuk, Sara turama nuke umirkata. Amee weantu ainaka Isaackaiyag artinaiti, tusa tinaiti.

¹³ Tura amina inatairmin uchi akinawa auncha amina uchiram asamtai, nukap napamkatnaitjai, tusa tinaiti.

¹⁴ Tama Abraham káshikmas nantaki, uchi yuatnurin pankan susa, tura nuap aparmaunam entsan aimruk Agaran aentsak, uchirijai apatak aujas akupkauwaiti. Turam uchirijai aya nugkanmag Beerseba tutainam wuwaiti.

¹⁵ Tura nui jeaa entsan amuk, uchirinka númi wajamunam ejetanam apujsauwaiti.

¹⁶ Tura uchiri jan iitan nakitak ikuki menaan ekeemsauwaiti. Tuma ai uchi senchi útu.

¹⁷ Tuman Yuus anturkauwaiti. Tura nayaimpinmaya shuar nayaimpinam pujusag chicharuk: Agara uchisha ¿urukamtai aitkame? Ashamkaipa, uchi útmaun Yuus anturkayi.

¹⁸ Uchi inankim jukim itatmamtikata. Nu uchia nuiyan nukap napamkatnaitjai, tusa tinaiti.

¹⁹ Nuna tusa Yuus nuwan entsa atatmaun iwaintukuiti, nutikam nuap aparmaun juki weri aimak itan Ismaelan aaruiti.

^20-21 Yuus yayámu asa, uchika tsakar Parán nugkanam aya nugkanmag pujusuiti. Nigka shigki apunkamun ekentan yacha ajakuiti. Nui pujaun nina nukuri egiptonmaya nuwan eatak nuwemtikawaiti.

Abraham Abimelecjai chichaman umikaru

²² Nu uwítin Abimelec suntara apuri Ficoljai, Abrahaman jeari chicharuk: Ame takámun Yuus yainma nuka isha nekaji.

²³ Tuma asamtai yamai winasha Yuusan naari pachisam, wina uchir ainasha, wii weantu ainasha, tura ame yamai pujam nuiya shuar ainasha, ¿wii amina wait anentramiajam nutiksamkek wait anentrattam? tusa tinaiti.

²⁴ Tama Abraham ayak: Yuusa naarin pachisan tajame.

²⁵ Ame turutam nunaka imatiksanak umiktin asamtai, amina inatairam aina yumirmatain akinkaru aina nu awagturkita, tusa Abimeleckan tinaiti.

²⁶ Tama Abimelec ayak: Yáki yumirmatnasha najanaya nunaka nekatsjai. Tura ameksha nu pachismeka ujatkachuitme, tusa tinaiti.

²⁷ Tutai Abraham oveja ainan, vaca ainajai juki Abimeleckan susauwaiti, tura chichaman umikaruiti.

²⁸ Nuna tura Abraham siete ovejan akankauwaiti.

²⁹ Turamtai Abimelec iniak: ¿Jusha iturkatna siete ovejasha akankaume? tusa tinaiti.

³⁰ Tama Abraham ayak: Wii ovejan amaj junaka yumirmatnaka wii tainaitjai tusan jutikajai, tusa tinaiti.

³¹ Tura nu nugkanam Yuusa naarin pachisar chichaman umikaru asar, juka Beerseba atii tiaruiti.

³² Tusar Abimelec nina suntaari apuri Ficoljai, filisteo ainan nugkeen waketkiaruiti.

³³ Tumawarmatai Abraham Beersebanam númi tamarisco tutain arawaiti, tura nui apu Yuusan emematnaiti.

³⁴ Tura Abraham filisteo ainan nugkeen nukap uwí pujusuiti.