Génesis 2 - New Testament with Old Testament portions

Yuus siete tsawan tumainnum ayamrauwaiti

¹ Nayaimpin, nugkan tura nui iruna nujai ashi umikuiti.

^2-3 Tura siete tsawanta jui ayamrauwaiti. Tuma asa ni ayamramu tsawannaka pegkermamtikawaiti.

Aja Edén tutainam shuar apujsamu

⁴ Apu Yuus nayaimpin tura nugkan najanawa nuka tu uminkauwaiti. Nayaimpin tura nugkancha najanawa nu tsawantinka,

⁵ Apu Yuus yumin eke yutumtikchau asamtai, chikichik numiksha tura nupagsha pegke atsujakuiti. Tura shuar nuna takamaincha atsujakuiti.

⁶ Antsu yumi atsamunam nugkanmaya yuragkim nugkan ashi ukateak inijajakuiti.

⁷ Apu Yuus nugkan juki shuaran najanawaiti. Nutika nujinam umpua mayain egketak, iwáku amajsauwaiti.

⁸ Apu Yuus etsa watainmani Edén tutainam ajan umirak apujsauwaiti.

⁹ Apu Yuus númi nere yutai pegker ainancha tsapakti tama tsapakuiti. Tura nuna nakarin númi nere yuarka iwáku pujutai, antsu númi chikichka nere yuarka pegker tura pegkerchausha nekatai tutai wajajakuiti.

¹⁰ Ajan ukatkatin nugka Edén tutainmaya chikichik entsa jinnaiti. Nunik cuatro entsa tsegkeruiti.

¹¹ Entsa yama nagkamchak tsegkeakmaurigka Pisón naartinaiti. Nu entsaka nugka Havila tutainam oro amaunmani tenkauwaiti.

¹² Nu nugkanmaya oro ima pegkeraiti. Tura númi bedelio tutai puari pegker, tura kaya ónice tutaisha irunui.

¹³ Entsa tsegkeakmauri jimara nuka Gihón naartinaiti. Nuka nugka Cus tutainam tenkauwaiti.

¹⁴ Tura entsa tsegkeakmauri tresa nuka Tigris naartinaiti. Nuka etsa watainmani nugka Asiria tutainam awai. Tura entsa tsegkeakmauri cuatrowa nuka Éufrates naartinaiti.

¹⁵ Apu Yuus jui pujusam takákum aja Edén tutai kuitamata tusa shuaran ajanam apujsauwaiti.

¹⁶ Tura chicharuk: “Ju númi iruna juna neregka ashi yuata.

¹⁷ Turasha númi pegker, tura pegkerchausha nekatai timaj nuna neregka yuawaipa. Ame nu yuakmeka tunau jastatme”, tusa tinaiti.

¹⁸ Tusa apu Yuus chichaak: “Aishmag nigki pujakka wake mesemar pujumainaiti. Tuma asamtai nijai tsaniasa pujusa yainaiktinan najatatjai”, tusa tinaiti.

^19-20 Kuntin ainan, tura nanamtin ainancha anairati, tusa shuar pujamunam kuntin ainan apu Yuus ashi ikaankauwaiti. Turamtai ni anairauwaiti. Imanai anairamuk yamaiya juisha kuntin ainaka anaitaiyaiti. Turasha shuaran yaimain atsujakuiti.

²¹ Tuma asamtai apu Yuus shuaran senchi ikantrauwaiti. Tura nina paen jurus, ataksha ichimtuawaiti.

²² Nu aishmagkun pae jukimujai, apu Yuus ina apuriya nu nuwan najana aishmagkun susauwaiti.

²³ Turam Adán chichaak: Wina iyashur jukir, tura wina ukunchur jukir najanamu asa, nuwa tutai atinaiti, tusa tinaiti.

²⁴ Tuma asamtai shuar nuwenkugka chikichik iyashia numamtin jasu asa aparin, tura nukurin ikuak nuwejai pujustinaiti, tusa tinaiti.

²⁵ Aishmag, tura nuwasha mai misuk pujujakaruiti, tumainaksha natsaama jakcharuiti.