Génesis 19 - New Testament with Old Testament portions

Yuus yaakat Sodoman Gomorrajai ekeemakmau

¹ Etsa akaikin ai Lot yaakat Sodomanam eketu nayaimpinmaya shuar jimar winaun wainak tikishmatar tsuntsumaa

² chicharuk: Wina Apur ainata wii atumin umirnun pujau asamtai, wait aneasrum wina jearuin taatarma. Tumawakrumin entsan shikika itaamtai nawem nijakrum kanarum kashin káshikmasrum wetaarma, tusa tinaiti. Tama nita aimainak: Atsaa ika aa kanartatji, tusar tuina.

³ Tuinakaisha Lot wina jearuin kanartarma tusa imatram ayu, tusar Lottan jeen wearuiti. Tumawarmatai Lot yutain umik, tura pannasha levadurajai pachimtsuk inarkamtai yuawaruiti.

⁴ Tumawar eke kanuinatsaig Sodomanmaya shuar ainaka natsa, tura untach ainajaimak Lottan jen tenteawaruiti.

⁵ Tumawar Lottan untsuinak: ¿Ju káshia jui jimar shuar amina jeemin taawara nusha tui pujuinawa? Nu jiikiarta takastasar wakeruinaji, tusar tuina.

⁶ Tuinakai Lot nitajai chichastasa jiniak waitin shir epeni wajas,

⁷ nitan chicharuk: Wina yatsur ainata, wait aneasrum shir pegkerchauka takasairpa.

⁸ Antsu wina nawantur shuar takashtai jimar puja nuna mai jiirkitjarme, nutikamtai atum uruk wakerarmea nu umiktarma. Turasha ju shuar ainaka wina irartuinak taawarai, tusa tinaiti.

⁹ Takai nita chichainak: ¡Menaasta!, ameka chikich nugkanmaya shuaraitiatam, ina apuri najanarmeka juka aitkawairpa tukartumaitsume. Nu shuar aina pegkerchau takanmain ame pegkerchau takantsattame, tusar Lottan jen waitirinka yumpunmain amajaina.

¹⁰ Imatruinakai nayaimpinmaya shuar jeanam jimar egketu, Lottan achik awayak waitin epennaiti.

¹¹ Nutika shuar natsa aina, tura untach ainajai aa irununka wainmachu amajsaruiti. Turamu asar waitin ea yujaina.

¹² Tura nayaimpinmaya shuar aina Lottan chicharainak: ¿Amina pataim ainasha ju yaaktanam pujuinawak? Amina uchiram aina, nawantrum aina, awem aina, tura amina wari arutrama nuka ashi jukim yaakat ikukim yaja wetá.

¹³ Ju yaaktanmaya shuar aina tunaun shir senchi takainamun Yuus nekau asa, yaakat emesratarma tusa Yuus akuptamkau asamtai, emesrattaji tusar tuina.

¹⁴ Tuinakai nina awe artin pujuinan chicharuk: Ju yaaktanka Yuus emesrattawai, turatin asamtai wári jinkitarma tusa tinaiti. Takaisha antrantsuk tu wekatai tuina asar umirkacharuiti.

¹⁵ Yama tsawa ai nayaimpinmaya shuar aina Lottan chicharainak: Ju yaaktan emeseakai jakaij takumka amina nuwem, tura amina nawantrum jimar arutrama nujai jukim, wári wetá tusar tiaruiti.

¹⁶ Tamaitiat wári weachkai Yuus uwemtikrattsa wakera asamtai, nayaimpinmaya shuar aina, Lottan nina nuwejai, tura nawantri ainajaimak achikar jiikiaruiti.

¹⁷ Turawar chicharuk: Uweemrattsam wakerakmeka ukurmeka iitsuk muranmani tsekegta, tusa tinaiti.

¹⁸ Tuinakai Lot ayak: Wina apur ainata wait aneasrum tsagkurturtarma nunaka tumashtatjai.

¹⁹ Wii atumin umirin asamtai jakai tusarum wait anentrakrum uwemtikruru asaakrumin muragka tsekegchattajai, nunii wekai ju yaakat keamu amaintuk winasha mantuawai tajai.

²⁰ Yaakat shikapach a ai we uwemrati tusarum akuptuktarma, tusa tinaiti.

^21-22 Takai ayak: Ame turutu asaakmin nu yaaktanka emesrashtatjai, tusa tinaiti. Tuma asamtai nu yaaktan naarinka Sóar anaikauwaiti.

²³ Etsa yama jinai Lot yaakat Sóarnum jeawaiti.

²⁴ Nunikmatai yaakat Sodomanam, tura Gomorranam, nayaimpinmayan azufre tutain jiya numamtinjai pachimar Yuus yutumtikauwaiti.

²⁵ Nutika yaaktanam shuar matsatunka, tura árak ainajaimak ashi ijinawaiti.

²⁶ Antsu Lottan nuwegka weayat ukurin ayanma iikma wea numamtin najaanaruiti.

²⁷ Tuma ai Abraham káshikmas nantaki, ni Yuusjai chichaaku wajasmaunam wuwaiti.

²⁸ Tuma nui jeaa wajas Sodoman Gomorrajai mura shikapach ainaka yaaktajai ashi ekeemakmau asa, senchi mukuintaun wainkauwaiti.

²⁹ Lot pujamu nugkanam yaakat irunun Yuus tu emeskauwaiti. Turasha Lotnaka Abraham weantu asamtai Yuus uwemtikrauwaiti.

³⁰ Lot Sóarnum pujutan ashama asa, nawantrin mai juki jinki mura irunmaunam wa amaunam pujusuiti.

³¹ Lottan nawantri nina kain ekeun chicharuk: Ina aparigka uuntach jasai, tura ina nuattramainka juigka atsawai.

³² Tuma asamtai ina apari vino anamkar, ina aparijai takaniasar uchirmakmi, tusar tiaruiti.

³³ Tuina asar aparin vinon susar anamkar aepas, nawantri emkau aparijai takaniasuiti. Turasha nina aparigka nekamachuiti.

³⁴ Kashin tsawak nina kain ekeun chicharuk: Yamaisha ina apari anamkami, turamtai ame nijai takaniasta. Tumar nina uchiri mai jurermi, tusa tinaiti.

³⁵ Tuina asar aparin ataksha vinon susar anamkar aepas, nawantri ekeu aparijai takaniasuiti. Turasha nigka nawantrijai takaniamunka, tura nantaki weankesha nekaprachuiti.

³⁶ Lottan nawantri nita aparinun mai ajaprukaruiti.

³⁷ Tura emkau uchi aishmagkun jurer, Moab anaikauwaiti. Moabka yamaikisha moabita ainan apariyaiti.

³⁸ Tura ekeusha uchi aishmagkun jurer Ben-ami anaikauwaiti. Ben-amika yamaikisha amonita ainan apariyaiti.