Génesis 18 - New Testament with Old Testament portions

Yuus Abrahaman uchi akiattame tusa ataksha ujakmau

¹ Mamrénam númi encina tutai irunmaunam Abraham jeen waitinam pujaun, etsa tutupnira ai Yuus wantintukuiti.

² Abraham iimsatajkama tres shuar wininan wainak tsekegki aa jinki tikishmatrauwaiti.

³ Tura chicharuk: Wina Apur ainata, wina pegker enentaimturkurmeka wait aneasrum nagkatukirpa.

⁴ Entsan shikikan itaamtai nawem nijartarma, tumarum númi wakenam pujusrum ayamratarma.

⁵ Wii atumin umirnun pujamunam tau asarum, yutain itaamtai yuarum wetaarma tusa tinaiti. Tama nitasha ayu tusar tiaruiti.

⁶ Tuinakai Abraham nina jeen wayaa Saran chicharuk: Wári harina shir pegker veinte kilos tumain jukim pan najanata.

⁷ Tusa ikuak vaca matsatmaunam tsekegki jeaa, nina inatairi ainan, vaca tsakat nuweram iisrum maarum wári inarkatarma, tusa tinaiti.

⁸ Tama mantequillan, vaca muntsuri ijuraamun, tura vaca namagke inarkamujai juki ejéti apujtusuiti. Nutikam númi wakenam pujusar yuinakai ii wajatu.

⁹ Nuna yuawar Abrahaman ininak: ¿Amina nuwemsha tui pujawa? tusa tuina. Tusa tama ni ayak: Jea pujawai, tusa tinaiti.

¹⁰ Tama chichaak: Chikich uwítin ataksha irarsattajme. Turasha wika taatsaig amina nuwem Sara uchin jurertatui, tusa tinaiti. Nu tu chichaamun Sarasha Abrahaman ukurin wajas antu wajau.

¹¹ Abrahamka nina nuwe Sarajai shir untach ajakaruiti. Tumau asa Saraka nantu waintancha nagkankau ajakuiti.

¹² Tumau asa wina aishrujai unchitaj junasha uruk uchincha jurertajak tu enentaimas wishikmamrauwaiti.

¹³ Tumakai Yuus Abrahaman chicharuk: ¿Saraka ima unchitaj junasha uruk uchincha jurertajak tusag wishia?

¹⁴ ¿Yuus tujinmaincha awak? Chikich uwítin wika taatsaig Saraka uchin jurertatui, tusa tinaiti.

¹⁵ Yuus tamaun Sara antuk ashamak: “Wishirchajai, tusa tinaiti. Takai Yuus ayak: Ame wishirum nunaka wika nekajai”, tusa tinaiti.

Abraham yaakat Sodoman pachis Yuusan iniasuiti

¹⁶ Nuna tusa inaiyak: Yaakat Sodomanmani wenakai, aujsaran akupkartajai, tusa Abrahamsha nitajai wuwaiti.

^17-18 Nigka nukap shuar ainan, tura kakaram ainan apachri atin asamtai, wii nutikattaj nuna, tura ni weantu ainan pegkernum yaigtajai tinaitaj nunasha ujaktajai tusa Yuus enentaimu.

¹⁹ Wii Abrahamnaka: Nina uchiri ainan, tura ni weantu ainancha Yuusa chichame umiakrum tunauka inaiyakrum pegker ataarma tusa jintintaawarti tusan etegkawaitjai.

²⁰ Yuus Abrahaman chicharuk: Yaakat Sodomanmaya shuar aina, tura Gomorranmaya ainasha shir nukap tunaun takainamun nekajai.

²¹ Tura asan tunaun nekas takainawash tusan iisartasan wetatjai.

²² Nuna tusa jimar shuar yaakat Sodoman iisartasa wenai, Abrahamka Yuusjai juakuiti.

²³ Tuma Abraham Yuusan iniak: ¿Shuar tunaun takachu ainasha, shuar tunaun takaujai metekak ijinattam?

²⁴ ¿Nu yaaktanam cincuenta shuar tunaun takachu pujuinakaisha tsagkurtsukek ijinmainaitam? tusa tinaiti.

²⁵ Ameka ashi nugkanmaya shuar ainan tunauri nekau asam, shuar tunaun takachu aina, tunaun takau ainajai metek ijinmaitsume, tusa tinaiti.

²⁶ Tama Yuus ayak: Yaakat Sodomanam cincuenta shuar tunaun takachu pujuinakaigka nitan aneakun ijinmaitsujai, tusa tinaiti.

²⁷ Takai Abraham ataksha chicharuk: Wika nugka juki najanamu ayatan ame wina Apur aminig juna pachisan takaisha wait aneasam anturtukta.

²⁸ ¿Cuarenta y cinco shuar tunaun takachu pujuinakaisha ijinmainkaitam? tusa tinaiti. Tusa tama Yuus ayak: Cuarenta y cinco shuar tunaun takachu pujuinakaigka shuar ainanka ijinmaitsujai, tusa tinaiti.

²⁹ Takai Abraham chicharuk: ¿Turasha cuarenta shuar tunaun takachu pujuinakaisha iturkattame? tusa tinaiti. Tama Yuus ayak: Cuarenta shuar tunaun takachu pujuinakaigka ijinashtatjai, tusa tinaiti.

³⁰ Takai ataksha iniak: Apuru wait aneasam kajertukaipa. ¿Treinta shuar tunaun takachu pujuinakaisha iturkattame? tama ni ayak: Treinta shuar tunaun takachu pujuinakaigka ijinashtatjai, tusa tinaiti.

³¹ Abraham ataksha chicharuk: Wina Apuru juna takaisha wait aneasam anturtukta, ¿veinte shuar tunaun takachu pujakaisha iturkattame? Tama Yuus ayak: Shuar tunaun takachu veinte pujuinakaisha ijinashtatjai, tusa tinaiti.

³² Abraham ataksha chicharuk: Yuusa wait aneasam kajertukaipa yamaika inagnamun iniastajme ¿diez shuar tunaun takachu pujuinakaisha iturkattame? Tama Yuus ayak: Diez shuar tunaun takachu pujuinakaisha ijinmaitsujai, tusa tinaiti.

³³ Yuus Abrahamjai chichas umik wuwaiti. Tumamtai Abrahamsha nina jeen waketkinaiti.