Génesis 17 - New Testament with Old Testament portions

Yuus Abraman chicham umikta timau

¹ Abram noventa y nueve uwí ejé pujaun, Yuus wantintuk chicharuk: Yuus ashi senchirtinnaka wiyaitjai. Tumau asamtai winak umirtakum pegker atatme.

² Tura amee weantu aina nukap pampagkarti tusan, wii amijai chichaman umiktajai, tusa tinaiti.

³ Tama Abram tikishmar tsuntsumamtai Yuus chicharuk:

^4-5 Wii amijai chichaman umikmaj nuka juwaiti: Ameka nukap shuar ainan apachri atinaitme. Tumatin asam Abramka achattame, antsu yamai nagkamsamka Abraham tama atatme.

⁶ Amee weantu ainaka nukap pampagkar chikich nugka ainanmasha matsamsartin ainawai. Tura apusha jasartin ainawai.

⁷ Wii amijai chichaman umikaj turusnak, amee weantu aina atak artata nujaisha metek umiktinaitjai. Wika amina Yuusrum tuke atinaitjai, tura nita Yuusri atinaitjai.

⁸ Amina tura nita ainancha ame yamai nugka Canaánnum pujam nuna, atumnau atii tusan amastajrume. Tura wii atumin Yuusri atajai.

⁹ Nuiyasha Yuus Abrahaman chicharuk: Turasha chichaman wii umikmaj nu ame tura amee weantu ainajai metek umikta.

¹⁰ Amee weantu aina umiktinan chichaman umikmaj nuka juwaiti: Aishmag ainaka kati mushuken ashi tsupikarti.

¹¹ Atum katimi mushuke tsupiakrumka, chichaman ijai umikmaj nu iwainakrum turattarme.

¹² Uchi aishmag akinamtaigka ocho tsawan ejémtai kati mushuke tsupirnatnaiti. Tura amina jeemin pujuinan uchiri aina, tura chikich shuar kuitjai sumakmau ainasha tsupirnatnaiti.

¹³ Chicham umiktinan wii tajarum nu umiakrum tuke turittarme.

¹⁴ Turasha chicham umiktarma tusan taja nuna umiachu asa kati mushuken tsupiachuka atumjaigka pujumaitsui.

¹⁵ Nuiyasha Yuus Abrahaman chicharuk: Ame nuwemin naarigka Saraika achattawai. Yamaika nina naarigka Sara tama atatui.

¹⁶ Nina pegkernum yaigkan, niniyan chikichik uchin amastatjai. Tura nigka nukap shuar ainan nukuchri atinaiti. Tura ni weantu aina apu artinaiti, tusa tinaiti.

¹⁷ Tama tsuntsumaa shuar cien uwí aramusha: ¿Uchin akimainashit? ¿Sarasha noventa uwí ara imausha ajaprumainashit? tu enentaimas wishiruiti.

¹⁸ Tuma Abraham Yuusan chicharuk: Itursamek wina uchir Ismael pujut pegkernum yaintrukam tusan wakerajai, tusa tinaiti.

¹⁹ Tama Yuus ayak: Nekasan tajame, amina nuwem Sara chikichik uchin jurertatui, turamtai Isaac anaikattame. Tumamtai chicham tuke atinan ni weantu ainan pachisan umiktatjai.

²⁰ Ismael pachisam turutam nunasha anturkajme. Tuma asan uchiri nukap atii, tura ni weantu ainasha nukap arti tusan pegkernum yaigtatjai. Turakun doce apu ainan apachri amajsatnaitjai. Tura ni weantu aina nukap pampagkartinaiti.

²¹ Amina nuwem Sara ju uwí atata jui uchin jurertatui. Tumamtai chichaman wii umikmaj nuka Isaackain atatui.

²² Yuus Abrahamjai chichas umik waketkinaiti.

^23-27 Tumamtai Abraham nina uchiri Ismaelan, nina inatairi uchiri ainan, kuitjai sumakmau ainan, tura nina jeen takau ainajaimak Yuus timaun metek umiak, nuu tsawantinig kati mushuken ashi tsupirauwaiti. Abrahamka noventa y nueve uwín ején ajakuiti. Antsu nina uchiri Ismaelka trece uwín ején ajakuiti.