Génesis 16 - New Testament with Old Testament portions

Agar nina uchiri Ismaeljai pachisa timau

¹ Abraman nuwe Sarai uchin jurechu ajakuiti. Turasha egiptonmaya nuwa nina inatairi Agar naartin pujujakuiti.

^2-3 Tuma asamtai Sarai Abraman chicharuk: Yuus winaka uchin jurechu amajtusuiti. Turuta asamtai wina inatair nuatkam uchi akigta, turawakmin uchika winau arti, tusa tinaiti. Tinu asa, Canaán nugkanam diez uwí pujusar, Sarai Agar nuatkata tusa Abraman susauwaiti.

⁴ Turam Abram Agaran ajaprumtikauwaiti. Turasha Agarka ajamtin nekama Sarain wishiku.

⁵ Turam Sarai Abraman chicharuk: Wii amina nuwan amasmaj nu ajapruk ni ima nagkamaku enentaimtumak wina wishikrawai. Tuma asamtai iturchatcha yainig a nunaka Yuus nekawai, tusa tinaiti.

⁶ Tama Abram ayak: Ame inatairmeka aminuk asamtai, ame wakeramu turata, tusa tinaiti. Tama Sarai nina inatairin pegkerchau amaju. Turam Agarka jinki wuwaiti.

⁷ Tuma Agarka shuar atsamunam entsa nugkanmaya jiinmaunam jeaa nugkani wajaun, nayaimpinmaya shuar wainkauwaiti.

⁸ Tura iniak: Agara, Sarai inatairiya ¿tuiya winam tura tui weame? tusa tinaiti. Tama chichaak: Wii takarnaitaj nu nakitrurmatai weakun juniajai, tusa tinaiti.

⁹ Takai nayaimpinmaya shuar chicharuk: Ame takartairmin Sarain waketkim nigki umirkata, tusa tinaiti.

¹⁰ Nuiyasha nayaimpinmaya shuar Yuus akupkamu chicharuk: Amee weantu ainan nekapmamainchau napamturtatjame tusa tinaiti.

¹¹ Yuus akupkamu nayaimpinmaya nuiyasha chichaak: Ame waitamun Yuus nekartama asamtai, uchi aishmag jurertatme, nuna naarigka Ismael anaikata.

¹² Nu uchika kajen tsakar, chikich shuar ainajaisha maanin atinaiti. Tura chikich shuar ainasha nijai maanin artinaiti, tusa tinaiti.

¹³ Nayaimpinmaya shuarjai Agar chichasu asa, “Yuus wainmauwa nuwaitme”. Yuus wina waitkau aig, wika iwáku pujajai tusa tinaiti.

¹⁴ Tuma asamtai entsa yumirmatai naarincha, Tuke Puju, tura Wina Kuitamrin tu anaikauwaiti. Nu entsaka Cádes, tura Béredtan ajapeentrin ajakuiti.

¹⁵ Agar uchi aishmagkun Abramnaun jurer Ismael anaikauwaiti.

¹⁶ Abram ochenta y seis uwí ejé pujai Ismael akinawaiti.