Génesis 15 - New Testament with Old Testament portions

Yuus Abraman amesha uchi akiattame timau

¹ Yuus Abraman karanam chicharuk: “Abrama ashamkaipa, amina ayamruktinnaka wiyaitjai. Wii amina amastataj nuka shir nukap atatui”, tusa tinaiti.

^2-3 Tama Abram ayak: “Yuus Tuke Pujuwa, ¿wina uchir atsurta nuka shir nekame, ame surustatam nunasha wisha iturkattaja? Wina inatair Eliezer naartin Damasconmaya shuar wina takartak puja nu, winau ainanka ashi jukitnaiti”, tusa tinaiti.

⁴ Takai Yuus, chicharuk: Atsaa nu shuarka jukishtinaiti, antsu amina uchiram jukitnaiti.

⁵ Nuna tusa Abraman aa jiiki chicharuk: Nayaim iista, ya aina ju nekapmamainkaitam, amee weantu ainaka ya nekapmamainchauwa iman artinaiti.

⁶ Tama Abram nekaspa turutua, tusa tinaiti. Tuma asamtai Yuus, Abraman pegkera iman iisuiti.

⁷ Tura asa Yuus chicharuk: “Caldeo ainajai yaakat Urnum pujamin nugka Canaánka juna amastasan jiikmiajme nunaka wiyaitjai”, tusa tinaiti.

⁸ Tama Abram Yuusan chicharuk: Yuusa, nugka ame anajmatram nunaka winauwapi atatua tumain nekapeatsjai, tusa tinaiti.

⁹ Tusa tama Yuus ayak: Vaca, cabra, oveja tres uwí aramu, tórtola, tura paumsha ikaatrukta, tusa tinaiti.

¹⁰ Tama Abram, Yuus timaun turusag umiak, tagku ainan ikaanak nakar matsasuiti. Turasha nanamtin ainanka nakatsuk matsasuiti.

¹¹ Turamun chuag kautkattsa winitainakai Abram kik ishimu.

¹² Tuma pujau, etsa akaikimtai senchi kanaruiti. Tuma karanam shir káshi wantintam Abram ashamkauwaiti.

¹³ Tumakai Yuus chicharuk: Amee weantu ainaka, chikich nugkanam inaku waitkainam cuatrocientos uwí matsamtina nusha nekaata.

¹⁴ Turasha amee weantu ainan inainak waitkainan wisha nitan waittan susartinaitjai. Antsu amee weantu ainanka agkanmamtikan shir wiakach amajsartinaitjai.

¹⁵ Turasha ameka nuka jeatsaig, untach jasam jakatnaitme.

¹⁶ Amorreo aina tunaun takaina nuna, nu senchi tunaun takasarmatai waittan susartinaitjai. Turakun amee weantu ainanka cuatro imanii pampag jinaa nagkamasmatai chikich artina nuna, ju nugkanam ikaankartinaitjai, tusa tinaiti.

¹⁷ Etsa akaiki shir káshi jasmaunam, jiya numamtin mukuintai, ji kea numamtin keek tagku nakarmau tepenamunam ajapeen nagkamattamaun Abram wainkauwaiti.

^18-21 Yuus Abraman chicharuk: Egipto entsarinia nagkaman entsa uuntri Éufrates tutaiya imanai, quenita aina, quenizita aina, cadmoneo aina, Hitita aina, ferezeo aina, refaíta aina, amorreo aina, cananeo aina, gergeseo aina, tura jebuseo aina, nuna nugken amee weantu ainanka susattajai, tusa tinaiti.