Génesis 13 - New Testament with Old Testament portions

Abram Lotjai kanakmau

¹ Abram Egipto nugkanmaya jinki weak: Nina nuwen, ninu ainan ashi yaruak, tura nina awe Lotnasha juki Néguebnum waketkinaiti.

² Abramka orortin, jiru plata tutaisha tura tagkuri ainasha nukap arujakuiti. Iman asa shir wiakach ajakuiti.

³ Néguebnumia jinki Betel nugkanam, tura Ai nugka ajapeen etentamunam yaunchuk puju jakmaurin pujustasa waketkinaiti.

⁴ Nu nugkanam Abram tagku aina maa patasa epeatnun najanawaiti. Tura nui tagku ainan maa patas epeak Yuusan emematu jakuiti.

⁵ Lotcha ovejartin, vacartin, tura nina inatairisha irunu, tuma asa nina iichri Abramjai metek shir wiakach ajakuiti.

⁶ Turasha nita pujamuka nugka unchau asamtai, tagku aina shir nukap asar chirichirin wári amuina asarmatai, tsanig pujuschamnau nekapena.

⁷ Abraman tagkurin kuitamin aina, tura Lottan tagkurin kuitamin ainajai kajernaina. Nuiyasha cananeo aina tura ferezeo ainasha nuig matsataina.

⁸ Tumainakai Abram Lottan chicharuk: Ameka wina pataaruitme. Tumau asar ika kajernaimaitsuji. Tura amina tagkurmin kuitamin aina tura wina tagkurun kuitamin ainajaisha kajernaimain ainatsui.

⁹ Nugka agkan awai, yamaika ijaigka kanakmi, ame wakeramu iisam pujusta. Ame nujinmani weakminka wika nugkani wetatjai, antsu ame nugkani weakminka wika nujinmani wetatjai, tusa tinaiti.

¹⁰ Takai Lot iikma, nugka paka entsa Jordánnum jeakun wainkauwaiti. Turasha nuka entsa pajattrau asa, Yuusa ajari Edén ajakua numamtin yaakat Sóarnum jeaku ajakuiti. Tumau asa yaakat Egiptowa numamtin wantinu jakuiti. Nuka Sodoman Gomorrajai Yuus emeseatsaig ajakuiti.

¹¹ Lotka nugka paka Jordánnum jeakun etegkawaiti. Tura nigka etsa watainmani wuwaiti. Abram Lotjai tu kanakaru ainawai.

¹² Abramka Canaán nugkanam juakuiti. Antsu Lotka yaakat Sodomanam jeastatuk pujustasa wuwaiti.

¹³ Nu yaaktanmaya shuar ainaka Yuus umirtan nakitaina asar, shir pegkerchaun tunaun takaina.

¹⁴ Lot wematai, Yuus Abraman chicharuk: Ame nugka pujam nui nagkamam, etsa watainmani, etsa akatainmani, nujinmani, tura nugkanisha shir iista.

¹⁵ Ame nugka wainam aunka, amee weantu aina nu, tura aminuk atii tusan ashi amastatjai.

¹⁶ Tura amee weantu ainanka, yaikim nekapmamainchauwa iman amajsatnaitjai, turamu asar nekapmamainchau artinaiti.

¹⁷ Amina nugkan amastataj nuna esanti, tura wagkantisha wekatusam iista, tusa tinaiti.

¹⁸ Tama Abramka nuap jean juki, yaakat Hebrónnum jeastatuk shuar Mamré naartinnau númi encina tutai irunmaunam pujustasa wuwaiti. Tuma nui jeaa Yuusan ememattasa tagku aina maa patasa epeatnun najanawaiti.