Génesis 12 - New Testament with Old Testament portions

Yuus Abraman untsukmau

^1-3 Yuus Abraman chicharuk: Nugkem, pataim aina, tura apa jeen pujam nusha ikuakum nugkan wii inaktustatjam nui wetá. Amee weantu ainanka nukap amajsatnaitjai, tura aminka nukap shuar ainan apari atii tusan pegkernum yaigtinaitjame, tura amesha chikich aina pegkernum yain atinaitme. Amina pegkernum yainmainanka wisha pegkernum yaigkartinaitjai. Antsu amina pegkerchau amajtamainanka wisha pegkerchau amajkartinaitjai. Ame wina umirtin asaakmin, ashi shuar ainaka pegkernum yayám artinaiti, tusa tinaiti.

⁴ Abramka Yuus timaun umiak yaakat Haránnumia jinkina nuika setenta y cinco uwí ejé pujau, yaakat Canaánnum pujustasa weak:

⁵ Nina nuwe Sarain, nina awe Lottan, ninu ainanka ashi yaruak, tura inatairi ainancha yaruakuiti.

⁶ Tuma wea weakua Canaánnum jeak, Siqueman amak Moré nugkanam númi encina tutai amaunam nunii amamak, Canaánnumia aina matsatmaunam nisha pujusuiti.

⁷ Tumattamaun Yuus chicharuk: Amee weantu aina matsamsatnun ju nugkan amastatjai, tusa tinaiti. Tama tagkun maa epeak Yuus wantintukmau asa nu nugkanam tagku aina maa patasa epetain najanawaiti.

⁸ Tura ikuak yaakat Betelnum wuwaiti, tuma etsa watainmani nui nugka amaunam pujusuiti. Yaakat Betelka etsa akatainmani ajakuiti. Nui pujus ataksha yaakat Ainam tagku aina maa patasa epeatnun najanawaiti, tura nui tagku ainan maa epeak Yuusan emematnaiti.

Abram Egipto nugkanam wemau

⁹ Tura nuiya jinki Négueb nugkanam jeattsa nui pujuki nui pujuki wuwaiti.

¹⁰ Turasha Négueb nugkanam tsuka tepea asamtai, Egipto nugkanam pujustasa wuwaiti.

¹¹ Abram Egiptonam jeak nina nuwen chicharuk: Ameka shir shirmaitme.

¹² Iman asaakmin egiptonmaya aina amina waitmakar auna nuweyaiti, tusar wina mantuinak aminka jurammain ainawai.

¹³ Turutmamain asarmatai amina ininmainakaisha: Juka wina umaaruiti turutta, tusa turutkuminka mantumain ainatsui, tusa tinaiti.

¹⁴ Abram Egiptonam jeaamtai, egiptonmaya aina Sarain shir shirman wainkaruiti.

¹⁵ Tura faraónjai takau ainasha wainkar nuwan jukiar faraónka jeen ejéniaruiti.

¹⁶ Turawarmatai faraón Abraman shir anentak: Oveja ainan, vaca ainan, burro ainan, inatai aishmag ainan, nuwa ainan, asno ainan, tura camello ainancha susauwaiti.

¹⁷ Turasha Yuus Abraman nuwen faraón jurukin asamtai, ashi nina patai ainajaimak waittan susauwaiti.

¹⁸ Turam faraón Abraman untsuk chicharuk: ¿Urukamtai wina nuwaruiti tutsuksha, umaaruiti tusamsha turutmame?

¹⁹ Ame takumin wina nuwar atii tusan jukimjai. Turasha yamaika nuwem jukim wetá, tusa tinaiti.

²⁰ Tusa faraón nina inatairi ainan chicharuk: Abram nina nuwejai, tura ninu ainaka ashi jukirum Egipto nugkanam jiikkrum akupkatarma, tusa tinaiti.