Génesis 11 - New Testament with Old Testament portions

Chicham yapajinkamu

¹ Yaunchukka chikichik chichamnak chicha jakaruiti.

² Tura etsa watainmani shiakar, Simar nugkanam nugka pakan wainkar matsamsaruiti.

³ Tumawar chichainak: Ladrillo najankar jinum jikar inarkarmi tiaruiti. Tusar kayanka takatsuk, tura pachimmain atsau asamtai aya nugkanak najankaruiti. Tura asfalto tutaijai perar takasaruiti.

⁴ Tura chichainak: Chikichik yaakat ladrillo eke ekeneakuar nayaimpinam ejémi. Nu turarka kanarar chikich nugkanmaksha shiakchattaji, antsu eme anentam artatji tusar tiaruiti.

^5-6 Tu enentaimsar yaaktan takaina asamtai, Yuus chichaak: Nuu shuarak asar, tura chikichik chichamnak chichaina asar, takatan nagkamawara junaka inaisachartatui.

⁷ Tuma asarmatai chichaman yapajtukartajai, nutikam anturnaikacharti, tusa tinaiti.

⁸ Tusa Yuus chichaman yapajtuk ashi nugkanam napampaar ishiakuiti. Nutikam yaakat najantanka inaisaru ainawai.

⁹ Yuus chichame yapajtukmau asar shuar aina ashi nugkanam shiakaru ainawai. Tuma asamtai nu yaaktanka Babel tu anaikaruiti.

Sem weantu aina

¹⁰ Sem weantu ainaka ju ainawai: Nujag nujagkrua jimar uwí nagkamasu ai, Sem cien uwín ejé pujus Arfaxadtan akiawaiti.

¹¹ Tura quinientos uwín ejé pujus uchi aishmag ainan, nuwa ainajai akigkuiti.

¹² Arfaxad treinta y cinco uwín ejé pujus, Sélahn akiawaiti.

¹³ Tura cuatrocientos tres uwín ejé pujus, uchi aishmag ainan, nuwa ainajai akigkuiti.

¹⁴ Sélah treinta uwín ejé pujus Heberan akiawaiti.

¹⁵ Tura cuatrocientos tres uwín ejé pujus, uchi aishmag ainan, nuwa ainajai akigkuiti.

¹⁶ Heber treinta y cuatro uwín ejé pujus, Pélegkan akiawaiti.

¹⁷ Tura cuatrocientos treinta uwín ejé pujus, uchi aishmag ainan, nuwa ainajai akigkuiti.

¹⁸ Péleg treinta uwín ejé pujus, Reún akiawaiti.

¹⁹ Tura doscientos nueve uwín ejé pujus, uchi aishmag ainan, nuwa ainajai akigkuiti.

²⁰ Reú treinta y dos uwín ejé pujus, Serugkan akiawaiti.

²¹ Tura doscientos siete uwín ejé pujus, uchi aishmag ainan, nuwa ainajai akigkuiti.

²² Serug treinta uwín ejé pujus, Nacoran akiawaiti.

²³ Tura doscientos uwín ejé pujus, uchi aishmag ainan nuwa ainajai akigkuiti.

²⁴ Nacor veintinueve uwín ejé pujus, Tarén akiawaiti.

²⁵ Tura ciento diecinueve uwín ejé pujus, uchi aishmag ainan, nuwa ainajai akigkuiti.

²⁶ Taré setenta uwín ejé pujus, Abraman, Nacoran, tura Haránkan nu ainan akigkuiti.

Taré weantu aina

²⁷ Taré weantu ainaka ju ainawai: Abraman, Nacoran, tura Haránkan nu ainan akigkuiti. Harán Lottan akiawaiti.

²⁸ Haránka apari iwáku pujaig nina nugke ni akinamuri Ur tutainam caldeo aina matsatmaunam pujus jakauwaiti.

²⁹ Abram Saraijai nuwenawaiti, tura Nacorka Milcajai nuwenawaiti. Milca tura Iscasha Haránkan nawantri ajakuiti.

³⁰ Saraika uchin jurechu ajakuiti.

³¹ Taré yaakat Urnum caldeo aina matsamtainmaya jinki, Canaán nugkanam weak: Nina uchiri Abraman, nina tiragken Lottan, tura nina uchiri nuwe Saraincha jukinaiti. Turasha Canaánnumka jeatsuk yaakat Haránnum matsamsartasa juakaruiti.

³² Taréka Haránnum pujus doscientos cinco uwí ejé jakauwaiti.