Éxodo 9 - New Testament with Old Testament portions

Egiptonmaya tagku aina jinamu

¹ Tumamtai Yuus Moisésan chicharuk: Wetá, tumam faraón jearim chicharkum, Yuus chichartamuk: Wii etegkamu ainan jiir akupkati. Turam wina emematriarti.

² Antsu jiir akuptan nakitakaigka,

³ nita tagkuri aina pujuina nuna ijinati tusan jatan akuptuktatjai. Turam caballo aina, burro aina, camello aina, vaca aina tura oveja ainasha jinaattawai.

⁴ Turasha wii etegkamu ainan tagkuri pujuina nuka egiptonmaya tagku aina jinakaisha chikichkiksha jakashtatui.

⁵ Nuiyasha Yuus Moisésan chicharuk: Nunaka kashin turattajai tusa Yuus tawai, titá tinaiti.

⁶ Yuus timauka tumasag uminuk kashin tsawak egiptonmaya tagkuri ainaka ashi jinaawaiti. Turasha israelita ainan tagkuri ainaka chikichkiksha jakachuiti.

⁷ Faraón Israel shuar ainan tagkuri ainasha jinachariash iisrum ikutarma tusa shuar ainan akupkauwaiti. Turam israelita aina pujuinamunam jeawar chikichik tagkuksha jakachun iisar ikuinak faraónkan ujakaruiti. Turasha faraónka enentaimkachu jasu asa, jiintrarum wetarum, tusa tichauwaiti.

Egiptonmaya ainan kuchapjai waitkasmau

⁸ Tumamtai Yuus Moisésan Aarónjai chicharuk: Pan najantainam yuku a nu atsakki jukim faraón pujamunam jearum ni wainmaunam yaki nagkimata.

⁹ Turam nu nugka juyujuyuntu najanakti. Tuma Egipto nugkan enetkati, tumamtai shuar aina tura tagku ainasha kuchap jiinturam senchi najaimainak waittsartatui, tusa Yuus tinaiti.

¹⁰ Takai Moisés Aarónjai yukun juki wear, faraón pujamunam jeawaruiti. Tuma faraónkan emtin Moisés yukun yaki nagkimawaiti. Turamtai shuar ainan, tura tagku ainancha kuchap jiinturaruiti.

¹¹ Tura iwishin ainasha kuchapan achiimarar chikich ainajai metek jaina, tumaina asar nitaka turacharuiti.

¹² Turasha faraón Yuus enentaimkachu amajsamu asa, Moisésan Aarónjai umirkachuiti.

Egiptonmaya aina micha akaketka waitkasmau

¹³ Tumamtai Yuus Moisésan chicharuk: Kashin káshikmasam nantakim faraón pujamunam wetá, tumam jeari chicharkum: Yuus israelita ainati ememattai Yuus chichartamuk, wii etegkamur ainan akupkati, turawaram wina emematriarti.

¹⁴ Antsu akupeachkaigka wii Yuusaitaj imaju ashi nugkanam chikich atsa nuna nekaati tusan nina, nijai takau ainan tura ashi egiptonmaya ainajaimak waittan susartatjai.

¹⁵ Wii wakeraknaka aminka, shuar amijai takau ainan tura ashi egiptonmaya ainajaimak yaunchuk ijinan ju nugka juigka atsau amajmain amajkauwaitjame.

¹⁶ Turasha wina senchirun iwaintuktin asan, tura wina naarun pachisar ashi nugkanam etserkartin asarmatai, wii aminka apu amajsauwaitjame.

¹⁷ Wii turamu ayatkum wii etegkamu aina jiira akuptaka nakitame.

¹⁸ Tuma asaakmin Egiptonam yaunchuksha wainu jakchamun, micha kijin ainan kashin káshikmasan akaketkattajai.

¹⁹ Turatin asamtai tagku ainaka yaruakrum jeanam ashi utsaatarma, micha aina kakeak shuar aa yujainan, tura tagku aa yujainancha ijinattawai, tusa Yuus tawai titá, tusa Moisésan tinaiti.

²⁰ Timau asa Moisés faraónkan Yuus timaun turusag ujakuiti. Turamun shuar faraónjai takau aina nuna antukar ashamainak, nita inatairi ainan tura tagkuri ainajai jeanam awayawaru ainawai.

²¹ Turasha chikich aina Yuus nekas turattawapi tusa tuinachuka nita inatairi ainan tura nita tagkuri ainancha jeagka awayacharu ainawai.

²² Yuus Moisésan chicharuk: Ushukrutairam yakini inakmasta, turam micha uun aina kakeak egiptonmaya ainan, tagku ainan tura árak ainancha ijinati, tusa tinaiti.

²³ Takai Moisés ushukrutairin yakini inakmasuiti. Turamtai ipamat aina, tura charip aina uruka imatmaunam micha uun ainan Egipto nugkanam Yuus akupkauwaiti.

²⁴ Yaunchuksha tumachmaun Egipto nugkanam micha uun aina pegkesha nagkantsuk kakeyaina, tura charip ainasha tumasag charpiru.

²⁵ Imania asa shuar ainan Yuus nekas turattawapi tuinachu asar, aa yujainanka tagku ainan, tura árak ainancha ijinawaiti. Tura númi ainancha kanawen asantrauwaiti.

²⁶ Nu imaniaksha Gosén nugkanam israelita aina pujuinamunmagka chikichik michaksha iyaarchauwaiti.

²⁷ Tumamtai Moisés Aarónjai utitarma tusa shuar ainan faraón akupkauwaiti. Turam weriar Moisésan Aarónjai jukiar faraón pujamunam ejéniaru ainawai. Turawarmatai faraón nitan chicharuk: Wii tura wii shuar ainan tunau takasmaunam, Yuus waittsati turammatai waitaj nuna nekaajai. Turasha Yuus makumamainka atsawai.

²⁸ Micha aina kakeaina juna emegkarti, tusarum atum umirtai Yuus aujsatarma. Turam micha ainan emegkarmatai, nuiyagka emettsuk Yuus nita umirtain emematiarti tusan israelita ainan akupkartatjai, tusa tinaiti.

²⁹ Takai Moisés faraónkan chicharuk: Yaaktanmaya wii jiinkin uwejrun takuin Yuusan aujsattajai. Turamtai micha uun aina kakeamun tura charip aina patamusha megkaakartatui, tumamtai nugkaka Yuusnauwapita tusam nekattame.

³⁰ Turasha ame tura amijai takau ainajaimak ashammain ainan Yuus iwainturmakaisha ashamatsrum nuna nekajai.

³¹ Tura micha uun aina kakeak lino aina yagkurukarun tura cebada ainan nerekarun ashi ijinawaiti.

³² Turasha trigo ainanka tura árak centeno tutai ainanka yama arakmau asamtai ijinachuiti.

³³ Moisés faraónjai chichas nuiyag yaaktanmaya jiinki uwejen yaki takui, Yuusan aujsauwaiti. Turamtai micha uun aina kakeamunka, yumi yutausha tura ipamat ainasha megkaarauwaiti.

³⁴ Yumi yutamun, micha uun aina kakeamun tura charip ainasha patamun megkaramtai, Yuus tumattawai timau asa, faraón nijai takau ainajaimak enentaimkachu jasuiti.

³⁵ Tuma asa Yuus Moisésan ujakua tumasag faraón enentaimkachu jasu asa, israelita ainan jiintrar wearti tusa tichauwaiti.