Éxodo 7 - New Testament with Old Testament portions

¹ Takai Yuus Moisésan chicharuk: Wii aminka etegka asan, egiptonmaya apu pujamunam akupeajme. Turamu asam faraón jearim wii tumainaitaj turusmek ame chichasta. Amina yatsum Aarón ame chichakmin etsertatui.

² Wii amina titatjam nu amina yatsum Aarón ashi ujattame. Turamu asa wii etegkamu israelita aina, Egipto nugkanam pujuina nuna jiirti tusa Yuus turamui, tusa faraónkan ujattawai.

³ Turasha wii, faraónnaka enentaimkachu amajsattajai. Turamu asa yaunchuksha wainchatai aina atum iwainakrumnasha,

⁴ Yuusa senchirijaimpapi aitkainawa tusagka turamchattarme. Tumakai egiptonmaya ainan waittan suinakun, wii etegkamu aina Egiptonam pujuina nuna wina senchirjai jiiran agkanmamtikawartatjai.

⁵ Israelita ainan Egipto nugkanam pujuinan wina senchirjai jiirmatai, Egiptonmaya shuar aina wii tujinmain atsa nuna nekarawartatui, tusa tinaiti.

⁶ Moisés Aarónjai Yuus turata tusa timaunka metek umikaru ainawai.

⁷ Moisés egiptonmaya apujai chichasua nuu tsawantinka ochenta uwí arujakuiti, antsu Aarónnaka ochenta y tres uwí arujakuiti.

⁸ Yuus Moisésan Aarónjai chicharuk:

⁹ Yaunchuksha wainchatai iwainakta, tusa turamkaigka, Aarón ushukrutai juki faraónkan emtin nugka aepsata tusam titá. Nu turam nápi najaanartatui, tusa tinaiti.

¹⁰ Tusa takai Moisés Aarónjai faraón pujamunam wearuiti. Tumawar faraón pujamunam jear Yuus turata tusa timaunka turusag uminak faraónkan emtin, tura nijai takau ainasha wainainamunam Aarón ushukrutain juki nugkanam eapsauwaiti, turam nápi najaanaruiti.

¹¹ Turamtai faraónsha shuar yacha aina, tura shuar iwishin ainasha untsukrum wii puja jui ikaankatarma, tusa shuaran akuptukuiti. Turam ni pujamunam ikaankauwaiti. Turam nitasha turusag wainchatai ainan iwainakartasa:

¹² Nita ushukrutairi ainan nugkanam aepsaruiti, nu turamu aina nápi najanakuiti. Turasha Aarónkan ushukrutairi nápi najanaru nitanunka amukuiti.

¹³ Nu turamun faraón wainkasha wii enentaimkachu amajsamu asa, umirtamkashtatrume, tusa Yuus timaunka tumasag umikchauwaiti.

Yuus entsan numpa amajsamu

¹⁴ Tumamtai Yuus Moisésan chicharuk: Faraónka enentaimkachu jasu asa, israelita ainan jiira akuptan nakitawai.

¹⁵ Turasha kashin káshikmas faraón Nilo entsanam weakai, amina ushukrutairam nápi najanarua nu jukim amesha werita.

¹⁶ Tumam faraón jearim chicharkum: Wii etegkamur aina aya nugkanmag jear wina emematriarti, tusa jiir akuprati tusan timajai. Turasha yamaikisha umirtatsui turamui.

¹⁷ Turamu asa israelita ainati umirtairi Yuus chichaak: Wii Yuusaitaj nuna yamai nekarattawai, tusa turamui. Turamu asamtai wina ushukrutairjai Nilo entsan awattatjai, nuna wii turamtai entsa shir numpa jastatui.

¹⁸ Tumamtai namak aina jinaawar kaukarmatai entsa mejettawai. Tumakai egiptonmaya aina, entsan nakitainak umarchartatui, tusam titá turutmayi tusa Moisés faraónkan ujakuiti.

¹⁹ Nuiyasha Yuus Moisésan chicharuk: Aarón chicharkum, ushukrutairam entsa ainanmani, ashints ainanmani, kucha ainanmani tura entsa shikika yaratai ainanmanisha inakmasti, turamtai Egipto nugkanmaya entsa ainaka numpa ashi jasarti tusam titá, tusa tinaiti.

²⁰ Takai Moisés Aarónjai faraón pujamunam wearuiti. Tuma jeawar Yuus timaun turusag uminak: Faraón, tura nijai takau ainasha wainainamunam, ushukrutain Aarón Nilo entsan awatnaiti. Turam entsa ainaka ashi numpa jasaruiti.

²¹ Tumamtai namak aina jinaawar kaukarmatai entsa aina mejea asamtai, tura entsa ainaka numpa ashi jasaru asamtai, egiptonmaya ainaka nakitainak umuinachu.

²² Turasha egiptonmaya iwishin aina nitasha turusag Nilo entsan numpa amajsaruiti. Nuna turuina asamtai faraónka Yuus timauwa tumasag enentaimkachu jasuiti. Tuma asa Moisésan Aarónjai umirkachuiti.

²³ Tuma asa nunaka puyatrus enentaimtutsuk ni pujusa takatairin waketki jea wayawaiti.

²⁴ Egipto nugkanam ashi entsa irunuka umumainchau jasu asarmatai, entsa umumain pegker jinti, tusar egiptonmaya aina entsa yantam nugkan tainiaruiti.

Egiptonmaya ainan mukun ishitka waitkasmau

²⁵ Yuus entsan numpa amajsamu siete tsawan jeaamtai,