Éxodo 6 - New Testament with Old Testament portions

¹ Yuus Moisésan chicharuk: “Yamai faraónkan wina senchirun iwaintuktataj nu wainkattame. Nu turamu asa atumka tachamaitiat wári jiintrarum wetaarma tusa turamtatrume”, tusa tinaiti.

Yuus Moisésan ataksha Egiptonam akupkamu

² Yuus Moisésan chicharuk: “Wika Yuus Tuke Pujuwaitjai”.

³ Wii Abrahaman, Isaacan tura Jacobnasha “wika Yuus ashi senchirtin tutaiyaitjai tusan ujakaruitjai”. Turasha wina nekas naar Tuke Puju tutaiyaitaj nunaka ujakcharu ainajai. Nuwaiti wina nekas naarka, tusa tinaiti.

⁴ Nuiyasha wii nitajai chichaman umiakun nugka Canaán tutain atumi uchiri ainan susartinaitjai, tusan tinaitjai. Nu nugkanam nukap uwí pujuinaksha nitaka irara numamtuk pujusaru ainawai.

⁵ Egiptonmaya aina israelita ainan senchi takamtikainam waitainak chichainan anturkarjai. Turan nita uuntri ajakarua nujai chichaman umikuitaj nuna anearjai.

⁶ Wika Tuke Puju tutaiyaitjai. Tuma asan wii egiptonmaya ainan waittan suinakun israelita ainan aantra takamtikainam waitu pujuina nuna wina senchirjai jiiran agkanmamtikawartatjai tusa tawai tusam ujakarta.

⁷ Nitaka winau artatui, wii Yuus Tuke Pujuwaitaj nunaka nita Yuusri atatjai. Tumawartin asarmatai egiptonmaya aina inaku waitkainam pujuina nuna jiiran agkanmamtikawartatjai. Turawaram wii nita Yuusriyaitaj nuna nekarawartatui.

⁸ Abrahaman, Isaacan tura Jacobon nu ainan atumi uchiri ainan nugkan susartinaitjai tusan anajmatawaruitaj nui yaruakan nitanka, apujsartatjai. Wika Yuus Tuke Puju tutaiyaitjai, tumau asan nunaka tajai, tusa Moisésan tinaiti.

⁹ Yuus timaunka turusag israelita ainan Moisés ujakuiti. Turasha senchi takamtikainaku waitkainamu asar, nekaspapi tawa tusarka ticharu ainawai.

¹⁰ Tumaina asarmatai Yuus Moisésan chicharuk:

¹¹ Israelita ainan Egipto nugkanam pujuina nuna jiir akuprati tusa turamui tusam faraón werim ujakta, tusa tinaiti.

¹² Turasha Moisés Yuusan ayak: Israelita shuar ainaksha nekaspapi tawa turutainatsui, tura faraónkawa wii shir chichachu asamtai winaka nekaspapi tawa turutchattawai, tusa tinaiti.

¹³ Nuna takai Yuus Moisésan Aarónjai israelita ainan jiir akupkati tusa turamui tusarum faraón ujaktarma, tusa tinaiti.

^14-27 (-)

Yuus ataksha Moisésan Aarónjai chichasmau

²⁸ Yuus Egipto nugkanam Moisésjai chichasua nuu tsawantin

²⁹ chicharuk: Wika Tuke Puju tutaiyaitjai. Wii amina titatjam nuka egiptonmaya apu ashi ujakta, tusa tinaiti.

³⁰ Turasha Moisés Yuusan chicharuk: Yuusru, wika shir chichachuitjai, tumau asamtai nekaspapi tawa tusa faraón turutchattawai, tusa tinaiti.