Éxodo 5 - New Testament with Old Testament portions

Moisés nina yachi Aarónjai egiptonmaya faraón pujamunam wemau

¹ Moisés Aarónjai Israel shuar ainajai chichasar ikuinak, egiptonmaya faraón pujamunam wearuiti. Tuma jeaa faraónkan chicharainak: Israelita ainati umirtairi Yuus chichartamuk, wii etegkamu ainan jiir akupkati. Turawaram wear aya nugkanmag jeawar wina emematriarti, tusa Yuus turamui tiaruiti.

² Tamasha egiptonmaya apu nitan chicharuk: Wiyaitjai egiptonmaya apunka tumau asan, chichame umirkun israelita ainan werum ememattarma, tusan wii tumainka Yuuska atsawai. Nuiyasha wika Yuusnaka pegkesha nekatsjai, tuma asan israelita ainanka akupkachartatjai, tusa tinaiti.

³ Tusa takai nita chichainak: Israelita ainati umirtai Yuus wantinturmakji. Turutma asamtai tres tsawan aya nugkanmag jear, nui ii umirtai Yuus eme anentsa iiyakur tagku aina maa epeattaji. Tuma asamtai akupkartukta, nu turukratachkumnaka jatajai turachkusha maaniamunam ina shuari aina ijitmawartatji, tusa tiaruiti.

⁴ Turasha Egiptonmaya apu Moisésan Aarónjai chicharuk: Nu tuinakrum shuar aina shir takaschamnau amajearme, tusa tinaiti. Nuna tusa shuar ainan chicharuk: Nu tuina nuka anturtsuk, werum takastarma, tusa tinaiti.

⁵ Nuiyasha faraón Moisésan Aarónjai chicharuk: Israelita aina Egipto nugkanam nukap pampagkara nuka, takascharti tusarmeka tumaitsurme, tusa tinaiti.

⁶ Nu tsawanta nuik egiptonmaya apu ainan, tura israelita aina takatan takainakai iistin anairamu ainajai irumar chicharuk:

⁷ Israelita aina ladrillo ainan najanawarti tusarum nupa aina sumiarum nuka yamaika turawairpa. Antsu yamaika nitak wear eakar jukiar takasarti.

⁸ Turasha israelita aina nakimainak ii umirtai Yuus eme anentsa iiyakur tagku aina maa epeattsar wakeruinaji, tusa tuinawai. Tuina asarmatai yamaika atum nupa ikateam ladrillo ainan najaniarma imatiksag najanawarti tusarum titarma,

⁹ Israelita aina takatsuk pujuinak tuina asamtai, yamaika senchi takamtiksatarma, turamu asar waitruinak tu yuja nunaka anturkacharti, tusa tinaiti.

¹⁰ Takai Egiptonnmaya apu aina, tura israelita takatan inamin ainasha, israelita ainan jeariar faraón timaun ujainak: Yamaika nupa jukirum susairpa, tusa faraón turamji.

¹¹ Turamu asamtai yamaika atumek werum eakrum jukirum takastarma. Turasha ii nupa itakrin najanmiarum imatiksarmek najanattarme, tusa tiaruiti.

¹² Tuinakai israelita ainaka nupan eakar jukiartasa, Egipto nugkanam kanarar shiakaruiti.

¹³ Tura kashi kashinig Egiptonmaya apu aina israelita ainan takata takainakai iisti tusa anairamu ainan chicharainak: Yaunchuk nupa juki suamu asarum chikichik tsawantin urutma nukapea najanmiarum nuka imatiksarmek yamaisha najanatarma tusar imatruina.

¹⁴ Turasha yaunchuk najanu jakarua imatrusag najanmainchau nekapena asarmatai, egiptonmaya apu anairamu aina israelita ainanmaya takatan inamin arti tusa anairamu ainan suimaina. Turuinak tres tsawan taká pujakrumsha yaunchuk najanmiarum imatiksarmek najantsurme, tusar tuina.

¹⁵ Imatruinamu asar takatan inamin atii tusa israelita ainanmaya anaikamu aina, faraónkan weriaruiti. Tuma jeariar chicharainak: Apu amijai takau aina senchi waitkarmainaji.

¹⁶ Ladrillo najanatnun nupan juki suramainachiat ladrillo nuik najanmarum imatiksarmek najanatarma tusar shuar amijai takau aina senchi inatmainak waitkarmainaji. Nuiyasha suimramenaji iturchatka shuar amijai takau aina nunauwaiti, tusar tiaruiti.

¹⁷ Turasha faraón nitan chicharuk: Atumka náki asarum, aya nugkanmag weri Yuus eme anentsa iiyakur tagku aina maa epeattsa wakeruinaji tu yujarme.

¹⁸ Nuka tu yujatsuk werum ladrillo aina nuik nupan juki suramainakai najanmarum imatiksarmek yamaisha najanatarma, tusa tinaiti.

¹⁹ Israelita ainanmaya takatan inamin arti tusa anairamu aina nuna antukar shir senchi waitkainamun nekapmamraru.

²⁰ Faraónjai chichasar umikar jinkama, Moisésan Aarónjai aa nakamainak pujuinan wainkaruiti.

²¹ Tumawar kajerkar chicharainak: Atumi iturchatrin ijitmawartatji. Ina turutmawarmataigka Yuus waittan suramsattarme, tusar tiaruiti.

Moisés Yuusan aujsamu

²² Tuinakai Moisés Yuusan aujeak: Yuusru, ame etegkamuram aina waittsarti tusam tsagkamkaume. Nitan waitkasarti tusamka winaka akuptumain amajtukchauwaitme.

²³ Ame timaun faraónkan yama nagkamchakun ujakmaj imanai nagkama aminu ainanka faraón shir senchi waitka pujawai. Turasha ameka aminu ainaka ayamrukam agkanmamtiktsume, tusa tinaiti.