Éxodo 4 - New Testament with Old Testament portions

¹ Tutai Moisés chichaak: “Yuuska wantinturmakchau aig tame tusar nekaspapi tawa turutchartatui, tuina asar umirtukchartatui”, tusa tinaiti.

² Tutai Yuus Moisésan chicharuk: Wari takakam, tusa tinaiti. Tutai ni ayak: “Chikichik ushukrutain takakjai”, tusa tinaiti.

³ Tutai Yuus chicharuk: Ushukrutairam nugka nagkimata, tusa tinaiti. Tutai nugka nagkimawaiti, nu turamuik nápi najaanaruiti. Tumamtai Moisés ashamak tsekea,

⁴ tumakai Yuus chicharuk: Ujuknum achikta, tusa tinaiti. Takai napin achikuiti, turam ushukrutai ataksha najaanaruiti.

⁵ Tumamtai chicharuk: Amesha jutiksamek iwaintukarta, turawaram ina uuntri Abraham, Isaac tura Jacob nu aina umiru jakarua nu Yuusapi wantintukia tusar turamiartatui, tusa tinaiti.

⁶ Yuus ataksha chicharuk: “Yamaika uwejmijai netsepmini uyuata”, tusa tinaiti. Tutai netsepen uyua uwejen jusa iikma, jata lepra tutai tukum puju jasun wainkauwaiti.

⁷ Tumamtai Yuus chicharuk: “Ataksha uwejmijai netsepmini uyuata”, tusa tinaiti. Takai uyua uwejen jusa iiyajkama pegker jasun wainkauwaiti.

⁸ Tumamtai Yuus chicharuk: “Yama nagkamchaku iwainamurmin nekaspapita turamainachkusha, jimara ju iwainakmin nekaspapita turamiartatui.

⁹ Tura jimara ju mai iwaintamsha nekaspapita turamainachkaigka, Nilo entsa shikikam jukim nugkanam ukarta. Turam numpa najaanartatui”, tusa tinaiti.

¹⁰ Takai Moisés Yuusan ayak: “Yuusru, wika shir chichachuitjai, junaka yamai ame aujtam juiksha juniatsjai, yaunchuksha tuke chichauwajai”, tusa tinaiti.

¹¹ Tutai Yuus chicharuk: “Shuara wenenka wii najatawaitjai. Tura chichachuncha, empekuncha tura wainmachuncha Yuus asan, wiki najankauwaitjai.

¹² Tuma asamtai yamaika wetá, wii amijaigka pujuttajai. Tuma asan, wiki chichamtikattajme”, tusa tinaiti.

¹³ Tusa tamasha Moisés chicharuk: “Yuusru, wait aneasam shuar chikich akupkata”, tusa tinaiti.

¹⁴ Tutai Yuus Moisésan kajerak chicharuk: “Amina yatsum Leví weantu Aarón shir chichau puja nu, Egiptonmaya jiinki amina igkunmak shir aneastata nunasha nekajai.

¹⁵ Tura nijai chichasta, turakum ni chichaktinka ashi ujakta. Wii atumjaigka pujuttajai, tuma asan wainchatai aina atum iwainaktinnaka wiki nekamtikattajrume.

¹⁶ Tura wii tumainaitaj turusmek Aarón ame ujattame. Turam shuar ainan ni ujattawai.

¹⁷ Yaunchuksha wainchatai aina iwainaktintrum ushukrutairam jukita”, tusa tinaiti.

Moisés Egipto nugkanam waketkimu

¹⁸ Tutai Moisés nina weari Jetro jeen waketki jeawaiti. Tuma wearin chicharuk: “Egiptonam waketkin wina pataar ainasha pujuinawash tusan iisartasan wakerajai”, tusa tinaiti. Tutai weari chicharuk: “Kuitamamsam wetá”, tusa tinaiti.

¹⁹ Turasha eke wetsuk Madián nugkanmag pujaun Yuus chicharuk: “Amina mantamattsa wakeriarmia nuka ashi jinaawarai. Tuma asamtai Egiptonam waketkita”, tusa tinaiti.

²⁰ Tutai Moisés nina nuwen, tura nina uchiri ainajaimak burronam ekenar, yaunchuksha wainkachmau aina iwainaktintrum ushukrutairam jukita tusa Yuus timau asa, ushukrutairin juki Egipto nugkanam wuwaiti.

²¹ Tuma jinta wean Yuus Moisésan chicharuk: “Yaunchuksha wainkachmau wina senchirjai iwainakta tusan timajam turusmek Egiptonam jeaam, faraónkan emtincha iwainakta. Turakmincha nekawai tusan faraónnaka enentaimkachu amajsattajai. Turamu asa wii etegkamu ainanka wetarum tusagka tichattawai.

²² Turasha faraón chicharkum, Yuus chichaak: Israel shuar ainaka wii etegkamu asa, uchi iwairiya numamtin asamtai, shir senchi nitanka aneajai.

²³ Tuma asarmatai jiir akupkati turam wina ememattriarti tusan timaun umirtukchau asamtai, nina uchiri iwairin mantuattajai tusa Yuus turamui titá”, tusa tinaiti.

²⁴ Chikichik tsawantin Moisés nina nuwejai, tura nina uchiri ainajaimak jinta kanartinnum jeawaruiti. Tuma kanittamaun nina uchirin Guersónkan kati mushuken tsupirkachu asamtai, káshi wantintuk maattsa wakerukuiti.

²⁵ Turakai Moisésa nuwe Séfora kuchii kayajai najanamun juki, Guersónkan kati mushuken tsupirkauwaiti. Tura nujai nina aishri nawen antintak chicharuk: “Ju numpa jutikamunam aishru iwáku pujuttame”, tusa tinaiti.

²⁶ Nuna turamtai Yuus Moisésan maatsuk inaisauwaiti. Nuna turamtai nina nuwe Séfora aishrin chicharuk: “Ju numpa jutikamunam aishru iwáku pujuttame”, tusa tinaiti.

Moisés Aarónjai israelita ainajai chichasmau

²⁷ Yuus Aarónkan chicharuk: Aya nugkanmag Sinaí tutainam jeaam, Moisés igkugta, tusa tinaiti. Timau asa Aarón wuwaiti, tuma aya nugkanmag Moisésan igkugkuiti.

²⁸ Tumamtai Yuus timaun, tura yaunchuksha wainchatai ainasha iwainakta tusa timauncha, Aarónkan ashi ujakuiti.

²⁹ Tura nijai we Egipto nugkanam jeaawar, Israel shuar ainan apurin irumraruiti.

³⁰ Turawar Yuus Moisésan timaunka Aarón ashi etserkauwaiti. Tura yaunchuksha wainchatai aina iwaintukarta timauncha Moisés ashi iwainakuiti.

³¹ Turamtai nuna wainkar nekaspapita tusar tiaruiti. Tura israelita aina waitaina nunasha wainjai, tura asan nitan yaigkartatjai, tusa Yuus timayi tamaun antukar tikishmarar Yuusan emematiaruiti.